bwiza.com
Ahabanza » RDC: Hazindutse imyigaragambyo yamagana icyemezo cyo gusubika amatora mu bice bimwe
Amakuru Politiki

RDC: Hazindutse imyigaragambyo yamagana icyemezo cyo gusubika amatora mu bice bimwe

Abaturage batari bacye muri Beni kuri uyu wa Kane, itariki 27 Ukuboza bazindukiye mu myigaragambyo yahamagajwe n’ihuriro ritavuga rumwe n’ubutegetsi bwa Perezida kabila ryitwa LUCHA (Lutte pour le Changement) yo kwamagana isunikwa ry’amatora muri iki gice ryatangajwe kuri uyu wa Gatatu.

Biravugwa ko hatwitswe amapine, hagashingwa za bariyeri mu mihanda mu Mujyi wa Beni rwagati, mu gihe abigaragambya bagendaga berekeza ku cyicaro cya Komisiyo y’Igihugu y’Amatora bagiye gusaba ko amatora yazaba nk’uko byari biteganyijwe.

Itangazo ryashyizwe ahagaragara na Komisiyo y’igihugu y’amatora ya Congo (CENI) riravuga ko ku biro by’itora muri Beni, mu Mujyi wa Beni, no mu Mujyi wa Butembo, muri Kivu y’Amajyaruguru, ndetse n’ahitwa Yumbi, mu Ntara ya Mai-Ndombe, amatora yari ateganyijwe kuwa 30 Ukuboza azaba muri Werurwe mu mwaka utaha.

Iki cyemezo ntikishimiwe n’abatavuga rumwe n’ubutegetsi bivugwa ko muri iyi mijyi ya Benin a Butembo ari indiri y’abadashyigikiye ubutegetsi buriho.

Ribinyujije ku rukuta rwaryo rwa twitter ihuriro LUCHA ry’umukandida Felix Tshisekedi ryagize riti: “Igisirikare cyiyoberanyije mu myambaro ya polisi, kimaze kugerageza gutatanya urugendo rw’uburakari tuyoboye n’amasasu ya nyayo n’ibyuka biryana mu maso. Ariko kubera ukuntu twiyemeje n’umubare ugenda wiyongera, byabaye ngombwa ko kirwana gisubira inyuma.”

Ku rundi ruhande nk’uko bigaragara mu nkuru za politico.cd, ihuriro LAMUKA ry’umukandida Martin Fayulu, ryasabye ko amatora agomba kuba muri Congo yose ndetse rihamagarira abaturage kuzitabira “Umunsi w’Umujyi Upfuye” kuri uyu wa Gatanu.

Mu kiganiro iri huriro ryagiranye n’itangazamakuru kuri uyu wa Kane I Kinshasa ryahamagariye Abanyekongo kutemera icyemezo cya Komisiyo y’Amatora cyo kuri uyu wa Gatatu.

LAMUKA irasaba CENI gukuraho icyemezo cyayo no gutegura amatora ku banyekongo bose.” Uyu ni Pierre Numbi wo muri iri huriro wakomeje yibaza ukuntu iyi komisiyo y’amatora yashyize mu kato Beni, Butembo na Yumbi mu gihe izindi teritwari z’igihugu nazo zibayeho mu mpungenge z’umutekano nk’izo aba babayemo.

Pierre Numbi yakomeje ahamagarira Abanyekongo kwanga iki cyemezo cya CENI agira ati: “LAMUKA irasaba Abanyekongo kutubaha icyemezo cya CENI, kandi irahamagarira abaturage bose Umunsi w’Umujyi Upfuye kuwa Gatanu, itariki 28 Ukuboza.

Biteganyijwe ko mu bindi bice by’igihugu nihatagira igihinduka amatora yari ateganyijwe kuwa 23 Ukuboza azaba kuwa 30 Ukuboza mu gihe mu bice bimwe twavuze komisiyo y’amatora ivuga ko amatora azaba muri Werurwe mu 2019.

Izindi wakunda

Bwiza.com