bwiza.com
Amakuru mu Rwanda

Nyanza: Utulima tw’igikoni twifashishijwe nk’intwaro yo guhashya imirire mibi mu bana

Abahatuye  mu mudugudu wa Gisore, Akagari ka Gahombo, Umurenge wa Kigoma ho mu karere ka Nyanza, bemeza ko bageze kure bashaka uko basezerera ikibazo cy’imirire mibi mu bana kubera utulima tw’igikoni.

Nyirambibi Jeannette umwe mu bahatuye warwaje bwaki avuga ko yabiterwaga no kutamenya ko abana bagomba kugaburirwa indyo yuzuye ibi byanatumye umwana we muto arwara iyi ndwara nyamara ngo aho atangiriye guhinga imboga ubu umwana we yarakize afite imikurire myiza.

Agira ati ″Byaterwaga n’ubujiji nari mfite simenye ko imboga ari ngombwa aho mariye kujya kwiga uko bazihinga nuko baziteka naraje ndabikurikiza ubu umwana wanjye yarakize neza nta kibazo afite″.

Aba baturage bo muri uyu mudugudu biyemeje kubyaza umusaruro imbuga zo ku ngo zabo ubusanzwe bajyaga bakubura gusa batazibyaza umusaruro. Babifashijwemo n’imiryango itandukanye bamenye ko nta butaka bukwiye gupfa ubusa butabyazwa umusaruro kuko banamenye guhinga imboga mu mifuka n’ibikoresho bishaje.

Umugwaneza Solange Umujyanama w’ubuzima muri uyu Mudugudu, avuga ko nyuma yo guhabwa amahugurwa yo kubaka uturima tw’igikoni byatumye ikibazo cy’abana bahabwaga ifunguro ku bigo nderabuzima batongera gusubira inyuma kuko ngo inama zo kwa muganga zonyine zitabaga zihagije.

Agira ati ″ Twaragendaga tukabigisha uko bategura indyo yuzuye mu gikoni cy’umudugudu ariko ababyeyi baragendaga ntibabikore abana bagaheruka za  mboga twabatekeye bigatuma batiyongera ,uyu munsi bose bamaze kuzihinga no kumenya uko bazitegura″.

N’ubwo abaturage bafite uturima tw’igikoni bavuga ko twagabanyije ikibazo cy’imirire mibi ku bana, Umuyobozi wungirije w’Akarere ka Nyanza Ushinzwe Ubukungu, Kajyambere Patrick avuga ko Akarere kagifite abana hafi 40 bafite imirire mibi bari mu ibara ry’umutuku.

Agira ati″ Turacyafite abana 36 bakiri mu ibara ry’umutuku muri aka karere ariko ubukangurambaga burakomeje kuko utu tulima ntituragera mu mirenge yose y’aka karere n’ingo zose ntizirashobora kuduhinga ″.

Akarere ka Nyanza gatuwe n’imiryango isaga ibihumbi 75, muri yo imiryango ibihumbi  25 niyo idafite utulima tw’igikoni naho abana bagera kuri 324 nibo ubu bakiri mu ibara ry’umuhondo naho abangana na 300 ngo bavuye mu ibara ry’umuhondo basubira mu ibara ry’icyatsi rigaragaza imirire myiza ku mwana cy’imibereho myiza y’abaturage kuri ubu aka karere kakaba kageze ku kigero cya 28% cy’igwingira mu gihe mu gihugu hose igwingira ry’abana rigeze kuri 38%.

Utulima tw’igikoni niryo banga bakoresha mu guhashya imirire mibi mu bana

 

Izindi wakunda

1 Igitekerezo

Bazabose 29/12/2018 12:30 pm at 12:30 pm

Abana bakeneye Proteines n’ibinyabijumba bikomeye nk’imyumbati cg ifu y’ingano, y’amasaka, ibitoki, kurusha uko bakeneye imboga. Ese mubona imboga n’ibirayi byavamo igufwa rikomeye??????????. Kugwingira ni ukubera rojyo rojyo cg se amazi buzi.

Subiza

Tanga Igitekerezo

Bwiza.com
error: Alert: Ntabwo byemewe!!