bwiza.com
Ahabanza » Ingabire Victoire yakomoje ku Burundi buvuga ko buterwa ibibazo n’u Rwanda
Amakuru mu Rwanda

Ingabire Victoire yakomoje ku Burundi buvuga ko buterwa ibibazo n’u Rwanda

Umunyapolitiki Ingabire Victoire avuga ko hakwiye ubufatanye bw’abanyarwanda bose mu kubuka u Rwanda buri wese yishimiye.

Mu kiganiro kirambuye yagiranye na Radiyo Ijwi rya Amerika, Ingabire Victoire yavuze ko yaba Leta iri ku butegetsi ndetse n’abatavuga rumwe nayo, bakwiye gushyira imbaraga hamwe mu kubaka u Rwanda rutajegajega cyangwa ngo rurebwe nabi n’ibindi bihugu byo mu karere k’ibiyaga bigali nka nyirabayazana w’ibibazo byaba bifite.

Aha ni naho yahereye akomoza ku Burundi, agira ati “Ntekereza ko ari abari ku butegetsi, abari muri Opozisiyo, ndavuga abari hanze, ubwo bushake tugomba kubugira bwo kumva ko tugomba guhuza imbaraga tukubaka u Rwanda buri munyarwanda wese yibonamo, u Rwanda ntirwongere kuba isoko y’impunzi, ntirwongere kuba isoko yo kuvuga ngo nirwo rutera intambara mu karere,… u Burundi buvuga ngo dufunze imipaka ngo twe kongera kuvugana n’u Rwanda ngo kubera ko arirwo rudutera ibibazo,u Rwanda rugomba kuba u Rwanda abantu bose bavuga ngo ni rwarundi rubamo Imana,…”.

Ingabire victoire, umaze amezi agera kuri atatu afunguwe ku bw’imbabazi za Perezida, ahamya ko ntaho ateganya kujya, ko azaguma mu gihugu agafatanya n’abandi Banyarwanda kurwubaka.

Ati “Ntaho nzajya kuko ndi mu gihugu cyanjye, ndifuza gufatanya n’abanyarwanda kurangiza ibibazo dufite mu gihugu”.

Ingabire Victoire akomoje ku Burundi mu gihe kuva mu 2015, ubwo muri iki gihugu havukaga imvururu biturutse ku kwiyamamaza kuri manda ya Gatatu kwa Perezida Nkurunziza, bose batavuzeho rumwe, umubano wabwo n’u Rwanda watangiye kuzamo agatotsi.

Izo mvururu zanagaragayemo ukugerageza guhirika ku butegetsi Leta iriho ya Nkurunziza, n’ibindi bikorwa by’umutekano muke, bityo Leta y’u Burundi igakomeza gushimangira ko ibyo bibazo byose bubiterwa n’u Rwanda. Ubuyobozi bw’u Rwanda bugahakana ibi bubushinja bwivuye inyuma ko ‘Nta nyungu bwakura mu guhungabanya umutekano w’abaturanyi’.

Ingabire Victoire ni umunyapolitiki utavuga rumwe na Leta y’u Rwanda, muri Nzeri nibwo yahawe imbabazi na Perezida wa Repubulika, Paul Kagame hamwe n’izindi mfungwa zisaga ibihumbi bibiri, akaba yari yarakatiwe igifungo cy’imyaka 15 mu mwaka wa 2013.

 

Izindi wakunda

Bwiza.com
error: Alert: Ntabwo byemewe!!