bwiza.com
Ahabanza » Kayonza: Guverineri Mufurukye yahanuye abanyeshuri barangije ayisumbuye bitabiriye itorero
Amakuru Mu mashuli Politiki

Kayonza: Guverineri Mufurukye yahanuye abanyeshuri barangije ayisumbuye bitabiriye itorero

Guvereneri w’Intara y’Iburasirazuba, Mufurukye Fred, niwe watangije ku mugaragaro  itorero ry’urubyiruko rurangije amashuri yisumbuye, Inkomezabigwi icyiciro cya karindwi, mu Karere ka Kayonza mu kigo cy’ishuri cya Kayonza Modern secondary school kuwa Gatatu tariki ya 2 Mutarama 2018, aho mu mpanuro yahaye urubyiruko 681 rwaturutse mu mirenge 5 yasabye gufatanya n’abandi baturage mu midugudu batuyemo gushaka umuti ku bibazo biri mu midugudu baturutsemo anabasaba kuba intangarugero mu myifatire  .

Guvereneri Mufulukye Fred mu kiganiro yabagejejeho kibanze ku mateka y’u Rwanda  yanababwiye  ko urubyiruko rurangije amashuri yisumbuye rugomba kugira uruhare rufatika mu kwiyubakira igihugu kandi ko igihugu kibatezeho uruhare rufatika mu rugamba rw’iterambere  .

Urubyiruko rwanasabwe kugira uruhare mu gushaka umuti w’ibibazo biri mu midugudu yabo bakagira uruhare mu guhashya indwara ziterwa n’imirire mibi , guhashya abacuruza, abakwirakwiza n’abanywa ibiyobyabwenge ,kubakira abatishoboye no gufatanya n’abatoza b’intore mu midugudu kunoza imikorere y’amasibo .

Guvereneri Mufulukye yanibukije ko gutorezwa mu itorero ari ngombwa kuri buri munyarwanda nkuko perezida wa Repubulika akunze kubivuga.

Yagize ati: “Nkuko Perezida wa Repubulika akunze kubivuga intore mu buzima bw’Abanyarwanda ni ingenzi ,nta shuri nzi riruta itorero buri munyarwanda wese agomba kumva ko ari intore y’u Rwanda intore ishingira ku bikorwa bifatika n’imyifatire ikwiye.”

Umwe mu rubyiruko rurimo gutorezwa mu kigo cya Kayonza Modern Secondary school Niyonsaba Clementintine utuye mu Murenge wa Mwiri yemeza ko azasoza itorero yungukiyemo ubumenyi buzatuma ashobora guhindura bagenzi be bataramenya akamaro ko gutorezwa mu itorero.

Aragira ati: “Iri torero tuzaryigiramo amateka yaranze u Rwanda nanjye nzabashe kujya nsobanurira abaturage b’iwacu ayo mateka kandi tuzabasha no guhindura bagenzi bacu batarumva neza akamaro k’itorero.”

Intore 1500 z’urubyiruko rurangije amashuri yisumbuye mu Karere ka Kayonza zirimo gutorezwa mu mirenge ya Rukara,Kabarondo na Nyamirama.

 

Izindi wakunda

Bwiza.com
error: Alert: Ntabwo byemewe!!