bwiza.com
Ahabanza » Nta Kivu nta Crimea, kubera iki isi ibogama?
Amakuru IBYEGERANYO Politiki

Nta Kivu nta Crimea, kubera iki isi ibogama?

Umunyarwanda niwe wavuze ngo akanyoni katagurutse ntikamenya iyo bweze, nubwo ntari inyoni nkaba ntabasha kuguruka, rutemikirere yo kabyara yarangurukije kugeza iyoooo hirya iyo mu mahanga ya kure no hafi y’iwacu ntajyanywe no guhaha kuko iwacu ntacyo nari mbaye usibye kujya kureba uko isi itegekwa maze nsanga nta mbabazi igira.

Ndibuka ko iyo nkoze ingendo nkizo, nkunze kwitwaza isaho cyangwa uruhago kuko ntacyo biba bimbwiye cyane, ikidashoboka cyo n’ukutibagirwa ibaba ryanye n’uruhu rwanjye kugira ngo ntagira amazinda nkibagirwa dore ko imyaka imaze kwicuma bimwe na bimwe bikaba bigenda bincika iyo ntabishyize ku gahu kanjye nubwo mba nsusumira.

Nuko rero ndakugendeye no kwa Putin ndetse no hafi aha kwa Mumbutu, ngenda nihagazeho nk’abandi basirimu bose. Ngeze ku nkike cyangwa ku mipaka kimwe n’ahandi hose, nshaka kwinjira no kumva numva ngo shimama hapo, wewe unaenda wapi? kubera ko bitari ubwa mbere ngeze aho nihagararaho nsubiza mu giswahili gitomoye maze umuzayirwa agira ati uyu ni ndugu yetu ( uyu ni mwene wacu).

Ngeze Moscow ho byari akaga gakomeye, kubera ko ntumvaga na gato ikirusiya nahabereye nk’ikiragi ariko sinjye wagize umugisha nkabona ndahikuye. Aha ariko hari uwo twari kumwe wumvaga amagambo make y’ikirusiya niwe wansobanururaga ariko nawe urebye ahuzaguruka uko nabibonaga, ingorane nahuye nazo ntizigira abandi bantu kuko wagira ngo nari nikoreye urumogi cyangwa ibindi biyobyabwenge. Baransatse kugeza no kumwambaro w’imbere numva umujinya uranyishe ndavuga nti asyi ariko ubundi barandeba bagasanga ndi adui? Aho bampereye nta soni?

Ariko kuko iwabandi ari iwabandi nyine ncisha make, ndatuza ndiyumanganya ariko mbabaye, ntahandi bakundaga kureba usibye ku ibaba n’agahu kanjye kuko iyo babinyambura nari kuba nduhiye ubusa icyanjyanye kikaba kibaye impfabusa maze nkazindara. Amahirwe ntibabikozeho barandetse ndikomereza bituma mbasha kumenya uko isi irenganya abantu.

Mwavuga muti ese ibi nabyo bije bite? ubyumvise wagira ngo nataye ibababa! ndagusetse kandi ndaguhemye kuko unyibeshyeho, reka nkubwire wowe usoma, ese isi n’iki? nk’umwizera nakubwira ko isi ari umwanzi w’umuntu nk’uko twigishijwe mu ijambo ry’Imana, kuko irakugerageza utareba neza ikagukura mu byizerwa. isi nta mbabazi! Perezida Paul Kagame nawe yigeze kuvuga ko isi nta mbabazi igira, nuko nyine ntawe uneza rubanda, abantu nabo bakaba ba ntamunoza, kubera uruhurirane rw’ibyo byose ukisanga isi ibaye nko kugwirwaho n’ijuru!.

Njye mu buryo bwanjye isi nyibonamo byinshi ariko cyane cyane mu buryo bw’imitegekere yayo kuko nyibonamo kubogama, kwirengagiza, kubera kudaha agaciro ikiremwamuntu, kwikunda no gukunda impiya, kurenganya, gutinya gufata ibyemezo biboneye, guhembera amakimbirane, ibyo byose bigakorwa biyoberanya banishushanya bigira nyoni nyinshi.

Ngaho intambara z’urudaca hirya no hino ku isi, isi yananiwe kubonera ibisubizo, usibye imyanzuro ( resolutions) ifatwa tujya twumvamo ngo ” we condemn” turamagana bagahora muri uko kwamagana no gusohora za raporo zitabarika ari nako bitwara akayabo, umutungo w’imisanzu y’abanyamuryango! ibyo byoooose wareba ugasanga umusaruro ugerwa ku mashyi!

None se ubwicanyi bugenda bukorwa hirya no hino isi ntiba irebera? Genocide zigenda zikorwa, ibyaha by’intambara, imikorere y’imitwe ihungabanya amahoro n’ituze by’abaturage isi irebera, ubundi iba irihe? Nta mbabazi zayo rero, reka nigarukire ku by’uruzinduko rwanjye.

António Guterres, Umunyamabanga mukuru wa UN, Ishyirwa mu majwi yo kurobanura kubutoni muburyo bwo kwita ku ibibazo runaka kuko hariho abatsikamira abandi ikicecekera

Nuko ngeze iyo ndibuka ko hari hagati muri gashyantare mata 2014, nsanga hari intambara ikaze y’u Burusiya na Ukraine, intambara yarangiye Uburusiya bubashije kwigarurira intara ya Crimea. Uko byagenze bibara umupfu. Numvise ko kera iyo ntara yari mu cyitwaga leta zunze ubumwe z’Abasovieti ( URSS). Muri 1954, igihe Stalin yayoboraga, URSS imaze gushwanyuka nibwo iyi ntara ya Crimea yaje kuba intara y’igihugu cya Ukraine, u Burusiya businyana amasezerano anyuranye ( tutaza kuvugaho) na Ukraine yemeza ko iyo ntara ari iya Ukraine bidasubirwaho.

Abaturage bo muri iyi ntara bavuga ikirusiya, ariko Ukraine muri rusange ikaba yaraharaniraga kwinjira mu muryango w’ubumwe bw’ibihugu by’iburayi, ibintu uburusiya butakozwaga, mwibaze igihugu cyigenga wagira ngo kiyiborwa n’ibindi bihugu by’isi. Uko iki kibazo cyabonwaga icyo nise isi, yari yaracitsemo ibice bitatu ( abashyigikiye Ukraine barimo Amerika n’Uburayi, abashyigijiye Uburusiya, barimo ibihugu by’abakomunisiti, n’ibihugu byifashe ntibigaragaze aho bihengamiye).

Kubera iyo ntambara y’ubutita byatumye Uburusiya butegura kwigarurira Crimea buvuga ko abaturage baho bashaka gukorerwa genocide kubera ko bavuga ikirusiya, bakagira n’umuco wa ki Rusiya, intambara itangira ityo kugeza bwometse iyo ntara.

Isi yose yaracecetse.

Nagaruka hano hafi muri Kivu, abakoloni bamaze gukata imipaka mu cyiswe ( Berlin conference) muri 1884-1885, nabyo wakwibaza babaga he, ubwo bubasha bwo gushwanyaguza Africa byatumye u Rwanda rwamburwa ibice byarwo, ubutaka n’abaturage. Abaturage batwawe hamwe n’ubutaka bwabo mu bihugu bituranyi, abenshi ntibikunze kubafata nk’abenegihugu nyabo, Urugero rwo muri Congo, byakunze gutera amakimbirane yavuyemo intambara twagiye tubona ( RCD, CNDP, M23…).

Uko isi, cyangwa amahanga uko yarebaga ibibazo byo muri Kivu, bitandukanye kure n’uko yarebaga ikibazo cya Crimea. Ku bireba na Kivu, u Rwanda rwahuye kenshi n’ibibazo ko rushyigikira inyeshyamba zirwanya Congo kugeza bahagaritse inkunga rwahabwaga. Ingabo z’amahanga zihagurukira kurwanya imitwe yirwanagaho iharanira icyo yitaga uburenganzira bwabo.

Mu gihe kuri Crimea ingabo za NATO zakambitse mu bihugu bihegereye ariko icyazizanye cyagiye nka nyomberi. Hamwe amahanga arifata ahandi agafata ibyemezo bikakaye ariko ubona bibogamye.

Mu gutekereza kwanjye, Uburusiya bwigaruriye Crimea ku mpamvu navuze haruguru harimo kuba abaturage baho bahohoterwa bazira kuba bafite inkomoko mu bu Rusiya, byari kugenda bite iyo u Rwanda rubigenza gutyo kuri Kuvu kubera abaturage baho ( abahutu n’abatutsi), banavuga ikinyarwanda, ese aho ijoro rimwe amahanga ntiyari guhindura u Rwanda umuyonga?

Si aho gusa, mwabonye impunzi z’abanyarwanda uko zafashwe zicwa na malariya, macinya, cholera, mouche tsé tsé n’izindi ndwara no kuba mu mahema adasobanutse? Iyo mureba izindi mpunzi uko zifatwa mubona ari kimwe? Aho mujya mureba amahema zibamo ateye neza nka yayandi ya gisirikari?

Nsoza rero urebye uko isi ireba ikanakemura ibibazo biyugariye, habamo kubogama no kudashyira mu gaciro kuko bikorwa mucyo nakwita ( deux poids deux mesures/ double standard). Isi nta mbabazi! ubusumbane bwa international system mu gukemura amakimbirane ku isi, nutazigira ngo wirinde icyakubuza amahoro uzahora urengana wibeshya ko hari uwakurenganura.

Isi nta mbabazi, nta miryango mpuzamahanga izatanga ibisubizo ku bibazo biyugarije, niba idahinduye imikorere. Urugendo ruracyari rurerure! Reka nifatire utwanjye nigendere, n’ahubutaha bakunzi banjye namwe mwese mukurikira bwiza.com umunsi kuwundi.

Umunyamakuru wa bwiza.com, Umusesenguzi akaba n’umwarimu muri kaminuza, Samuel Munyakayanza

 

Izindi wakunda

4 Ibitekerezo

Ag 04/01/2019 4:17 pm at 4:17 pm

Nuko bigenda kwisi udafite Arya nkurwaye naho ufite akarya naducye twudafite

Subiza
Emmanuel 05/01/2019 7:15 am at 7:15 am

Hahahaha, Munyakayanza uri intiti ariko analyse zawe nazo zirabogamye cyane, ntabwo ugaragaza mu by’ukuri icyo ugambiriye. Ntabwo wagereranya ibitagereramywa. ikindi Byagusaba kumenya imyaka byamaze , inzira, ibitambo n’imyumvire abantu bari bafite kugirango u Rwanda rwitwe u Rwanda. Uzongere usome ibitabo by’amateka y’u Rwanda ( Cfr Alexis Kagame) kubitero bya Rwabugiri ku idjwi, n’ibikavu umenye akaga abari abaturiye ibyo bice bahuye nako k’intambara ya mpatsibihugu ya Rwabugiri. Kandi byagora umwe wese wakumvako kongera guhindura imipaka y’afrika byamworohera. Ikindi n’uko isi ntiringaniye (Inegalite du globe terrestre = inegalite de bio terrestre).

Subiza
yutibe 05/01/2019 9:32 am at 9:32 am

Munyakayanza bazagushyire muri section izajya kugaruraKIVU/ CRIMEA. Wibaza ko biriya bikorwa harize ababyeyi bangahe? ese ubundi bwo bimaze iki komeka KIVU ku Rwanda.
iriya KIVU irimo abaturage babiza icyuya KABILA kandi bari ku birometero 2,000 uvuye i Kinshasa, ubwo se bamwegereye ntibamuhirika?
muri Kivu harimo rebellions ziruta iziri muir Syria, ubwo se abo bantu bamenyereye gufata imbunda wabayobora ukabashobora?
ntimukadushyushye umutwe

Subiza
karumbeti 06/01/2019 12:05 pm at 12:05 pm

uyumugabo umenya isi yamukaranze kbs kugereranya cremenia ni intara yakivu icyo cyigereranyo ni sentimentale
noneho na kibungo bayomeke kuri tanzania ??

Subiza

Tanga Igitekerezo

Bwiza.com