bwiza.com
Amakuru Imikino

Umutoza wa Man. City arabyinira ku rukoma nyuma yo gutsinda Liverpool

Umutoza w’ikipe ya Manchester City, Pep Guardiola avuga ko umukino bakinnye na Liverpool bari bawiteguye nk’aho ari wo wanyuma usoza irushanwa, ubu bakaba bishimiye intsinzi batahanye.

Ni umukino w’irushanwa ry’umupira w’amaguru mu gihugu cy’u Bwongereza wabaye ku mugoroba wo ku wa Kane tariki ya 3 Mutarama 2019, urangira Man City itsinze 2-1 bya Liverpool.

Umutoza Guardiola aganira n’itangazamakuru nyuma y’uyu mukino, yagize ati “Ndanezerewe n’abakinnyi banjye, ariko si uyu munsi gusa. Twatsinzwe imikino ibiri mu minsi ine, ariko ntidushobora kwibagirwa ibyo twagezeho mu mezi 16. Uyu munsi twari twiteguye nk’aho ari ku mukino wa nyuma, iyo dutsindwa byari kuba birangiye”.

Yakomeje ashimira abakinnyi be, ati”Ndashimira aba bakinnyi badasanzwe. Uku ni ko dukeneye gukina mu mikino iduhuza n’amakipe yabaye aya mbere iwayo i Burayi, amakipe yose yagerageje gutsinda, nta bwoba twari dufite ariko bari batwitezeho byinshi”.

Nubwo Man. City ikirushwa na Liverpool amanota ane, umutoza Guardiaola ashimangira ko hari icyo bagabanuyeho kibaha icyizere cyo kuba bazanatwara igikombe.

Ati “Bari ku isonga, baturusha amanota ane, ariko twagabanyije icyuho. Twari tuzi ko dutsinze dushobora gukomeza guhiganirwa gutwara igikombe cy’iri rushanwa ariko iyo dutsindwa icyizere cyari kuba kiyoyotse. Sinibuka igihe naboye irushanwa rigoye nk’iri. Hari amakipe menshi arajwe ishinga no kuba aya mbere”.

Ikipe ya Liverpool niyo iyoboye urutonde rwa shampiyona n’amanota 54, igakurikirwa na Man. City ifite amanota 50, andi makipe azigwa mu ntege ni Tottenham ifite 48, Chelsea 44 na Arsenal ifite 41.

Izindi wakunda

Bwiza.com
error: Alert: Ntabwo byemewe!!