bwiza.com
Ahabanza » Nyanza: Bavuga ko kutagira umuriro w’amashanyarazi n’amazi bibangamira iterambere ryabo
Amakuru mu Rwanda

Nyanza: Bavuga ko kutagira umuriro w’amashanyarazi n’amazi bibangamira iterambere ryabo

Bamwe mu batuye mu mudugudu wa Nyangezi, mu kagari ka Butansinda, umurenge wa Kigoma, mu karere ka Nyanza, bavuga ko iterambere ryabo ridindizwa no kuba batagira umuriro w’amashanyarazi n’amazi.

Bavuga ko ukeneye umuriro wa telefoni akora urugendo rwo hagati y’isaha n’iminota 40 ajya kuyicaginga mu isanteri ya Butansinda akaza no gusubirayo kuyizana naho ukeneye amazi meza Atari ibinamba akajya kuyagura ijerekani imwe ngo ikagura hagari y’ijana na mirongo itanu bitewe n’aho avuye.

Umuhoza Jeanne umwe mu bahatuye avuga ko ubusanzwe aka gace kera cyane  ariko umuriro n’amazi birabadindiza mu iterambere kuko bitabiriye ubuhinzi bw’imboga ku mbuga z’ingo zabo ariko bakabura amazi yo kuzivomerera ngo zirusheho gutanga umusaruro ushimishije.

Agira ati “Imboga zacu ziruma tubura uko tuzivomerera kuko aho tuvoma mu mibande ni kuere ntiwakoherezayo umwana kabiri , udafite amafaranga ngo uvomeshe amazi meza bisaba gukora urugendo ujya kuyashaka ahari za kano umuriro nawo ni ikibazo abana bacu bariga bakabura uko basubira mu masomo yabo kubera kutagira umuriro ,iyo telephone ishizemo umuriro ni ikibazo kujya kuyicaginga kuko ni kure”.

Maniraguha Damascène umukuru w’uyu mudugudu avuga ko bakomeje kujya basaba ko bazanirwa umuriro ndetse kuko baturanye n’akarere ka Ruhango kandi ho umuriro ukaba uhari ,abaturage ngo bagerageje kwishyira hamwe batangana amafaranga ngo bawuzane ariko biranga kuko abakozi ba REG mu karere ka Ruhango bababwiye ko nubwo habegereye ariko batawubaha ko byasaba kobikorwa n’abakorera mu karere ka Nyanza.

Umuyobozi wungirije w’akarere ka Nyanza ushinzwe iterambere ry’ubukungu, Kajyambere Patrick avuga ko aka karere kakiri hasi mu kugira umuriro w’amashanyarazi cyangwa n’abakoresha imirasire y’izuba ariko ngo ku bufatanye n’ikigo cy’igihugu gishinzwe amashanyarazi REG muri aka karere bizeye ko imibare izazamuka .

Agira ati “Hari imiyoboro irimo gutunganywa izatanga amashanyarazi ariko na none turimo no gukangurira abaturage gukoresha imirasire y’izuba ku batuye ahantu hataragezwa iyo miyoboro naho ku hataragera amazi twatangiye gufatanya n’abafatanyabikorwa aho bigisha abaturage gufata amazi y’imvura ku mazu yabo bakoresheje uburyo bworoheje bw’amashitingi”.

Kugeza ubu, mu karere ka Nyanza  umuriro w’amashanyarazi n’uw’uw’imirasire y’izuba  uri mu ngo ibihumbi 24 muri 75 zigize aka karere,  bihwanye na 31%  bavuye kuri 24%.  Ubuyobozi buvuga ko ku bufatanye na REG gahunda yo kuwukwirakwiza muri aka gace ikomeje ni mu gihe ikigero cy’amazi meza kiri kuri  76% .

Izindi wakunda

Bwiza.com
error: Alert: Ntabwo byemewe!!