bwiza.com
Amakuru mu Rwanda

Kimisagara: Abaturage bigaragambije bifuza kumenya uwabarogeye umuyobozi

Bamwe mu baturage bo mu Murenge wa Kimisagara, Akarere ka Nyarugenge mu mujyi wa Kigali, bigaragambirije ku biro by’umurenge basaba ko ubuyobozi bufungura uwitwa Mugande wari wabijeje kubahuza n’umuvuzi, akabafasha kubereka umurozi waroze uwari umuyobozi wabo w’umudugudu.

Ahagana saa mbiri n’igice zo kuri uyu wa Mbere tariki ya 7 Mutarama 2019, nibwo abaturage b’ingeri zose bari ku Murenge wa Kimisagara, basaba ko Mugande afungurwa, akabafasha bakabasha kumenya umuturage waba wararoze Hakizimana Vianney, wari umuyobozi w’Umudugudu wa Sango, wo muri uyu murenge.

Batangaza ko Vianney yari umuyobozi mwiza, yafashwe n’uburwayi bakeka ko bwakuruwe n’amarozi, yitaba Imana ku wa 1 Mutarama 2019. Abaturage bakaba bari bakusanyije amafaranga asaga ibihumbi 70 kugira ngo Mugande abahuze n’umuvuzi ngo wari ‘gushika’ umurozi akaza yikoreye amaboko.

Ubwo uwo Mugande yabonanaga n’aba baturage kugira ngo umurozi agaragazwe, nibwo inzego z’umutekano zahise zimuta muri yombi zijya kumufunga, abaturage bahera ubwo berekeza ku biro by’Umurenge wa Kimisagara basaba ko yafungurwa akabafasha gushyira ku Karubanda uwo murozi.

Umukobwa uri mu kigero cy’imyaka 28 wari uri muri iki kivunge cy’abantu aragira ati “Njyewe natanze amafaranga 1000 kugira ngo batwereke uwo murozi wishe umuyobozi w’umudugudu wacu”.

Abana bato bari mu kigero cy’imyaka 7-12, umwe aragira ati “njyewe natanze 200” . Undi ati “natanze 500” njyewe ni 100”.Umugore wari uhetse umwana ati “Njyewe natanze 1000”. Undi mukobwa na we ati “Njyewe natanze 3000 kugira ngo batwereke umurozi”.

Umwe wo mu muryango wa Vianney ahamya ko yapfuye arozwe, ati “ikintu kigaragaza ko yarozwe, twamuhaye amata arayaruka, tujya mu bagorozi baduha ibintu by’amakara y’amazi avura igifu, ayanyoye nayo ahita aruka, tumuha amajyane nayo ayanyoye ahita aruka, bamujyanye kwa muganga bamusuzumye babura indwara n’imwe”.

Aimable Sandro avuga ko uyu muvuzi atazwi mu rugaga rw’abavuzi gakondo

Umuyobozi w’abavuzi gakondo mu Rwanda, Tuyisenge Aimable Sandro avuga ko batazi uyu muvuzi wari wiyemeje gukoresha imbaraga batazi agashyira ku Karubanda uwo bakeka ko yaba yararoze mudugudu.

Umunyamabanga Nshingwabikorwa w’Umurenge wa Kimisagara, Havuguziga Charles, avuga ko Vianney yapfuye koko, ariko akaba atemeranya n’aba baturage bavuga ko yarozwe mu gihe cyose umurambo we utapimwe ngo muganga avuge icyamwishe.

Ati “Tumushyingura ku itariki ya kabiri, amagambo yose yavugiwe aho nta muntu numwe wigeze avugira aho ngo atubwire ati ‘uyu muntu yazize ubundi bugizi bwa nabi, uyu munsi mu gitondo nibwo twumvise ko hari umuntu uvuga ko mudugudu yaba yararozwe kandi akaba afite ububasha bwo kumenya uwabikoze,… mu by’ukuri ni ugushaka kuyobya abaturage no gushaka kwiba amafaranga”.

Umuvugizi wa Polisi mu Mujyi wa Kigali, CIP Emmanuel Kayigi, avuga ko abaturage badakwiye kugendera kuri iyi myumvire bemeza ko umuntu yarozwe mu gihe nta kibigaragaza.

Ati “iyo ari amakuru abantu barayatanga agakurikiranwa mu buryo buzima bwemewe n’amategeko, nyakwigendera yapfuye ku itariki ya mbere, yari yararwaye amaze iminsi itatu mu rugo ku munsi wa kane bamugejeje kwa muganga arapfa,…. Iyi ni imyumvire idakwiye ku banyarwanda cyane cyane muri iki gihe tugezemo”.

Akomeza avuga ko uwo bakusanyirizaga amafaranga yari muri Tanzania uwafashwe agafungwa ni umukomisiyoneri ngo wari kubahuza n’uwo muntu mu buryo bwa telephone, akabereka uwaroze mudugudu. Ibi akaba avuga ko byari gushoboka ko utunzwe agatoki abaturage bari kumugirira nabi kandi wenda ngo anabeshyerwa.

Ubuyobozi bw’umurenge hamwe n’inzego z’umutekano zikaba zivuga ko zikomeza kugirana ibiganiro n’abaturage, hagakorwa iperereza ku bundi buryo n’amafaranga yabo bakayasubizwa.

Abaturage bari benshi ku muhanda werekeza ku murenge wa Kimisagara
Abaturage bifuzaga ko hafungurwa uwo bifuzaga ko abahuza n’ubereka uwaba yararoze mudugudu
Umunyamabanga Nshingwabikorwa w’umurenge wa Kimisagara, Havuguziga Charles

 

 

 

Izindi wakunda

Bwiza.com
error: Alert: Ntabwo byemewe!!