bwiza.com
Ahabanza » Haribazwa niba Louise Mushikiwabo atazakorera u Rwanda aho gukorera OIF
Amakuru Featured Politiki

Haribazwa niba Louise Mushikiwabo atazakorera u Rwanda aho gukorera OIF

Abantu benshi barimo abasesenguzi bakomeje guhanga amaso ahazaza h’Umunyamabanga Mukuru w’Umuryango w’ibihugu bikoresha Igifaransa (OIF), Louise Mushikiwabo, bategereje kureba uko azitwara mu nshingano nshya aherutse guhabwa zo kuyobora uyu muryango asimbura Umunyakanadakazi, Michaëlle Jean, aho bamwe batangiye kumusaba kuzigengesera niba yifuza kuzaguma kuri uyu mwanya.

Umuryango wa OIF bivugwa ko wakunze kugaragara nk’igikoresho cyo kugira ijambo cy’u Bufaransa, hakibazwa niba Louise Mushikiwabo nawe yaba agiye kujya akorera inyungu z’u Rwanda gusa, ariko nawe yagize icyo abivugaho.

Umuhanga muri philosophie wo muri Cameroun, Achille Mbembe, ukunze gukurikiranira hafi imikorere ya OIF yagize ati: “Bizaba biri mu nyungu ze mu kutagaragara nk’igikoresho cya Paul Kagame niba ashaka kuzarokoka ku buyobozi bw’uyu muryango.”

Louise Mushikiwabo nawe ngo azi ko ibikorwa bye bizaba bikurikiranirwa hafi nyuma y’uko yagiye atavugwaho rumwe ubwo yatorwaga mu Ukwakira umwaka ushize wa 2018, nubwo bitamubujije guhigika Umunyakanadakazi Michaëlle Jean bari bahanganye.

Jocelyn Coulon, umushakashatsi mu kigo cy’ubushakashatsi mpuzamahanga cya Montréal muri Canada yibukije ko Umunyamabanga Mukuru wa OIF aba agomba gushyira mu bikorwa politiki yagenwe n’ibihugu byose bigize umuryango.

Ati: “Ubwo agomba kuzarinda ibyemezo byafatiwe za leta kandi sinzatungurwa no kumubona asohora amatangazo ku bibazo biri mu Rwanda.”

Madamu Louise Mushikiwabo nawe asa nk’uzi ibi bintu neza. Mu kiganiro yagiranye na AFP yagize ati: “Ubu sinkiri minisitiri w’ububanyi n’amahanga w’u Rwanda. Nkorera Francophonie, mpagarariye Francophonie.”

Ku rundi ruhande ariko, Umufaransa Antoine Glaser, Umwanditsi akaba n’umunyamakuru ukunze gukurikirana Afurika, asanga Perezida Emmanuel Macron washyigikiye itorwa rya Louise Mushikiwabo, nta gitutu azashyira kuri Louise Mushikiwabo.

Umucamanza Pierre-André Wiltzer wigeze kuba minisitiri w’u Bufaransa ushinzwe Francophonie, hagati ya 2002 na 2004, nawe akaba yashimangiye ibi yemeza ko u Bufaransa bwita cyane kuri uyu muryango iyo bigeze mu gihe cyo guhindura umuyobozi wawo.

Kubw’ibyo, Louise Mushikiwabo ngo akaba atazahura n’ikibazo cyo gutegekwa imyitwarire n’u Bufaransa, avuga ko Perezida Emmanuel Macron yifashishije OIF mu gikorwa cya dipolomasi.

Umuryango w’Ibihugu bikoresha ururimi rw’Igifaransa (OIF) ugizwe n’ibihugu 88 na za guverinoma; ibigera kuri 54 muri ibi nibyo binyamuryango byuzuye, birindwi ni ibinyamuryango bicagase, mu gihe ibindi 24 ari indorerezi.

Amasezerano ashyiraho uyu muryango yashyizweho umukono mu 1970, ariko umwanya w’Ubunyamabanga bukuru bwawo ushyirwaho mu 1997, ukaba umaze kujyaho abantu bane kuva icyo gihe ari bo; Boutros Boutros Ghali kuva mu 1997 kugeza mu 2002, Abdou Diouf kuva mu 2003 kugeza mu 2014, Michaëlle Jean kuva mu 2015 kugeza mu 2018 na Louise Mushikiwabo uriho ubu kuva ku itariki ya 01 Mutarama 2019.

 

 

Izindi wakunda

1 Igitekerezo

assa cyiza January 9, 2019 at 5:59 am

ariko abantu barasetsa koko ubuse baribaza uko Mushikiwabo azayobora bafashe urugero rwabanyarwanda bagiye bayobora kuruhando mpuzamahanga uko babikoze ntibaharanige inyungu zurwanda nizamahanga nkuko babisabwaga ba Kaberuka..Kirabo Kakira..GEN.Nyamvumba nabandi benshi ahubwo reka dukenyere dukomeze ubundi amahanga atwitege duharanire gutabara Africa twese hamwe barugigana abo babone ko dushoboye politiki yabo ya mpatse ibihugu ibe amateka

Subiza

Tanga Igitekerezo

Bwiza.com