bwiza.com
Ahabanza » Icyifuzo cyacu kuri Kenya n’ukubona amahoro biciye mu ubumwe n’iterambere – Uhuru Kenyatta
Amakuru Featured

Icyifuzo cyacu kuri Kenya n’ukubona amahoro biciye mu ubumwe n’iterambere – Uhuru Kenyatta

Aya magambo atagira uko asa ushobora kuyasanga ku rukuta rwa facebook rw’umukuru w’ igihugu cya Kenya Uhuru Kenyatta, kuwa 06/01/2019, ubwo yifurizaga Railla Odinga isabukuru nziza y’ amavuko nyuma yibihe bikomeye byo guhangana banyuzemo mu matora y’umukuru w’igihugu cya Kenya, ariko kuri ubu bakaba badasigana nyuma yo kwiyunga. Aba bagabo bombi b’abanyapolitiki bahanganye mu gihe cy’amatora, buri wese yifuza kuba umukuru w’igihugu cya Kenya, kugeza ubwo abaturage bashyamiranye bikomeye, abasaga 1000 baricwa muri icyo gihe.

Amatora aheruka mu 2017, nabwo yaranzwemo umwuka mubi kugeza ubwo Uhuru Kenyatta byavugwaga ko yari yatsinze amatora, urukiko rw’ikirenga rukayatesha agaciro ko agomba gusubirwamo ngo kuko yakozwemo amakosa ( ibintu utapfa kubona kubacamanza mu bihugu bigitera imbere). Muribuka kandi mu gihe cy’irahira ry’umukuru w’igihugu Kenyatta kurundi ruhande Odinga nawe yaje kurahira bose kandi imbere y’ibihumbi n’ibihumbi by’abayoboke babo.

Mu byukuri aba banyapolitiki barahanganye karahava ariko uko baje kwiyunga byatunguye benshi. Ni nabyo nagarutseho ubushize mu nkuru yanjye nshima icyo gikorwa cya gitwari bakoze nerekana ko ari urugero rwiza rw’ubumwe n’ubwiyunge abandi bakagombye kwigana. Umunyarwanda niwe wavuze ngo hazima uwatse! Nibyo koko narabibonye n’ubu nkibibona kandi nzakomeza kubibona.

Iki gikorwa cyo kwiyunga isi yose yatunguwe no kubona igitondo kimwe abo bayobozi bahuriye mu gikorwa cy’amasengesho maze bagaragara bavuga imbwirwaruhame zakomeje abaraho n’abandi twabikurikiraga ku maradiyo na televiziyo bavuga ko ibyabatandukanyaga byarangiye ko bagiye gufatanya mu kunga no guhuza abanyakenya ko guhangana birangiye ubutazasubira.
Ibi byashimishije benshi nibaza ko atari bose. Inyungu zavuyemo ni uko abaturage bari mu mahoro nyuma y’ibyo byose byabaye kuko batakirebana ay’ingwe kubera impamvu za politiki, ironda karere, ironda moko n’ibindi bibi nk’ibyo.

Muribuka kandi ko indi nyungu nziza ari uko Railla Odinga asa n’uwahembwe na Komisiyo y’Umuryango wa Africa Yunze Ubumwe, akagirwa umuyobozi wo hejuru w’iyo Komisiyo ushinzwe ibikorwaremezo ( ahembwa iritubutse kandi arubashywe)!

Nyuma y’ibyo byose abo banyapolitiki ba Kenya bakomeje kwigaragaza neza ko bashyize hamwe ku neza y’abanyakenya. Amafoto muriyo sabukuru arerekana ibyo bihangange bikata gateau ijyanye n’uwo munsi udasanzwe nk’uko Kenyatta abyivugira.

Isomo twakuramo ni irihe?

Iri somo ntiryafatwa nk’ivangili, itavuguruzwa gusa buri wese bitewe n’imiterere ye, uko yarezwe, inyungu ahagarariye yagira uko abyumva kuko nemera ibiganiro mpaka kandi nkemera igitekerezo cya buri wese cy’ubaka. Kubera kandi ko zitukwamo nkuru, abayobozi baba bagomba kugendera muriyo nzira iganisha aheza hazatuma bavugwaho ibigwi aho kuzavugwaho ubugwari.

Ibigwi n’ugukora ibyiza bihesha ishema umuryango uyobora naho ubugwari ni ugukora ibihabanye n’ibyo maze kuvuga byazatuma usiga umugani maze ukitwa ruvumwa. Aba bakurikira buri wese ntiyagira icyo abavugaho cyiza cyangwa kibi? Muribuka Hitler, Mussolini, Kajuga, Pinochet, M.L King, I. Gandhi, W. Mandela, n’abandi benshi nkabo boretse cyangwa bakijije abaturage bari bashinzwe? Abasomyi bacu uwabaha umwanya buri wese yagira icyo avuga kuri ibyo birangirire ntanzeho ingero, bakabavugaho ibigwi cyangwa ubugwari.

Ngarutse mu karere dutuyemo urugero rwiza rwa Kenya nakwifuza ko twagera ikirenge mu cyabo tukarenga kure ibidutandukanya kuko ibiduhuza biba aribyo byinshi. Bigakorwa ntayindi mpamvu usibye guharanira amahoro yo mu mitima y’abaturage.

Mbajije ikibazo usibye ko ntapfa kubona unsubiza, usibye ko kitagoye, haba hari uwishimira ibyo twumva cyangwa dusoma biba hagati y’umudepite Wine na Perezida Museveni muri Uganda, Gen Nyamwasa na Perezida Kagame, Abashatse guhirika ubutegetsi na Perezida Nkurunziza, Katumbi cyangwa Bemba na Perezida Kabila? Ndakeka abenshi mutabyishimira! Ibi bikantera gusoza nibaza nti ese kwiyunga ntibishoboka? Ninde byababaza ukwiyunga kubayeho? Ndabizi mbasigiye amatsiko kuko bishobora kubyara impaka ( debate) ariko wabishyigira utabishyigikira ukwiyunga byahesha amahoro kuri buri ruhande kandi abaturage bakabyungukiramo.

 

 

Munyakayanza Samuel

Izindi wakunda

Bwiza.com
error: Alert: Ntabwo byemewe!!