bwiza.com
Ahabanza » PS-Imberakuri ya Me Ntaganda yamaganye abayiyitirira bagamije guhirika ubutegetsi
Amakuru Featured Politiki

PS-Imberakuri ya Me Ntaganda yamaganye abayiyitirira bagamije guhirika ubutegetsi

Ishyaka PS-Imberakuri rya Me Ntaganda Bernard , ritemewe n’amategeko y’u Rwanda ariko we ashimangira ko ryemewe, ryamaganye abiyitirira iri shyaka bemeza ko bafatanyije n’imitwe ya gisirikare y’ihuriro P5 ry’amashyaka atavuga rumwe n’ubutegetsi bw’u Rwanda igamije guhirika ubutegetsi iherutse kuvugwa muri raporo y’impuguke z’Umuryango w’Abibumbye.

Itangazo ryashyizwe ahagaragara na Me Bernard Ntaganda nk’uwashinze iri shyaka rifite Numero 001/PS.IMB/NB/2019 yemeje ko Ishyaka PS Imberakuri ryemewe na Leta y’u Rwanda kuva mu 2009 bityo inzego zifata ibyemezo zikaba zikorera mu Rwanda. Ni mu gihe bizwi ko Ishyaka PS Imberakuri ryemewe mu Rwanda ari igice cya Hon. Christine Mukabunani kuri ubu ubarizwa mu Nteko Ishinga Amategeko y’u Rwanda.

Hirengagijwe ibi, Me Bernard Ntaganda muri iri tangazo ryashyizwe ahagaragara mu cyumweru gishize yavuze ko aba avuga biyitirira ishyaka bashaka kubagira igitambo. Ati: “Rimaze kubona ko hari abiyitirira Ishyaka PS Imberakuri bemeza ko bafatanyije n’imitwe ya gisirikare bagamije gusa kugira ibitambo abayobozi n’abarwanashyaka b’Ishyaka PS Imberakuri bari mu Rwanda; Ishyaka PS Imberakuri riramenyesha Abarwanashyaka baryo,Impirimbanyi zose ndetse n’Amahanga ibikurikira”:

Icya mbere nuko ngo Ishyaka PS Imberakuri ari Ishyaka ritavuga rumwe na Leta ya Kigali ryemewe na Leta y’u Rwanda kuva mu mwaka wa 2009 bityo rikaba rihirimbanira impinduka mu Rwanda binyuze mu nzira y’amahoro.

Icya kabiri, ngo Ishyaka PS Imberakuri rikora imirimo ya politiki ryisunze itegeko ry’u Rwanda rigenga Imitwe ya Politiki n’Abanyapolitiki bityo inzego z’Ishyaka PS Imberakuri zifata ibyemezo zikorera mu Rwanda bishingiye ku Itegeko Nshingiro ryaryo ryemejwe hisunzwe Itegeko rigenga Imitwe ya Politiki n’Abanyapolitiki.

Icya gatatu, Ishyaka PS Imberakuri ryamaganye abakomeje kuryiyitirira bemeza ko bafatanyije n’imitwe ya gisirikare ikorera mu Karere u Rwanda ruherereyemo n’abandi bose basinya amatangazo mu izina ry’ubuyobozi bwa PS Imberakuri kuko ibyo bakora binyuranyije n’amategeko yavuzwe haruguru .

Icya kane, Ishyaka PS Imberakuri ryibukije abo baryiyitirira rivuga ko bigaragara ko bagamije gusa kugira intama itangwaho igitambo abayobozi  n’abarwanashyaka b’Ishyaka PS Imberakuri kuko batitaye namba ku kaga ibikorwa byabo bishobora gukururira abayoboke ba PS Imberakuri baba mu Rwanda.Ibyo bakora mu izina ry’Ishyaka PS Imberakuri bikaba ngo nta shingiro bifite bityo bakaba bagomba kwamaganwa n’abarwanashyaka bose ba PS Imberakuri ndetse n’amahanga.

Icya gatanu ari nacyo cya nyuma, Ishyaka PS Imberakuri ryaboneyeho gusaba Leta y’u Rwanda kwemera kugirana imishyikirano n’abatavugarumwe nayo bari mu Rwanda ndetse no mu mahanga.Rikaba kandi risaba amahanga guhatira Leta y’u Rwanda kwemera ibyo biganiro nk’uko yabihatiye ibindi bihugu byo mu Karere kuko kutabikora bifatwa nko gukundwakaza Leta y’u Rwanda cyangwa kwigira nyoninyinshi.

P5 ni urugaga rw’amashyaka n’imitwe ya politiki irwanya ubutegetsi bw’u Rwanda yiganjemo akorera hanze y’igihugu ari yo; AMAHORO-PC, FDU – INKINGI, PDP – IMANZI, PS – IMBERAKURI n’ IHURIRO NYARWANDA (RNC).

Mu kiganiro aherutse kugirana n’umunyamakuru wa Bwiza.com ariko, Me Bernard Ntaganda yahakanye ko ishyaka rye riba muri iri huriro rya P5 nyuma yo kubazwa ku ibaruwa iri huriro ryanditse risaba gushyikirana na Leta y’u Rwanda. Icyo gihe yagize ati: “Ndakumenyesha ko PS Imberakuri ivugwa muri iyo baruwa ya P5 ntayizi.

Yakomeje agira ati: “Nanjye nyumva gutyo mu itangazamakuru n’ikimenyimenyi nta mukono wanjye uriho! Ubwo rero PS Imberakuri ivugwamo sinyizi.”

Impuguke z’umuryango w’abibumbye kuri Republika ya Demokrasi ya Congo ziherutse gusohora raporo ivuga ko mu burasirazuba bw’icyo gihugu hari imitwe y’abitwaje intwaro irimo abanyamahanga.

Mu mitwe ivugwa harimo ihuriro nyarwanda RNC riyobowe na Kayumba Nyamwasa, ryiyemeje kurwanya ubutegetsi bw’u Rwanda.

Impuguke za Loni zivuga ko abahoze muri uwo mutwe bazibwiye ko uwo mutwe urimo abarwanyi b’abanyamahanga biganjemo abanyarwanda n’Abanyekongo b’Abanyamulenge ugamije kubohoza u Rwanda.

Izi mpuguke zivuga kandi ko zavuganye n’abantu bagera kuri 12 bahoze muri uwo mutwe uzwi ku mazina nka P5, Rwanda National Congress cyangwa umutwe wa Kayumba Nyamwasa.

Icyo cyegeranyo k’impuguke za ONU kikavuga ko abarwanyi bahoze muri uwo mutwe bazibwiye ko ubona abarwanyi ba P5 bahabwa intwaro n’imfashanyo zirimo inkweto n’imiti bivuye i Burundi kandi ko abarwanyi bashya banyura muri icyo gihugu.

Izindi wakunda

Bwiza.com
error: Alert: Ntabwo byemewe!!