bwiza.com
Ahabanza » Uganda: Umunani barimo ufite ipeti rya Colonel bashinjwe gucyura ku ngufu impunzi z’Abanyarwanda
Amakuru Politiki

Uganda: Umunani barimo ufite ipeti rya Colonel bashinjwe gucyura ku ngufu impunzi z’Abanyarwanda

Abantu umunani bo mu nzego z’umutekano za Uganda kuri uyu wa gatatu bashinjwe icyaha cyo gushimuta no gucyura mu buryo bunyuranyije n’amategeko Umunyarwanda washakaga ubuhungiro muri iki gihugu wahoze mu mutwe ushinzwe kurinda umukuru w’igihugu mu Rwanda nk’uko byatangajwe n’ubushinjacyaha kuri uyu wa Gatatu.

Abo bantu umunani barimo Atwooki Ndahura ufite ipeti rya Colonel n’abapolisi barindwi, bakekwaho kugira uruhare mu gusubiza mu Rwanda ku ngufu Lt Joel Mutabazi, wahoze mu mutwe ushinzwe kurinda umukuru w’igihugu, n’umuvandimwe we Jackson Karemera mu 2013.

Aba uko ari babairi bari bahawe ubuhungiro muri Uganda, bituma Human Rights Watch icyo gihe ishinja Uganda kunanirwa kurinda impunzi ngo yari mu kaga ko kugirirwa nabi mu gihugu cyayo.

Mu kiganiro na AFP, Umushinjacyaha wa gisirikare, Major Raphael Magezi yemeje ibi agira ati: “Aba ofisiye umunani, umwe w’umwofisiye w’umusirikare n’abofisiye barindwi ba polisi bageze imbere y’Urukiko Rukuru rwa gisirikare bashinjwa gushimuta no gucyura Abanyarwanda basabaga ubuhungiro nta burenganzira.”

Aba batawe muri yombi muri kamena 2018, bose bagejejwe imbere y’urukiko kuri uyu wa Kabiri ushize.

Nyuma yo kugezwa mu Rwanda, mu 2014 Joel Mutabazi yahamijwe ibyaha 8 birimo iby’iterabwoba no kugambirira kugirira nabi umukuru w’igihugu ahanishwa igifungo cya burundu no kwamburwa impeta za gisirikare, mu gihe murumuna we Karemera yaburiwe irengero nyuma yo kumuhanaguraho ibyaha mu 2015.

Izindi wakunda

Bwiza.com