bwiza.com
Ahabanza » Cristiano Ronaldo ntiyorohewe ku bw’ibirego by’ubusambanyi ashinjwa
Amakuru Imikino

Cristiano Ronaldo ntiyorohewe ku bw’ibirego by’ubusambanyi ashinjwa

Polisi yo muri Las Vegas muri Leta Zunze Ubumwe za Amerika yasohoye inyandiko isaba ko icyamamare muri ruhago, Cristiano Ronaldo akorerwa ibizamini bya ADN mu gukora iperereza ku byaha by’ihohotera rishingiye ku gitsina ashinjwa.

Uwunganira Ronaldo mu by’amategeko, Peter S. Christiansen yatangaje ko ibyo umukiriya we ashinjwa ari ibisanzwe. Ikinyamakuru Wall Street Journal gitangaza ko izi mpapuro zisaba ko Ronaldo apimwa zoherejwe mu Butaliyani, aho uyu mukinnyi asigaye akina mu ikipe ya Juventus.

Christiansen yagize ati “Bwana Ronaldo yakomeje kuvuga ko ibyabaye mu 2009 i Las Vegas byakozwe mu bwumvikane busanzwe, kuri ibyo rero ntawatangara ko hakozwe ibizamini bya ADN, ko n’igipolisi cyayisaba mu iperereza”.

Umwaka ushize nibwo umukobwa witwa Kathryn Mayorga yatangaje ko Cristiano Ronaldo yamufashe ku ngufu bari muri Hoteli y’i Las Vegas mu mwaka wa 2009 ndetse ko yamuhaye amafaranga angana na $375,000, kugira ngo azakomere ku ibanga.

C.Ronaldo w’imyaka 33 y’amavuko ukinira ikipe ya Juventus yo mu Butaliyani, yahakanye ibi ashinjwa avuga ko ari ababa bagamije kwamamara baciye ku izina rye.

Ku wa 13 Kamena 2009, ngo nibwo Ronaldo yabonanye na Kathryn Mayorga mu kabyiniro ‘Rain nightclub’ kari muri hoteli ‘Palms Hotel and Casino, umukobwa akavuga ko yasambanyije atabishaka mu cyumba cy’iyi hoteri. Ronaldo akaba abihakana.

 

Izindi wakunda

Bwiza.com