bwiza.com
Ahabanza » Iby’ingenzi bikubiye mu gitabo ku Mateka ya Jenoside yakorewe Abatutsi mu Ruhengeri
Amakuru Featured Politiki

Iby’ingenzi bikubiye mu gitabo ku Mateka ya Jenoside yakorewe Abatutsi mu Ruhengeri

Kuri uyu wa Kane, itariki 10 Mutarama 2019, hamuritswe ibitabo bya Komisiyo y’Igihugu yo Kurwanya Jenoside (CNLG) by’ubuhamya n’amateka ya Jenoside yakorewe Abatutsi mu yahoze ari Perefegitura ya Ruhengeri bigaragaza uko yatangiye gutegurwa kugeza ishyizwe mu bikorwa.

Kimwe muri ibi bitabo kitwa Amateka ya Jenoside yakorewe Abatutsi mu yahoze ari Perefegitura ya Ruhengeri cyanditswe na Mafeza Faustin afatanyije na Nikuze Donatien kigizwe n’ibice bitanu.

Mafeza Faustin asobanura ibikubiye mu gitabo

Icya mbere kivuga ku mibereho y’Abatutsi mu yahoze ari Perefegitura ya Ruhengeri usangamo Intandaro y’ibikorwa by’urugomo n’ubwicanyi byakorewe Abatutsi mu 1959 mu yahoze ari Perefegitura ya Ruhengeri, Gucira Abatutsi mu Bugesera, Kubarura no kugurisha imitungo y’Abatutsi bamene- shejwe mu 1959, Ibikorwa by’Urugomo n’ubwicanyi bwakorewe Abatutsi mu gihe cy’Ubutegetsi bwa Perezida Kayibanda Grégoire, Kwirukana Abatutsi mu mashuri no mu kazi ka Leta mu 1973 mu yahoze ari Perefegitura ya Ruhengeri n’ibindi.

Igice cya kabiri kivuga ibikorwa by’urugomo n’ubwicanyi byakorewe abatutsi hagati ya 1990 na 1993, usangamo Ibikorwa by’urugomo n’ubwicanyi byakorewe Abatutsi mu yahoze ari Perefegitura ya Ruhengeri, Gufunga no kwica Abatutsi babita ibyitso by’Inkotanyi mu zahoze ari komini zigize Ruhengeri nka Nkuli, Kigombe, Mukingo, Kidaho n’ahandi. Usangamo kandi uko imitungo y’Abatutsi yanyazwe bababeshyera gukorana n’Inkotanyi, ndetse n’uko Abatutsi bagiye bicwa binyuze mu marondo, Akarengane kagiriwe abanyeshuri b’Abatutsi nyuma y’igitero cyo kuya 8 Gashyantare 1993 mu yahoze ari Komini Kigombe n’ibindi biteye amatsiko ku muntu waba atazi neza aya mateka.

Igice cya gatatu cy’iki gitabo kivuga uburyo bwakoreshejwe mu gutegura Jenoside yakorewe Abatutsi mu yahoze ari Perefegitura ya Ruhengeri usangamo ukuntu urwango n’amacakubiri byakangurirwaga abantu mu nama, Inama ya Perezida wa Repubulika yo kuwa 15 Ugushyingo 1992, Inama zakoreshejwe na Nzirorera Joseph zitegura Jenoside, Gutegura lisiti y’Abatutsi bagomba kwicwa, Gushyiraho imitwe yitwara gisirikare mu yahoze ari Perefegitura ya Ruhengeri nk’umutwe wiswe Amahindure, uwiswe Virunga Force, Gashagari n’indi ndetse n’uko yagiye yigishwa ndetse igahabwa imbunda.

Imwe mu mabaruwa usanga muri iki gitabo yagiye yandikwa n’abayobozi basaba imbunda cyangwa basaba kuziga

Igice cya kane kivuga ku ishyirwa mu bikorwa rya Jenoside yakorewe Abatutsi mu 1994 mu yahoze ari Perefegitura ya Ruhengeri usangamo; Ishyirwa mu bikorwa rya Jenoside yakorewe Abatutsi mu yahoze ari Komini Nkuli, Abatutsi biciwe mu rusengero rw’Abadiventisiti b’umunsi wa Karindwi rwa Hesha, Abatutsi biciwe kuri bariyeri yari hafi y’ikigo cya Gisirikare cya Mukamira, Abatutsi biciwe muri Segiteri Busogo, Abatutsi biciwe kuri bariyeri yari yashyizwe imbere ya Komini Mukingo n’ahitwa ku IJITE, aho iyo usomye ugenda ubona uko ibi byagiye bikorwa komini ku yindi.

Igice cya gatanu ari nacyo cya nyuma kivuga Ingaruka za Jenoside n’imibanire y’Abanyarwanda nyuma ya Jenoside yakorewe Abatutsi.

Abanditse iki gitabo bavuga ko kigamije kwerekana no gusobanura imibanire y’abaturage bari batuye mu yahoze ari Perefegitura ya Ruhengeri mbere ya 1959; Kugaragaza ibikorwa by’ivangura, urugomo n’ubwicanyi bwakorewe Abatutsi mu gihe cy’ubutegetsi bwa Perezida Kayibanda mu yahoze ari Perefegitura ya Ruhengeri, Kugaragaza imibereho y’Abatutsi kuva Perezida Habyarimana Juvénal akoze coup- d’Etat mu 1973 kugeza mu Kwakira 1990, Kugaragaza no kwerekana ibikorwa by’urugomo n’ubwicanyi bwakorewe Abatutsi hagati ya 1990 na 1993, Kwerekana uburyo bwakoreshejwe mu gutegura Jenoside yakorewe Abatutsi mu yahoze ari Perefegitura ya Ruhengeri;  Kwerekana uko Jenoside yakorewe Abatutsi yashyizwe mu bikorwa mu yahoze ari Perefegitura ya Ruhengeri; Kugaragaza ingaruka za Jenoside mu yahoze ari Perefegitura ya Ruhengeri, no Kwerekana uko imibanire y’abaturage imeze nyuma ya Jenoside yakorewe Abatutsi mu 1994.

Ubushakashatsi ku mateka ya Jenoside yakorewe Abatutsi mu yahoze ari Perefegitura ya Ruhengeri bwakorewe mu Turere tune aritwo: Musanze, Nyabihu, Gakenke na Burera. Uturere twavuzwe haruguru nitwo twasimbuye Amakomini 16 yari agize Perefegitura ya Ruhengeri, ariyo: Kigombe, Kidaho, Kinigi, Mukingo, Nkuli, Nkumba, Nyakinama, Nyamutera, Ruhondo, Gatonde, Cyabingo, Ndusu, Nyarutovu, Cyeru, Butaro na Nyamugali.

Kugira ngo haboneke amakuru ajyanye n’intego z’ubushakashatsi, abashakashatsi bagiranye ibiganiro byimbitse (In-deph Interview) n’abatangabuhamya 108 batuye mu zahoze ari Komini zabarizwaga mu yahoze ari Perefegitura ya Ruhengeri.

Muri iki gihe, ubushakashatsi bukorwa na CNLG buribanda ku kwandika amateka ya Jenoside yakorewe Abatutsi mu zahoze ari Perefegitura mu 1994, hagaragazwa ibimenyetso byerekana itegurwa n’ishyirwa mu bikorwa rya Jenoside yakorewe Abatutsi n’ingaruka zayo ku gihugu muri rusange, no ku bacitse ku icumu by’umwihariko.

Ubu bushakashatsi ku mateka ya jenoside mu yahoze ari Perefegitura ya Ruhengeri buje busanga ubwakozwe ku yahoze ari Perefegitura ya Gisenyi bukazakomereza n’ahandi. Mu kiganiro n’itangazamakuru Umunyamabanga Mukuru wa Komisiyo y’Igihugu yo Kurwanya Jenoside, Dr Bizimana Jean Damascene yavuze ko ubu bushakashatsi bukorwa bufasha kubika amateka kugirango azagirire akamaro abatarayamenye nk’urubyiruko n’abatazi amateka y’u Rwanda ndetse n’Abanyamahanga.

Ku kijyanye n’imbogamizi bajya bahura nazo mu gutegura ubu bushakashatsi, Dr Bizimana avuga ko bajya bagira ikibazo cy’abantu baba badashaka gutanga ubuhamya cyane cyane nk’abakorewe ibyaha n’abahoze mu nzego z’ubuyobozi gusa ngo hari n’abemera gutanga ubuhamya.

Usibye iki gitabo, hanamuritswe ibitabo bibiri by’ubuhamya bwatanzwe n’abarokotse mu gihe cyo kwibuka ku nshuro ya 22 no ku nshuro ya 23 Jenoside yakorewe Abatutsi.

Izindi wakunda

Bwiza.com