bwiza.com
Ahabanza » RDC: U Bufaransa bwahinduye imvugo ku ntsinzi ya Tshisekedi bwabanje kwamagana
Amakuru Politiki

RDC: U Bufaransa bwahinduye imvugo ku ntsinzi ya Tshisekedi bwabanje kwamagana

Nyuma y’aho igihugu cy’u Bufaransa cyari cyabanje kwamagana ibyavuye mu matora by’ibanze muri Repubulika iharanira Demokarasi ya Congo, kuri ubu iki gihugu cyahinduye imvugo gisaba abifuza kwamagana ibi bakoresheje inzira ziteganywa n’amategeko.

Nyuma y’aho Komisiyo y’amatora muri Congo itangarije ko Felix Tshisekedi ari we watsinze amatora, u Bufaransa bwahise busohora itangazo ryamagana ibyatangajwe n’iyi komisiyo.

Mu kiganiro cyanyuze kuri televiziyo CNEWS mu gitondo cyo kuwa Kane, minisitiri w’ububanyi n’amahanga w’u Bufaransa, Jean-Yves Le Drian yavuze ko ibyavuye mu matora y’umukuru w’igihugu byatangajwe kuwa Gatatu bidahuye kandi ko umukandida Martin Fayulu ari we mu by’ukuri watsinze.

Ibi ntibyakiriwe neza n’abayobozi ba Congo. Minisitiri w’itangazamakuru akaba n’umuvugizi wa guverinoma, Lambert Mende akaba yabifashe nk’imyitwarire ya gikoloni kuri Guverinoma y’u Bufaransa.

Ku mugoroba wo kuri uyu wa Kane ariko, u Bufaransa bwaje guhindura imvugo mu itangazo bwasohoye.

Itangazo riragira riti: “Dutegereje amahitamo ya demokarasi y’Abanyekongo yubahwa. Niba abakandida mu matora ya perezida bifuza kwamagana ibyavuye mu matora by’agateganyo no kurushaho gusobanukirwa birakwiye ko babikora mu nzira ziteganywa n’amategeko.”

Kuri uyu wa Gatatu, itariki 09 Mutarama, nibwo Kimisiyo y’igihugu y’amatora ya Congo yatangaje ko ibyavuye mu matora by’agateganyo bigaragaza ko Felix Tshisekedi ari we watsinze amatora ku majwi 38,57% kuri 34,8% Martin Fayulu umukurikira yabonye. Uyu mukandida Fayulu nawe akaba adakozwa ibyo kuba yaratsinzwe.

 

Izindi wakunda

Bwiza.com