bwiza.com
Ahabanza » Ubuhamya burambuye ku buzima bugoye Abatutsi baciriwe mu Bugesera banyuzemo
Amakuru Politiki

Ubuhamya burambuye ku buzima bugoye Abatutsi baciriwe mu Bugesera banyuzemo

Mu 1959, Abatutsi batabashije guhungira mu bindi bihugu nka Uganda, Congo, Uburundi na Tanzaniya, bakusanyirijwe ahantu hatandukanye babacira mu gace ka Bugesera aho bahuriye n’ubuzima bukakaye.

Mu yahoze ari Komini Cyeru, nyuma yo gutwikira Abatutsi, bahungiye kuri Paruwasi Gatorika ya Nemba aho imodoka zabavanye zibatwara mu Bugesera. Umwe mu batwawe bakuwe kuri Paruwasi Gatorika ya Nemba asobanura ko: “Nyuma yo gutwikirwa ku itariki ya 7 Ugushingo 1959, bwarakeye mu gitondo tubona imodoka kuri centrale ya Kanaba, aba misiyoneri batujyana kuri Paruwasi ya Nemba. Nyuma y’igihe gito batuzaniye amakamyo aba ariyo atujyana mu Bugesera.

Undi mutangabuhamya nawe avuga ko: “Mu gace twari dutuyemo, twatangiye kumeneshwa mu kwezi kw’Ugushyingo 1959. Bigitangira, Abatutsi bakusanyirijwe muri camp ya transit ahabarizwa SOPIRWA, niho twabanje gucumbika. Twahageze turi bake nyuma y’iminsi mike abandi bagenda biyongera. Tumaze kuba benshi, bamwe bahise berekeza muri Zayire aho babaga bagiye gukora muri za Mine. Abatarabashije kwerekeza muri Zayire baciriwe i Nyamata mu Bugesera ahagana mu kwezi kwa Mutarama 1960”.

Usibye kuri Paruwasi ya Nemba na SOPIRWA, Abatutsi bakusanyirizwaga ahantu hatandukanye cyane cyane kuri za Paruwasi za Kiliziya Gaturika akaba ariho bapakirwa mu makamyo yabaga yazanywe n’Administrateur wa Teritwari ya Ruhengeri, Deman. Ibi bikaba bigaragaza ubufatanye bwari hagati ya Kiliziya Gatorika n’abakoloni.

Abatutsi bameneshejwe bakajyanwa mu Bugesera, basohoreye mu nkambi zari zateguwe. Hari inkambi ebyiri: “Ruhengeri na “Kibari”. Inkambi ya Ruhengeri yajyagamo Abatutsi baturutse mu duce tugize Perefegitura ya Ruhengeri, ni ukuvuga abaturutse muri sheferi ya Buhoma-Rwankeli. Naho inkambi ya Kibari yajyagamo Abatutsi baturutse mu duce twa Gakenke na Byumba kubera ko ubusanzwe bahitaga “Kibari”.

Abatutsi bamaze kugezwa mu Bugesera, basanze mu gace ka Nyamata hari ishyamba, hameze nabi cyane. Kubera ko wari umugambi wateguwe, bahasanze ibibandahori bisakajwe amabati agabanijwemo utwumba twinshi, bayinjizwamo ku gahato, bayatuzwamo. Babaye muri ubwo buzima mu buryo bugoranye. Umuzungu witwaga TRIPORO wabaga i Nyamata, niwe wabagezagaho ubufasha muri iyo nkambi.

Bageze i Nyamata ubuzima bwarabagoye cyane. Umwe mu batangabuhamya avuga uko byabagendekeye: “Kubera imiterere ya Bugesera itandukanye cyane n’akarere twari duturutsemo, imibereho yaje kutugora cyane. Twahasanze indwara ya Typhoide, yica Abatutsi benshi cyane. Hari ivuriro rito cyane ku buryo ritari gushobora kwita ku barwayi bose barigannye. Ubwo ariko twaje kubaka hangari z’ibyatsi, harwariramo bamwe, gusa ntibyabujije Abatutsi gukomeza gupfa ari benshi”.

Muri ubwo buzima, Abatutsi bumvaga ko ari ibintu bitazamara igihe, ko bazasubizwa iwabo, bagasubira mu byabo. Ariko siko byaje kugenda. Nyuma y’iminsi mike abayobozi baje kubabwira ko inkambi zigomba kuvaho, abantu bakajya gutura muri peyizana. Abantu batangiye batabyumva, barabyanga, kuko bumvaga nta mpamvu yo kuguma mu Bugesera ko bagomba gusubira iwabo.

Ubwo nibwo haje gukoreshwa andi mayeri, abayobozi b’icyo gihe bafata umwanzuro wo kubima ibyo kurya, bavuga ko bazongera gutanga ibyo kurya ku bantu bagiye muri peyizana. Babonye ko bashobora kwicwa n’inzara, baje kwemera, bava mu nkambi, berekeza mu biturage, batuzwa mu byitwaga peyizana. Muri ubwo buzima butoroshye, abaturutse hamwe bakomeje kwisungana, ku buryo wasangaga aho bagiye gutura bahita amazina asa n’ay’aho baturutse.

Mu gushaka kumenya impamvu ubuyobozi bw’abakoloni bwaciriye Abatutsi mu Bugesera, umwe mu batangabuhamya utarahigwaga wagizwe sushefu mu yahoze ari Komini Nkumba, nyuma yo kuvanaho sushefu wari uhari, asobanura ko: “Abakoloni bacira Abatutsi mu Bugesera bwari uburyo bwo kubica ariko bitagaragariye amahanga, bakicwa n’ubuzima bubi bari bajyanywemo. Ikindi na none kwari ukugira ngo ubutaka bwari ubwa Abatutsi buhabwe Abahutu kuko ngo aribo bageze mu Rwanda mbere, bityo, Abatutsi nabo bahange ahabo”.

Umutangabuhamya wavuzwe haruguru wabaye na Burugumesitiri wa Komini Nkumba kuva 1963 kugeza 1976, avuga ko nyuma yo gutwikira Abatutsi no kubamenesha, yatumweho na Administrateur wa Teritwari ya Ruhengeri witwa Deman kuza gufata ibaruwa imugira sushefu by’agateganyo mu gihe cy’amezi atandatu. Ubwo bamusabye ko yazajya kureba sushefu wayoboraga agace ka Burera witwa Mwikarago wari warameneshejwe akamuha ibitabo abaturage basoreragamo.

Yagiye kureba Sushefu Mwikarago amushyikiriza agapapuro abazungu bamuhaye, sushefu nawe amuha ibyo basabye.

Mu rwego rwo kurushago kumenya icyari cyihishe inyuma bamenesha Abatutsi no kubacira mu Bugesera, undi mutangabuhamya nawe abisobanura muri aya magambo: “Ibi byose byari mu mugambi wa PARMEHUTU yarimo ishaka ubutegetsi ifatanyije n’Ababirigi. Ababirigibashatse gukoramuRwanda ibyo bafite iwabo. Barebeye u Rwanda mu ishusho y’Igihugu cyabo, bashatse gukora igisa na Tutsi-land na Hutu-land, ngo bamwe bajye mu gice kimwe abandi bajye mu kindi. Jenoside ikirangira, icyo gitekerezo cyaragarutse cyo kuvuga ko Abahutu n’Abatutsi babatandukanya, bamwe bagatuzwa mu gace kabo. Ibyo n’ibikekerezo bishingiye ku bukoroni bw’Ababirigi”.

Gucira Abatutsi mu Bugesera kwari ukugira ngo bazicwe n’ubuzima bubi, kubera ko abakoloni batashatse kubica kumugaragaro. Ikindi abatangauhamya bavuga ni uko abakoloni bari bumvishije aba PARMEHUTU ko Abatutsi baje basanga Abahutu mu gihugu, ko ubutaka batunze bwari ubw’ Abahutu. Kubera iyo mpamvu bagombaga kububaka, bakajya guhanga ubwabo ahantu babonaga ko ubuzima bwaho bugoranye, bashobora no kuhasiga ubuzima.

Mu 1961, Su-Perefe witwaga NTAMUSHOBORA Pierre, yongeye gupakira Abatutsi bari barasigaye, nabo babacira mu Bugesera. Ibyo byabaye nyuma y’amatora ya Kamarampaka ku itariki 28 Mutarama 1961. Abatutsi batatoye ibyo abarwanashyaka ba PARMEHUTU bashakaga, baratotejwe, barameneshwa, bahungira muri Zayire na Uganda, abandi babajyana mu Bugesera. Icyo gihe Abatutsi benshi barababeshyeye bavuga ko batoye ubwami aho gutora Repubulika, babona impamvu yo kubamenesha.

Kuva mu 1959 himakajwe ingengabitekerezo y’ivangura n’amacakubiri bikozwe n’abarwanashyaka ba PARMEHUTU, hashimangirwa inyigisho mbi zo kwanganisha Abanyarwanda, bavuga ko Umututsi ari umugome, ko ari inzoka, ibyo byose biza kuba inyigisho zo mu mashuri n’ahandi hatandukanye mu miyoborere yakurikiye icyiswe Revolution Sociale yo mu 1959. Abatutsi bamaze kujyanwa mu Bugesera habayeho kugabana amasambu yabo. Abatarahunze babayeho mu buzima bwo guhezwa no gutotezwa.

Ibi ni bimwe mu bikubiye mu gitabo cyiswe “Amateka ya Jenoside yakorewe Abatutsi mu yahoze ari Perefegitura ya Ruhengeri” cyanditswe n’abashakashatsi  Mafeza Faustin, afatanyije na Nikuze Donatien cyamuritswe kuri uyu wa Kane, itariki 1Mutarama 2019.

Izindi wakunda

Bwiza.com
error: Alert: Ntabwo byemewe!!