bwiza.com
Ahabanza » Felix Tchisekedi yaba ahagaze ate muri Politiki? u Rwanda n’akarere byitege iki?
Featured Inkuru zicukumbuye Politiki

Felix Tchisekedi yaba ahagaze ate muri Politiki? u Rwanda n’akarere byitege iki?

Nyuma y’aho komisiyo y’amatora itangarije amajwi y’agateganyo y’uwatsinze amatora muri Repubulika iharanira Demokarasi ya Congo, abantu banyuranye bakomeje kwibaza ibibazo byinshi kuri uyu mugabo wari umukandida mu bari bahanganye n’umukandida wo mu ihuriro FCC ry’amashyaka ashyigikiwe na Perezida ucyuye igihe Joseph Kabila. Abantu bakaba bakomeje kwibaza byinshi ku bumenyi bwa Politike bwa Felix Tchisekedi, hibazwa icyakwitegwa mu mibanire n’akarere dore ko hasanzwe hari utuntu n’utundi cyane cyane mu burasirazuba bwa Congo bitewe n’imitwe yitwaje ibirwanisho yahagize indiri.

Félix Tchisekedi ni mwene Etienne Tchisekedi washinze ishyaka UDPS rikaba mu mateka yaryo ryarahanganye bikomeye n’ubutegetsi uko bwagiye busimburana muri Congo uhereye ku gihe cya Mobutu kugeza kuri Kabila, ntiribashe gutsinda amatora kugeza E. Tchisekedi yitabye Imana mu mwaka ushize, umurambo we ukaba waraheze mu mahanga.

Uwo munyapolitiki akimara kwitaba Imana ibikorwa by’ishyaka rye, UDPS, byarakomeje ariko rikajya risa n’iricikamo ibice kubera gupfa k’ umuyobozi waryo ari nabyo byatumye bamwe barivamo harimo uwari minisitiri w’intebe Samy Badibanga wamaze amezi make ku butegetsi.

Bamwe mu bayoboke b’iri shyaka bifuzaga ko umwana w’uwashinze iryo shyaka ariwe F. Tchisekedi yazungura se ku buyobozi bwaryo abandi bakavuga ko ataribyo kuko ishyaka atari umurage cyangwa gakondo. Abanengaga iby’uko umwana yasimbura se bavugaga ko umuhungu we adafite uburambe mu bya politiki, akaba nta bumenyi buhagije afite bwo kuyobora ishyaka rikomeye nk’iryo.

Muri aka kavuyo kabaye niho batanze icyuho maze Kabila abyuririraho abacamo ibice mu buryo bugaragara birangira ishyaka riyobowe na F. Tchisekedi abandi bayoboke bakomeye, Kabila abaha imirimo yo kuboshyoshya. Ibyo byabaye hegerejwe amatora y’umukuru w’igihugu na nyuma y’amasezerano ya St Sylvestre, yayobowe na Kiliziya Gaturika yerekeye uko igihugu cyagombaga kuyoborwa no gutegura amatora. Byaje kurangira kubera amacenga n’amayeri ya Kabila, ayo masezerano adashyizwe mu bikorwa. Mu myiteguro y’amatora yo ku wa 30/12/2018, opozisiyo ntiyabashije kumvikana icikamo ibice bigaragara ko bananiwe guharirana k’uwazaba umukandida umwe wahangana n’uwari watanzwe n’ihuriro FCC ryarimo na PPRD, ishyaka ryari ku butegetsi.

Uko gucikamo ibice byashegeshe bikomeye opozisiyo ku buryo byagaragaraga ko biha amahirwe igice Kabila yarimo, byashoboraga no gutuma umukandida yitangiye atsinda. Uko gucikamo ibice kwa opozisiyo byahaye amahirwe umukandida Fayulu w’ihuriro LAMUKA, kuko igice kinini cy’abaturage bafashe F.Tchisekedi nk’umugambanyi kuko abaturage byabonekaga ko barambiwe ubutegetsi bwa Kabila bavuga ko imyaka 17 yari amaze ku butegetsi ntacyo yabagejejeho. Bituma rero Fayulu abyungukiramo kuko abaturage bifuzaga impinduka.

Muri iyo nkubiri y’amatora mu gikorwa cyo kwiyamamaza mu ntara nibwo byagaragaye ko Fayulu ashyigikiwe kuko aho yacaga yakirwaga n’imbaga y’abamushyigikiye ugereranije na F.Tchisekedi ndetse na Shadary wari wanzwe bikomeye. Kabila abonye ko imibare yamupfanye kimwe na Tchisekedi, niko gushaka uko bapyinagaza Fayulu bashaka uko baburizamo itorwa rye.

Komisiyo y’amatora yahise ishyira mu kato ahari abayoboke benshi ba Fayulu, bagera kuri 1.200 000, babuzwa gutora kugira ngo bihe amahirwe Shadary. Mu ibarura ry’amajwi kimwe n’indorerezi za Kiliziya Gaturika, CENCO, byagaragaye ko Shadary yatsinzwe bikomeye ku buryo no kumwibira amajwi bitari gushoboka, nk’uko byemezwa n’umusesenguzi Louise Dewast, mu nyandiko ye ivuga kuri ayo matora, anashimangira ibyahwihwiswaga mu mbuga nkoranyambaga ko hariho ibiganiro mu ibanga hagati y’igice cya Tchisekedi/ Kamerhe ndetse na FCC/ Kabila.

Icyavuyemo n’ibyatangajwe ko Tchisekedi yatsinze amatora by’agateganyo. Ibi ni ya mikino ya politiki ikorwa kuko biboneka ko ibyo bice byombi bitiyunze ku bw’urukundo. Icya mbere nk’uko twabivuze hejuru no mu nkuru zacu zatambutse ni uko Kabila atashoboraga kwihanganira ihuriro ririmo abanzi be bakomeye nka Katumbi na Bemba bari inyuma ya Fayulu. Kabila arabahima akoze nka bya bindi ngo tura tugabane nibyanga bimeneke.

Icya kabiri kigaragara ni uko kumvikana hagati ya Tchisekedi na Kabila bafite ibyo bumvikanyeho kuko burya mu masezerano nkariya buri ruhande rwigomwa rukagira ibyo rutakaza ( loose) n’ibyo rwunguka ( win) bikabyara ibyo bita ” loose-win”. Aha rero abantu bashobora gukeka ko Kabila yaba yaremerewe kudakurikiranwa ku byaha yaba yarakoze, kurindirwa umutekano n’ibye byose, yemwe no kuba PPRD yabona imyanya mu Nteko ishingamategeko no mu yindi myanya nka guverinoma, Tchisekedi nawe kubera inyota y’ubutegetsi akemera guhabwa intebe y’umukuru w’igihugu.

Iyo niyo ndorerwamo umuntu yabonamo gutsinda kwa Tchisekedi, gutsindwa kwa Fayulu( niba umuntu yabyita gutsindwa) n’uruhare rukomeye Kabila yagize muri aya matora amera nk’uwikoreye military coup. Abantu nyuma y ‘ibyatangajwe ku bijyanye n’uwatsinze amatora bakomeje kubyibazaho no kutubaza byinshi bifuza kumenya ibya Tchisekedi birenze.

Bati ese uburambe bwe muri politiki bumeze bute, asanzwe abanye ate n’abakuru b’ibihugu byo mu karere, mu ruhando mpuzamahanga byo bite?

Kimwe ku kindi ntabwo twasubiza ibi bibazo usibye kuvuga ko nta burambe afite bwa politiki usibye kuba agiye kubwiga. Ntaho bigaragara cyangwa bizwi yaba yaragiranye umubonano n’umwe mu bantu bakomeye bo mu karere. Ku bundi bumenyi Tchisekedi yaba yibitseho ntibuzwi cyane kuko amashuli yamunaniye bikavugwa ndetse ko atize, afite diplome y’igicupuri yatanze muri Komisiyo y’amatora atanga candidature ye ngo yemererwe kwiyamamaza.

Uyu mugabo avuga ko yize mu Bubiligi, bo banaherutse kwemeza ko batamuzi kandi ko nta diplome bamuhaye. Iki kikaba ari ikibazo gishobora kumuhagama igihe yemejwe burundu nk’umukuru w’igihugu. Ibivugwa ko yaba yarakoze, ibizwi ni uko ari mu Bubiligi yacuruzaga ama pizza y’abandi kugira ngo abashe kubaho.

Gusa aramutse abaye umukuru w’igihugu byemejwe byatuma ashyingura se mu cyubahiro kuko umurambo we umaze umwaka urenga uri mu mahanga ukaba wari warahezeyo. Ngarutse ku matora nyirizina n’ibyatangajwe na CENI, hari abishimye birumvikana nk’abayoboke ba UDPS na bamwe bo muri FCC  n’abababaye kubera ko Fayulu atatambutse kubera icyo bita akagambane bagiriwe na Kabila na Tchisekedi. Ngo guhitamo kw’abaturage si ibintu bikorwaho imishyikirano.

Imibanire ya Tchisekedi n’u Rwanda n’akarere

Mu bindi abaturage batubajije ni imibanire ya Tchisekedi n’u Rwanda mu gihe kiri imbere n’aramuka atsinze burundu. Muri politiki nta mwanzi uhoraho hashyirwa imbere inyungu. Gusa umuntu ashobora kutemeza ko umubano wazazahurwa bitewe n‘umugabo Kamerhe wafashije bikomeye Tchisekedi kugeza ageze ku ntsinzi. Uyu mugabo Kamerhe muri kamere ye ntakunda Abanyarwanda kuko yabigaragaje kenshi ubwo yari Umunyambabanga Mukuru wa PPRD aho yahoraga atuka bikomeye u Rwanda n’Abanyarwanda. Iyo ngengabitekerezo ye rero itamuvuyemo akaba yanayanduza Tchisekedi.

Mu gihe habyinwa intsinzi muri UDPS, Umukandida Fayulu yamaze kwamagana ibyatangajwe, ahamagarira abayoboke be kutabyemera. Yahamagariye kandi Inama y’igihugu y’Abepisipikopi Gaturika muri Congo, CENCO, gutangaza ibyo biboneye kuko bari bafite indorerezi hirya no hino mu gihugu. Ibi na none bikaba bishimangirwa n’ibyatangajwe n’ibihugu bikomeye by’amahanga n’abandi bantu bakomeye ku isi basa n’abanenga ibyo gutsinda kwa Tchisekedi, birimo u Bufaransa n’u Bubiligi, igihugu cyakolonije Congo. Byaba bizagenda bite mu gihe kiri imbere? Ni ukubitega amaso igihe n’igihe!

Mu gihe rero Tchisekedi yaba yemejwe mu buryo ntakuka, umuntu yakwibaza uko imibanire ye yazamera mu bihugu bituranyi biherereye mu burasirazuba bwa Congo n’imiryango y’ubukungu Congo ibarizwamo nka SADC.

Mu by’ukuri ishyaka UDPS ryakoreye cyane imbere mu gihugu mu myaka irenga 35 ihangana n’ubutegetsi bwa Mobutu na Laurent Kabila, na Joseph Kabila. Ntaho bizwi aho iri shyaka ryaba ryaraguye amarembo rishaka gushyigikirwa cyangwa gufashwa n’ibihugu runaka cyangwa imiryango runaka. SADC bizwi ko mu bihe byashize yakunze gushyigikira Kabila mu kurwanya inyeshyamba mu burasirazuba bwa Congo byavugwaga ko zishyigikiwe n’u Rwanda na Uganda.

Ibintu byaje guhinduka kuva aho Kabila yerekeje amaso ye mu Bushinwa, kuko buriya intambara zibera Congo ahanini zishingira ku bukungu kurusha politiki. Ibihugu nka Africa y’Epfo, Zimbabwe na Angola bifite ijambo muri SADC byagaragaye cyane mu kwamagana politiki y’ubuyobozi bwa Kabila bitifuza ko yakomeza kugundira ubutegetsi. Ukaba wakwibaza ese Tchisekedi yazabasha kuzanzamura umubano usa n’uwazambye hagati ya Congo na SADC? Bishobora kuzamugora kubera kutagira uburambe muri politiki mpuzamahanga no kuba aboneka nk’uwashyizweho na Kabila.

Ngarutse ku bihugu byo mu karere ntazoroherwa keretse Kabila amuhuje na Tanzaniya nk’uwahakuriye ibihugu byombi bikaba byari bifitanye umubano mwiza. Naho ku Rwanda na Uganda naho ntibizamworohera kuko azengurutswe n’abanya politiki nka Kamerhe uzwiho kwanga urunuka Abanyarwanda n’abandi basa nkabo. Ikindi kibihamya ni uko usomye ibyo abayoboke ba UDPS bandika ku mbuga nkoranyambaga bavuga ko bagomba kwigaranzura Abanyarwanda babacengeyemo aha bakavuga Kabila n’abandi bayobozi bavuga Ikinyarwanda.

Ashobora kugwa muri uwo mutego rero wo kwanga abavuga Ikinyarwanda bityo bigatuma atagirana imibanire myiza n’u Rwanda. Uru rwango rugahera imbere mu gihugu cye, cyane ko azi neza ko abaturage bo mu burasirazuba bwa Congo batigeze bamutora. Gusa igihe Etienne Tchisekedi yiyamamazaga ahanganye na Kabila yavugiye muri mitingi i Goma ko nibamutora azubakira Abanyarwanda. Umuhungu we nawe birashoboka ko yazajya muri uwo murongo.

Uko byagenda kose nshingiye kuri ibyo byose maze kuvuga, Tchisekedi yazagira ubuyobozi bumugoye mu guhuza n’ibihugu byo mu karere kandi agendeye ku marangamutima yamugusha mu mutego watuma nawe ahora mu ntambara atazabasha gutsinda.

 

Munyakayanza Samuel

 

 

 

 

 

Izindi wakunda

Bwiza.com
error: Alert: Ntabwo byemewe!!