bwiza.com
Amakuru Politiki

RDC: Umukandida Martin Fayulu yiyemeje kwitabaza urukiko rurinda itegeko nshinga

Kuri uyu wa Gatanu, itariki 11 Mutarama, umukandida Martin Fayulu waje ku mwanya wa kabiri mu matora y’umukuru w’igihugu inyuma ya Felix Tshisekedi nk’uko ibyavuye mu matora by’ibanze bibivuga, yatangaje ko kuri uyu wa Gatandatu ageza mu rukiko rushinzwe kurinda itegeko nshinga ubusabe busaba gusubiramo ibarura ry’amajwi nyuma yo kutemera ko yatsinzwe.

Uruhande rwa Martin Fayulu ruvuga ko yatsinze amatora ku majwi 61%. Kuri uyu wa Gatanu I Kinshasa uyu mukandida w’ihuriro Lamuka yagize ati: “Tuzajya mu rukiko rurinda itegeko nshinga kuwa Gatandatu.. gusaba kongera kubara amajwi,”

Ibyavuye mu matora by’ibanze byatangajwe kuri uyu wa Gatatu ushize bivuga ko Felix Tshisekedi ari we uri imbere mu majwi n’amajwi 38,57%, mu gihe Martin Fayulu afite amajwi 34,8%.

Umukandida Emmanuel Ramazani Shadary wari uhagarariye ishyaka riri ku butegetsi ashyigikiwe na Perezida Kabila yaje ku mwanya wa gatatu n’amajwi 23,8%.

Iyi mibare ikaba yaratunguye abatari bacye kuko benshi bumvaga uzatsinda amatora azava hagati ya Fayulu na Shadary ariko babona Tshisekedi ari we uje imbere nubwo amajwi yose uko yakabaye atararangira kubarurwa.

Hagati aho biteganyijwe ko imibare ya nyuma ntakuka y’ibyavuye mu matora izatangazwa kuwa 15 Mutarama, mu gihe umukuru w’igihugu uzaba watsinze bidasubirwaho biteganyijwe ko azarahira kuwa 18 Mutarama hatagize igihinduka.

 

Izindi wakunda

Bwiza.com