bwiza.com
Ahabanza » Rwamagana: Abana bafite ibibazo by’imirire mibi no kugwingira bavuye kuri 664 bagera kuri 20
Amakuru Politiki

Rwamagana: Abana bafite ibibazo by’imirire mibi no kugwingira bavuye kuri 664 bagera kuri 20

Kuri uyu wa Gatanu tariki ya 11 Mutarama mu Karere ka Rwamagana hashojwe ubukanguramba bugamije kurandura imirire mibi  no kugwingira kw’abana.

Kuwa 20 Ukuboza 2018 nibwo hatangijwe icyiciro cya kane kiswe  Operation one one four hagamijwe gufasha abana 114 bari bafite ikibazo cy’imirire mibi no kugwingira. kugeza tariki 9 Mutarama abana 20 nibo bari bagifite ikibazo cy’imirire mibi,  17 bari mu ibara ry’umuhondo na 3 bari mu ibara ry’umutuku .

Ubuyobozi bw’akarere n’abafatanyabikorwa bako bifashije ubukangurambaga budasanzwe biyemeje kurandura burundu ikibazo cy’imirire no kugwingira kw’abana mu karere ka Rwamagana.

Minisitiri w’Uburinganire n’Iterambere ry’Umuryango, Solina Nyirahabimana nawe wiyemeje gufatanya n’Abanyarwamagana gufasha abana kuva mu kibazo cy’imirire mibi, yavuze ko leta yashyizeho ingamba zigamije kurwanya imirire mibi no kugwingira kw’abana.

Yagize ati: “Guverinoma yateganyije kongera imbaraga mu mashuri y’incuke ,gahunda y’imbonezamikurire y’abana yibanda cyane ku gukwirakwiza amarerero y’abana bato no kunoza imikorere yayo ,gukumira imirire mibi mu bana ,hashyizwe imbaraga n’umuhate hamwe twarandura burundu imirire mibi no kugwingira kw’abana bacu ,by’umwihariko ubuzima bw’umwana bugomba kwitabwaho kuva umwana agisamwa kugeza nibura ku myaka itandatu ,ariko bamwe mu babyeyi baradohotse ku nshingano zabo zo kuganira ku mirire n’imikurire y’abana ,kuboneza urubyaro ndetse n’amakimbirane mu muryango  ibyo byose bituma ababyeyi badashobora kubana n’abana babo bikaba intandaro y’imirire no kugwingira kw’abana.”

Minisitiri Nyirahabimana yishimiye umusaruro wavuye mu bukangurambaga bwiswe one one four bwari bugamije gukura mu kibazo cy’imirire mibi abana 114 bigatuma hasigara abana 20 gusa bagifite ikibazo cy’imirire mibi byatumye asaba Akarere ka Rwamagana kurandura imirire mibi kakaba ishuri ryigisha utundi turere kurandura imirire mibi no kugwingira kw’abana.

Aragira ati: “Ubukangurambaga mwakoze bwagize akamaro ku buryo mukwiye kubukomeza mukaba ishuri abandi bigiraho ku buryo uturere mwegeranye tubigiraho ndetse n’abandi nk’amajyepfo ,amajyaruguru ,iburengerazuba bose ku buryo babigiraho kuko uburyo bwakoreshejwe bwatumye hamenyekana ibibazo bihari bituma abana bagira ikibazo cy’imirire mibi no kugwingira.”

Abaturage nabo bavuga ko ubukangurambaga bugamije kurwanya imirire mibi no kwingira bwabagiriye akamaro bigatuma abana babo bagira ubuzima buzira umuze kandi bari bafite ibibazo by’imirire mibi.

Mu buhamya bwa Nyirakanyana Odette wari ufite umwana wahoze afite imirire mibi yavuze ko igikoni cy’umudugudu cyabagiriye akamaro cyane.

Aragira ati: “Mbere bataratwigisha abana bacu bari bafite ibibazo by’imirire mibi nkanjye umwana wanjye yari afite imyaka 2 afite ibiro 6 ariko kuva aho dutangiriye kwigishwa uko bateka indyo yuzuye byaradufashije cyane ku buryo ubu umwana wanjye yavuye mu ibara ry’umuhondo ari mu ibara ry’icyatsi kibisi, yavuye ku biro 6 agera ku biro 18 bitewe nuko twamenye guteka indyo yuzuye kandi abayobozi n’abajyanama b’ubuzima bagakomeza gukurikirana uko imibereho y’abana bafite ikibazo cy’imirire mibi ,ubu twakoze amatsinda adufasha kwiteza imbere kuburyo nta kibazo cy’imirire kizongera kugaragara mu mudugudu wacu.”

 

Izindi wakunda

Bwiza.com
error: Alert: Ntabwo byemewe!!