bwiza.com
Ahabanza » Gisagara: Umumotari yafashwe agerageza gutanga ruswa
Amakuru Politiki

Gisagara: Umumotari yafashwe agerageza gutanga ruswa

Umumotari wo mu karere ka Gisagara mu murenge wa Save yafashwe agerageza guha ruswa y’amafaranga ibihumbi bitanu (5000 frw) umupolisi kugirango yo guhanirwa amakosa yafatiwemo.

Kuri uyu wa 11 Mutarama nibwo uyu mu motari yafatiwe mu bikorwa  byo kurwanya abatwara ibinyabiziga badafite ibyangombwa kuko ahanini usanga aribo batubahiriza amategeko y’umuhanda bityo bigateza impanuka zitwara ubuzima bwa benshi.

Umuvugizi wa Polisi mu Ntara y’Amajyepfo, Chief Inspector of Police (CIP) Bonaventure Karekezi yavuze ko uyu mu motari yafashwe adafite uruhushya rwo gutwara moto agashaka gutanga ruswa.

Yagize ati” Uyu mu motari yatswe ibyangombwa yerekana contravention yandikiwe ku wa 2/07/2017 atigeze yishyura, abajijwe impamvu atishyuye ashaka gutanga ruswa.”

CIP Karekezi akomeza avuga ko aho kugirango uyu mu motari agaragaze impamvu atishyuye  contravention yandikiwe mu gihe cy’imyaka ibiri ishize yahisemo kwegera umupolisi akamupfumbatisha amafaranga ibihumbi bitanu (5,000frw)” ku girango amureke akomeze urugendo.

CIP Karekezi yibukije ko ruswa ari icyaha gihanwa n’amategeko kuko imunga ubukungu bw’igihugu ikanagira ingaruka haba kuwa yitanze ndetse no  kuwa yakiriye bityo ko buri wese asabwe kuyirwanya.

Yagize ati” Ruswa idindiza iterambere ry’igihugu. Kuko aho yashinze imizi, abantu bamwe bahabwa serivisi ku buryo bunyuranyije n’amategeko , abandi bagatanga ikiguzi kugira ngo bayihabwe kandi kuyihabwa ari uburenganzira bwabo.”

Yasabye abaturage muri rusange kwirinda gutanga no kwakira ruswa dore ko yagiye mu byaha bidasaza kandi n’ibihano byayo byiyongereye, abasaba kujya batanga amakuru ku gihe ku kintu cyose kinyuranyije n’amategeko.

Itegeko rihana ruswa mungingo yaryo ya 4 riteganya ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu (5) ariko kitarenze imyaka irindwi (7) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’indonke yatse cyangwa yakiriye.

 

Izindi wakunda

Bwiza.com