bwiza.com
Ahabanza » Burundi: Perezida Nkurunziza yagabiye inka abaminisitiri 13
Amakuru Politiki

Burundi: Perezida Nkurunziza yagabiye inka abaminisitiri 13

Perezida w’u Burundi, Pierre Nkurunziza, mu mpera z’icyumweru gishize ahitwa Buye, muri Komini Mwumba, mu Ntara ya Ngozi, yagabiye inka abaminisitiri 13 bo muri Guverinoma ye, asobanura kko biri mu rwego rwo kongerera imbaraga umuco mwiza wo guhana impano wahoze uranga Abarundi.

Mu izina rya bagenzi be 13 bahawe inka, minisitiri w’imirimo ya leta n’umurimo yashimiye umukuru w’igihugu kubw’iyo mpano anamwifuriza umwaka mushya muhire wa 2019 n’umuryango we.

Yasezeranyije ko bazarinda izi nka neza kugirango nabo bazasaranganye na bagenzi babo, inshuti n’imiryango.

Mu ijambo rye nk’uko iyi nkuru dukesha Radio na Televiziyo by’u Burundi (RTNB), Perezida Nkurunziza yavuze ko iyo mpano yatanze yaturutse mu mpano zitandukanye abaturage b’u Burundi bagiye bamuha aho yabaga yabasuye mu 2018.

Yongeyeho ko yakoze iki kimenyetso kuko umwaka ushize wa 2018 waranzwe n’ubwumvikane n’ubufatanye mu bagize guverinoma y’u Burundi, akaba ari mu rwego rwo kubereka ko abashimira abikuye ku mutima.

Perezida Nkurunziza akaba yasabye aba baminisitiri gutera ikirenge mu cye bagakomeza iyi migirire myiza yo guhana impano ngo yaranze abakurambere, abasaba kuzarushaho kongera ingufu ngo umwaka wa 2019 uzarusheho kuba mwiza kurusha ushize.

Abaminisitiri bahawe iyi mpano y’inka barimo uw’ingabo, uw’ingufu na mine, uw’urubyiruko, uw’umuco, ushinzwe kwegereza abaturage ubuyobozi, uw’imirimo ya leta, uw’ubuhinzi n’ubworozi, uw’itumanaho, uw’ubuzima, uw’imari na minisitiri w’ububanyi mpuzamahanga.

 

Izindi wakunda

Bwiza.com
error: Alert: Ntabwo byemewe!!