bwiza.com
Ahabanza » Impunzi z’abarundi zirashinja igipolisi cya Tanzania kuzikorera iyicarubozo
Amakuru Politiki

Impunzi z’abarundi zirashinja igipolisi cya Tanzania kuzikorera iyicarubozo

Impunzi z’abarundi ziri mu nkambi zo muri Tanzania, zitangaza ko zikorerwa iyicarubozo n’abapolisi bo muri iki gihugu.

Ni impunzi zisaga 10 zo mu nkambi ya Nduta iherereye mu gace ka Kigoma muri Tanzania, zivuga ko abapolisi bazishimuta bakazifunga, bakazikubita, bakaziboha, bakazikorera n’ibindi bikorwa zivuga by’iyicarubozo.

Umwe muri izi mpunzi aganira na SOS/Burundi, yagize ati “Kuva ku munsi wa mbere tukigera muri gereza, twarakubiswe bikomeye, abadukorera iyicarubozo ni abofisiye b’abapolisi ba Tanzania”.

Bakomeza bavuga ko bakubitishwa inkoni, gusunikwa bajombwa iminwa y’imbunda, rimwe na rimwe bakabohwa amaguru n’amaboko.

Ati “Bamboshye amaguru n’amaboko batangira kunkubita, baragije banzirika ku giti”.

Bamwe muri izi mpunzi zivuga ko zihohoterwa, bavuga ko mu kubakorera iyicarubozo, abapolisi baba bashaka kubababaza cyane ku gice cy’imyanya myibarukiro ngo ku buryo bamwe batakibasha gutera akabariro.

Umuvandimwe w’umwe mu bimuriwe muri gereza ya Nyamisivya akamaramo amezi arindwi, atangaza ko yajyanwe yafunzwe amaso n’igitambaro kirimo urusenda, ndetse n’amaguru yashyizwe mu ndobo ngo zuzuye amazi, hamwe na bagenzi be bakavuga ko imirimo bakoresherezwaga muri iyi gereza yabateye ubumuga bw’ingingo.

Izi mpunzi zikorerwa iyicarubozo, ngo ni izishinjwa gukorana n’imitwe y’inyeshyamba, kutubaha amategeko y’imbere mu nkambi, no kugenda bakamara iminsi hanze y’inkambo nta burenganzira bafite.

Impunzi z’abarundi ziri mu nkambi zo muri Tanzania zisaga ibihumbi 230.

 

 

Izindi wakunda

Bwiza.com