bwiza.com
Ahabanza » Indonesia: Indege ya Ethiopian Airlines yururukijwe ku ngufu n’indege z’indwanyi
Amakuru Politiki

Indonesia: Indege ya Ethiopian Airlines yururukijwe ku ngufu n’indege z’indwanyi

Mu gitondo cyo kuri uyu wa Mbere Igisirikare cyo mu Kirere cya Indonesia cyabonye indege ya Ethiopian Airlines mu kirere cy’iki gihugu biba ngombwa ko ihatirwa kururuka kuko yari yinjiye mu kirere cyabo mu buryo butemewe.

Iyi ndege ya Ethiopian Airlines yo mu bwoko bwa Boeing 777 ifite numero ETH3728, yoherejweho indege 2 z’intambara ziyihatira kugwa ku kibiga cy’indege cya Hang Nadim mu ntara ya batam, ku birwa bya Riau ahagana saa tatu z’igitondo ku isaha yo muri Indonesia.

Abayobozi b’iki gihugu bakaba bashinja abari batwaye iyi ndege kurenga ku mategeko agenga ingendo zo mu kirere binjira mu kirere cya Indonesia nta burenganzira bahawe.

Biravugwa ko iyi ndege yari ihagurutse Addis Abeba yerekeza muri Hong Kong, ariko hakaba hataramenyekana neza impamvu iyi ndege yari iri kuzerera mu kirere cya Indonesia iherereye mu birometero 2,500 uvuye mu majyepfo ya Hong Kong.

Iyi nkuru dukesha Chimpreports iravuga ko kumanuka ku ngufu kw’iyi ndege kwari guteye ubwoba, aho abaturage babibonye batangarije itangazamakuru rya Indonesia ko indege yagenderaga hasi cyane ndetse hakumvikana urusaku ruteye ubwoba bw’indege zo mu bwoko bwa F-16 zari ziyiri inyuma bigatuma abaturage bakuka umutima.

Umwe mu baturage akaba yagize ati: “Indege yagaragaraga nk’iri neza hejuru y’inzu, kubera ko urusaku rwayo rwari rwinshi cyane rwumvikana nk’ururi hafi.”

Iyi ndege yari irimo abakozi bayo batandatu bari batwaye abagenzi 139 ariko nta kibazo bahuye nacyo.

Ibi bikaba bibaye mu gihe mu minsi ishize indi ndege ya Ethiopian Airlines, Boeing 737 iguye nabi ku Kibuga cy’Indege Mpuzamahanga cya Entebbe, muri Uganda, aho ngo yarenze aho yagombaga kugwa ikaruhukira mu byatsi bikikije ikibuga.

Izindi wakunda

Bwiza.com
error: Alert: Ntabwo byemewe!!