bwiza.com
Ahabanza » Nyaruguru: Urwego rw’Umuvunyi rugiye gusobanurira abaturage uburenganzira bwabo
Amakuru Politiki

Nyaruguru: Urwego rw’Umuvunyi rugiye gusobanurira abaturage uburenganzira bwabo

Urwego rw’Umuvunyi rwateguye gahunda yo gukumira no kurwanya akarengane mu Karere ka Nyaruguru kuva kuri uyu wa Kabiri, itariki ya 15 kugeza ku itariki ya 17 Mutarama 2019, hateganyijwe ko abaturage bo mu Mirenge yose igize aka karere, bazahugurwa ku burenganzira n’inshingano byabo mu gukumira no kurwanya akarengane na ruswa kandi hakizwe ibibazo by’akarengane ku bufatanye n’Inzego z’Ibanze.

Zimwe mu Nshingano z’Urwego rw’Umuvunyi nk’uko zigaragara mu Itegeko N° 76/2013 ryo ku wa 11/09/2013 rigena inshingano, ububasha, imiterere n’imikorere by’Urwego rw’Umuvunyi, cyane cyane ingingo yaryo ya 4, harimo ko Urwego rw’Umuvunyi rufite inshingano yo:

Ø Gukumira no kurwanya akarengane, ruswa n’ibyaha bifitanye isano na yo mu nzego z’ubutegetsi bwa Leta n’Izigenga;

Ø Kwakira no gusuzuma ibirego by’abantu ku giti cyabo n’iby’amashyirahamwe, byerekeye ibikorwa by’abakozi ba Leta, iby’inzego zayo n’iby’abikorera, no gukangurira abo bakozi n’izo nzego gushakira umuti ibyo bibazo iyo rusanze bifite ishingiro;

Ø Guhuza umuturage n’inzego z’ubutegetsi za Leta n’Izigenga;

Ø Kugira inama Guverinoma n’izindi nzego z’imirimo bireba mu gushimangira no kunoza politiki yazo yo gukumira, kurwanya no guhana akarengane, ruswa n’ibyaha bifitanye isano na yo;

Ø Gukangurira abaturage kwirinda ruswa n’ibyaha bifitanye isano na yo muri rusange no kubihugurira abakozi b’inzego z’imirimo ari mu bigo bya Leta, mu bigo n’imiryango bitari ibya Leta;

Ø Gukangurira abaturage gufatanya n’inzego za Leta n’iz’abikorera kubaka Igihugu no kudatinya kwamagana imikorere mibi ishingiye ku karengane, ruswa n’ibyaha bifitanye isano na yo;

Ø Kugira inama Inzego za Leta n’iz’abikorera kugira ngo imikorere y’ubuyobozi irusheho kunogera abaturage.

Mu rwego rwo gushyira mu bikorwa izi nshingano, no gusobanura imikorere n’imiterere by’Urwego rw’Umuvunyi, Urwego rw’Umuvunyi rutegura, gahunda yo gukumira no kurwanya akarengane mu turere twagenwe muri gahunda y’ibikorwa ya buri mwaka.

 

Izindi wakunda

Bwiza.com