bwiza.com
Ahabanza » Afurika y’Epfo:Ubucamanza burashinjwa gushaka guhishira ukuri ku iyicwa rya Karegeya
Amakuru Politiki

Afurika y’Epfo:Ubucamanza burashinjwa gushaka guhishira ukuri ku iyicwa rya Karegeya

Inzego z’ubucamanza za Afurika y’Epfo zirashinjwa kugerageza guhishira iby’iyicwa rya Patrick Karegeya wigeze kuba umuyobozi w’urwego rw’ubutasi mu Rwanda nk’uko umwe mu banyamategeko wo ku rwego rwo hejuru muri iki gihugu yabitangarije Urukiko rwa Johannesburg kuri uyu wa Gatatu asaba ko abagize uruhare mu iyicwa rye bashinjwa aho kongera guperereza.

Mu busabe bwatanzwe nyuma yo gufungura iperereza ku rupfu rwa Karegeya mu Rukiko rwa Randburg mu nkengero z’Umujyi wa Johannesburg, umunyamategeko, Gerrie Nel kuri uyu wa Gatatu, itariki 16 Mutarama, yemeje ko uburyo bwakoreshejwe n’imyirondoro y’Abanyarwanda bane bishe Karegeya bizwi na buri wese kuva mu myaka 5 ishize, ariko kugeza ubu abayobozi ba Afurika y’Epfo hakaba ntacyo bari bakora ngo abo bantu batabwe muri yombi.

Umunyamategeko Gerrie wunganira umuryango wa Karegeya yavuze ko gutinza gushinja abakekwaho iki cyaha mu rukiko ahubwo hagatangizwa iperereza nyuma y’imyaka 5 icyaha kibaye bigaragaza gushaka guhishira.

Patrick Karegeya wigeze kuyobora inzego z’ubutasi z’u Rwanda yiciwe muri hotel Michelangelo yo mu karere ka Sandton kuwa 31 Ukuboza 2013. Bivugwa ko yari yatumiwe muri iyi hotel n’umunyemari w’Umunyarwanda wari inshuti ariko bwacya agasangwa yishwe anizwe.

Abo mu muryango we ndetse n’abo bashinganye ishyaka RNC bashinja guverinoma y’u Rwanda kugira uruhare mu iyicwa rye, bakomeje gusaba ko ababigizemo uruhare bashyikirizwa ubutabera kuva icyo gihe ariko bamwe basanga uru rubanza rukomeye ku buryo bitoroshye kurugeza ku iherezo.

Umunyamategeko Gerrie Nel uhagarariye umuryango AfriForum utegamiye kuri leta uvuganira ba nyamucye muri Afurika y’Epfo, yasabye umucamanza Jeremiah Matopa guhagarika iryo perereza hakarangizwa iritararangiye.

Ubusabe bwa Nel bwanasomwe mu rukiko ndetse bukinjizwa mu nyandiko zarwo k’ibimenyetso, buvuga ko abo Banyarwanda bane bagize uruhare mu rupfu rwa Karegeya ari; Appollo Ismael Kirisisi, Alex Sugira, Samuel Niyoyita na Nshizirungu Vianney.

Umunyamategeko, Gerrie Nel, umwe mu bavuga rikijyana muri Afurika y’Epfo

Nk’uko iyi nkuru dukesha The Guardian ikomeza ivuga, uyu munyamategeko yavuze ko mu buryo budasobanutse nta ntambwe n’imwe yatewe yo gushakisha aba bantu bakekwa, nta busabe bwo kuboherereza mu rukiko bwatanzwe, ndetse ko nta kuvugana na Interpol kwabaye cyangwa urundi rwego nyubahirizategeko mpuzamahanga.

Umucamanza akaba yatangaje ko azatanga umwanzuro kuri ubu busabe kuwa Mbere mugitondo.

Abajijwe niba haba hari inyungu za politiki zaba ziri kwivanga muri iki kibazo, Nel yasubije agira ati: “Njye ndi gufata umwanzuro ngendeye ku bimenyetso byose byakusanyijwe.”

Ibi biravugwa mu gihe umubano wa Afurika y’Epfo n’u Rwanda utameze neza kuva muri Werurwe 2014, ubwo Afurika y’Epfo yirukanaga abadipolomate batatu b’Abanyarwanda bashinjwa uruhare mu gushaka kwivugana Kayumba Nyamwasa waciriwe urubanza n’urukiko mu Rwanda adahari nyuma yo guhungira muri Afurika y’Epfo aho bivugwa ko kuri ubu arindwa amasaha 24 kuri 24 n’abantu bafite imbunda.

 

Izindi wakunda

Bwiza.com
error: Alert: Ntabwo byemewe!!