bwiza.com
Amakuru mu Rwanda

Nyamasheke: Abaturage barinubira umwanda ugaragara ku biro by’akagari ka Rushyarara

Abaturage bo mu Kagari ka Rushyarara, mu murenge wa Karambi, Akarere ka Nyamasheke bavuga ko barambiwe guherwa serivisi mu biro by’akagari birangwa n’umwanda, aho n’ubwiherero bwako bwangiritse bikabije bagatinya no kubukoresha cyane cyane mu bihe by’imvura, bakibaza ukuntu ubuyobozi bubakangurira isuku kandi no ku biro by’akagari kabo ntayihari.

Bamwe mu batuye aka kagari ntibariye iminwa mu gutunga urutoki abayobozi bako  gutuma gahorana umwanda ukabije, kakaba gafite n’igice kimwe kiva ,bakinubira kukageramo igihe cy’imvura nyinshi, sima  yagiye ishira mu bice bimwe na bimwe byo hasi  n’isigayemo ikaba idafashwe neza, ibirahuri by’inzugi n’amadirishya byashizemo  mu bice byinshi byako kugeza n’ubwo amahuhezi y’imvura abasanga mo, hakiyongera ho amabati y’ubwiherero yasambutse ku buryo nta wajyamo mu mvura.

Kwizera Charles yagize ati’’ Mu gihugu nk’iki kigeze kure mu bikorwa by’isuku birababaje kubona tugihererwa serivisi ahantu nk’aha rwose.  Akagari udashobora gukoropa cyangwa gukubura mu buryo bworoshye, ubwiherero buteye isoni bwasenyutse kandi ariho abaturage twagombye gufatira urugero ariko umuntu akaba yagera hano agasubira mu rugo kwiherera cyangwa agatira ubwiherero avuye ku biro by’akagari, kunyagirirwamo imbere kandi ari ku biro by’ubuyobozi,… birababaje cyane.’’

Yakomeje agira ati “Twibaza niba ubuyobozi bw’umurenge n’akarere bugera hano, cyangwa nk’iyo  hari umuyobozi uhageze aho ashobora kwiherera. Ubu se aba ni bo bazaza kutwigisha kugira ubwiherero busukuye, tuzafatira urugero he niba nta bwiherero  busakaye bunakinze neza akagari kagira?

Kuri ibi hiyongera ho kuba hashize ukwezi kose ibiro by’akagari bitagira ibendera, bakibaza ikibura, bamwe bakavuga ko ntaho bitaniye no mu ngo zabo kuko nta cyerekana ko  ari ku biro by’ubuyobozi igihe ushobora kuhagera ntugire n’ikirango cy’igihugu uhabona kandi ahandi hose bageze babihabona,bakumva byahinduka.

Bamwe mu bagize Njyanama y’aka kagari bavuga ko ikibazo kiri mu mikorere y’ubuyobozi bwaba ubw’akagari ndetse na bo ubwabo kuko byose babivuga ariko ntihagire igikemuka, njyanama  ikaba hari igihe imara igihe kinini idaterana ngo bagire n’ibindi biga bibangamiye abaturage, bakavuga ko badashobora gutera imbere bakorera mu kajagari nk’ako.

Gitifu w’aka kagari, Siborurema Jean Paul, avuga ko bagiye kwisubiraho

Gitifu w’aka kagari,  Siborurema Jean Paul yemera ko  bakorera mu mwanda  ukabije koko nk’uko abaturage babivuga, kandi ko bidasaba kujya ku karere ngo bagure ibati rimwe cyangwa abiri yo gutunganya ubwiherero cyangwa gusubiza ikirahure mu rugi cyangwa mu idirishya,dore ko ngo hashize imyaka igera kuri 3 ibirahuri byarashizemo, akabasezeranya  kwikubita agashyi uyu mwanda ukahacika.

Ati “Birumvikana ntiwasaba abaturage icyo nawe udafite kandi  aha niho hagombye gufatirwaho urugero. Hari ibyo dukenera ku murenge no ku karere ariko hari n’ibyo twakwikorera ubwacu, gusa kudaterana ku gihe kwa njyanama, nabyo hari byinshi bidindiza, ariko tugiye kwisubiraho.’’

Perezida wa njyanama y’aka kagari,Ntawangundi Fabien, yemera ko hari intege nke mu mikorere y’ubuyobozi bwako binatuma nta suku kagira, agasaba abaturage kongera kubagirira icyizere,ko hari byinshi bigiye guhinduka.

Ibibazo nk’ibi biri mu tugari twinshi muri aka karere, umuyobozi wako Kamari Aimé Fabien na we agashinja ubuyobozi bw’utugari tumwe na tumwe intege nke mu mikorere, bakaba ngo bagiye kubikurikirana aho basanze umwanda  umuyobozi w’akagari akajya afatirwa ibihano bikaze.

Ubwiherero bw’akagari ngo burangwa n’umwanda utuma bamwe mu baturage bahita mo gusubira kwiherera mu ngo zabo bakagaruka iyo bakeneye serivisi ku kagari
Inzugi zimaze imyaka irenga 3 nta birahuri birangwamo

Izindi wakunda

Bwiza.com
error: Alert: Ntabwo byemewe!!