bwiza.com
Ahabanza » Leta yiteguye gukomeza gukorana neza n’amadini n’amatorero- Min Prof.Shyaka
Uncategorized

Leta yiteguye gukomeza gukorana neza n’amadini n’amatorero- Min Prof.Shyaka

Minisitiri w’Ubutegetsi bw’Igihugu, Prof.shyaka Anastase  avuga ko Leta y’u Rwanda yiteguye gukomeza ubufatanye busesuye n’amadini n’amatorero  akorera mu Rwanda mu guharanira iterambere rirambye n’imibereho myiza y’abaturage.

Yabitangaje kuri iki cyumweru tariki ya 20 Mutarama 2019, ubwo yifatanyaga n’abayobozi n’abakirisitu  b’itorero Angilikani mu Rwanda Diyoseze ya Cyangugu gutaha urusengero rushya rujyanye n’iterambere ry’igihugu, rwuzuye rutwaye arenga 250.000.000 z’amanyarwanda.

Muri uyu muhango wanitabiriwe n’abandi bayobozi barimo Guverineri w’intara y’uburengerazuba, Munyantwali Alphonse, abayobozi b’uturere twa Rusizi na Nyamasheke n’abasenyeri hafi ya bose b’itorero Angilikani mu Rwanda n’abandi bashyitsi baturutse hirya no hino ku isi, nyuma y’uko rukinguwe ku mugaragaro  na Minisitiri Prof.Shyaka Anastase hamwe n’umuyobozi w’itorero Angilikani mu Rwanda, Musenyeri,Dr Mbanda Laurent,  yashimiye iri torero n’abafatanyabikorwa baryo, kimwe n’andi madini n’amatorero mu Rwanda uruhare rwayo mu kubaka igihugu.

Yagize ati “Uruhare rw’itorero Angilikani  kimwe n’andi madini n’amatorero mu kubaka igihugu cyacu ni ndashyikirwa kandi turarushima cyane, cyane cyane ubufasha bwanyu mu burezi, ubuvuzi, isanamitiman’indi mibereho myiza y’abaturage twese duharanira.’’

Yakomeje agira ati “Nagira ngo mbabwire ko Leta yiteguye gukomeza gukorana n’amadini n’amatorero neza cyane mu kubaka igihugu cyiza cy’abanyarwanda beza,kirimo n’amatorero  n’amadini meza,bigakorw mu bufatanye busesuye,buri mo ubwizerane,ubunyangamugayo no gukora iby’Imana ishima kandi bibereye abanyarwanda bose.’’

Yabasabye gukomeza kurinda ibi byose bigerwaho, avuga ko urusengero nk’uru rukwiye kuba icyitegererezo mu zindi nsengero zubakwa mu mijyi nk’uyu yunganira umujyi wa Kigali, ariko n’imitima y’abazisengera mo ikarushaho kuba mizima,bakanakora bakarushaho kwiteza imbere.

Kalisa Patrice,umwe mu barusengera mo yavuze ko bishmiye gusezerera gusengera ahantu batisanzuraga, mu rusengero rutari rujyanye n’igihe,anashima uruhare bo ubwabo nk’abakirisitu bagize ngo rwuzure,bikaba ikimenyetso cyo kwigira no kwishaka mo ibisubizo kandi ngo bazakomeza no mu bindi bibateza imbere.

Ku byifuzo yagzie ati “Tubonye urusengero ruduhesha ishema n’icyubahiro mu bandi ariko dufashijwe kubona na kaminuza,abana bacu barangiza mu mashuri yacu abanza n’ayisumbuye bakabona n’aho bakomereza kaminuza hafi iterambere ryaba rirushije ho kwiyongera,ni cyo dusaba cyane ubu.’’

Kuri icyi cyifuzo,umuyobozi w’iri torero,Diyoseze ya Cyangugu, Nyiricyubahiro Musenyeri,Nathan Rusengo Amooti yavuze ko batangiye kubitekereza ho kuko bamaze kuzuza n’ibindi birimo  Guest house 2,imwe isanzwe mu mujyi wa Rusizi n’indi yuzuye mu Gisakura muri Nyamasheke,bakaba bari kubaka indi mu murenge wa Bweyeye, bakaba baratangiye gutekereza  gutangiza kaminuza y’ubukerarugendo mu myaka mike cyane iri imbere.

Amafoto: Min. Shyaka yafunguye ku mugaragaro Katederali ya Diyoseze ya Cyangungu y’Itorero Angilikani

Mbere yo gutaha ku mugaragaro uru rusengero rwa Katedarali ya Cyangugu, kuri uyu wa gatandatu bari batashye amashuri mu murenge wa Nkombo,na Guest house iri mu Gisakura mu murenge wa Bushekeri,mu karere ka Nyamasheke na yo yuzuye itwaye hafi 200.000.000 z’amanyarwanda.

Min Prof Shyaka avuga ko uruhare rw’amadini n’amatorero ari indashyikirwa mu kubaka igihugu

 

Izindi wakunda

Bwiza.com
error: Alert: Ntabwo byemewe!!