bwiza.com
Ahabanza » Muhanga: Baritana ba mwana ku mikorere y’ikusanyirizo ry’amata
Amakuru Ubukungu

Muhanga: Baritana ba mwana ku mikorere y’ikusanyirizo ry’amata

Ubuyobozi bw’akarere ka Muhanga na koperative y’aborozi  icunga ikusanyirizo ry’amata ryubatswe muri aka karere baritana ba mwana mu mikorere yaryo aho buri ruhande rwerekana ko kuba imikorere yaryo iri hasi cyane biterwa n’urundi ruhande, ni ikibazo kandi n’abadepite biboneye ubwo basuraga aka karere mu cyumweru gishize maze nabo bakemeza ko ibikorwa byaryo biri hasi cyane ugereranije n’ibyo bakagombye kuba bakora.

Iri kusanyirizo ryubatswe mu mujyi wa Muhanga mu murenge wa Nyamabuye nk’agace kari mu mujyi ntikabonekamo ubworozi, kuba ryubatse kure y’aborozi ni imwe mu mbogamizi zo kuba ritabona amata ahagije kuko ubu ryakira litiro 600 ku munsi na litiro 400 mu gihe cya wekendi mu gihe rifite ubushobozi bwo kwakira litiro 1200 ku munsi .

Aya mata ngo kuba ataboneka ngo biterwa n’uko hari aborozi bamwe bakiyagurishiriza mu bacuruzi bayo n’amaresitora ndetse no kuba imirenge y’icyaro yo mu gice cya Ndiza nta buryo yashyiriweho bwo gukusanya ayo bakama bityo akaba agurishirizwa mu giturage iyo batuye. Aha ni naho abagize iyi koperative bavuga ko ubuyobozi bw’akarere butabafasha gukangurira abaturage kuyagemura aha ku ikusanyirizo.

Venant Nsigamasabo umwe mu borozi bari no muri iyi koperative, avuga ko nubwo bakira amata avuye mu mirenge ya hafi y’aho ryubatse ngo amata aca ku ruhande ni menshi bo nka koperative ngo ntacyo babikoraho kuko badafite ububasha bwo guhagarika umuturage ngo abugemurire.

Agira ati “Amata arahari ahubwo anyura hirya ubuyobozi nibwo bukwiye kubica bugahagarika abayajyana mu bacuruzi naho twebwe ntacyo twakora, ni gute wahagarika umucunda ngo yajyane ku ikusanyirizo ariko ubuyobozi bwo bubikoze byashoboka kandi bigakunda ,amata macye tubona ni uko batadufasha ngo bakangurire aborozi bose bayazane».

Uwamariya Béatrice umuyobozi w’aka karere avuga ko bo icyo basabwa ari ukubagezaho ibikorwaremezo kuko byubakwa na Leta kandi ibi ngo barabikoze ,icyakora avuga ko bo nk’ubuyobozi babonye ko iyi koperative yibeshya ko yunguka nyamara itunguka nyuma yo kuyisabira igenzura mu kigo cy’Igihugu gishinzwe amakoperative (RCA). Avuga ko nibamara kubona raporo bazayishingiraho bakabagira inama y’icyo bakora ariko ngo ibyo basabwaga byose bo barabikoze.

Agira ati “Iriya koperative yari yarahagaritse gukora tuyifasha kongera gutangira ndetse hari ibyo twabafashije ngo bakore, ubu rero ni abantu bari mu bucuruzi bakwiye kumanuka  bakegera aborozi bakabakangurira kubagemurira ,twabagiriye inama yo gushyiraho za site hirya no hino bakiriraho amata ngo borohereze abaturage ntabyo bakoze ,kandi iki gikorwa nibo ba mbere gifitiye umumaro bakwiye rero kuba bishakira abakiriya nk’abantu bari muri business”.

Hon.Ngabitsinze Jean Chrysostome umyobozi wa komisiyo ya PAC mu nteko ishinga amategeko ubwo yasuraga aka karere avuga ko icyo babonye ari uko ibikorwa bakora biri hasi cyane ugereranyije n’ibyo bakabaye bakora.

Agira ati “Amata bakira ni macye cyane ugereranyije n’ibyo bakabaye bakora ndetse twabonye ko iriya koperative igizwe n’abanyamuryango bacye bakwiye gufungura imiryango bakereka abandi bakinjira n’ibikorwa bikaguka gusa na none akarere turagasaba kwinjira mu micungire n’imiyoborere yaryo bakabafasha aho bishoboka.»

Mu bindi bibazo aba borozi bafite, harimo imashini ikonjesha amata yapfuye yakiraga litiro 2000 , bashinja ubuyobozi bw’akarere ko bwayibahaye yarapfuye kuko ari bo babanje kuyikoresha mbere ,nyuma yo kuyikoresha ntikire ubu ngo baguze indi ifite ubushobozi bwo kwakira litiro 1060 bakanibaza igihe amata yababanye menshi aho bazajya bayashira mu gihe akarere kanze gukoresha iyi mashini.

Kuri iki kibazo abadepite bavuze ko bagiye kwegera Minagri ari nayo yaryubatse bakareba uburyo iyi mashini itakomeza kubapfira ubusa kandi bigaragara ko iyo bafite iri munsi cyane yayo.

Kugeza ubu amata agera kuri iri kusanyirizo ryubatswe na Minagri ndetse rinafungurwa na Hon. Makuza Bernard ubwo yari Minisitiri w’intebe muri 2009,  ni ava mu mirenge 5 iri mu gice cyegereye umujyi ndetse n’umurenge wa Mwendo w’akarere ka Ruhango ari nawo uturukamo amata menshi kurusha indi mirenge yo muri aka karere.

Izindi wakunda

Bwiza.com
error: Ntibyemewe