bwiza.com
Amakuru Politiki

Rubavu: Hatawe muri yombi abatekamutwe babiri bari barajujubije abaturage

Polisi mu Karere ka Rubavu yataye muri yombi abatekamutwe babiri bakekwaho gucuruza amabuye y’agaciro atari aya nyayo ndetse n’amafaranga mpimbano y’amahanga. Bombi bakaba bafashwe nyuma y’amakuru yageze kuri polisi ko abo bantu biyitaga abavunjayi n’abacuruzi b’amabuye y’agaciro.

Nk’uko bitangazwa n’umuvugizi wa polisi mu burengerazuba, CIP Innocent Gasasira, abakekwa batawe muri yombi kuwa 18 Mutarama bafatiwe mu Murenge wa Nyundo, mu Muduguudu wa Terimbere. Yasobanuye ko bafashwe n’abashinzwe umutekano bakora mu ibanga babasanze bigize nk’abakiriya b’amabuye y’agaciro.

Aba ngo barabahamagaye ngo bakorane ubucuruzi, ariko abo batekamutwe batazi ko abo bapolisi bakora mu ibanga bari bamaze igihe babakoraho iperereza kubera gutuburira abaturage bajyaga kubavunjishaho amafaranga y’amahanga.

Abatawe muri yombi ni Alphonse Habumugisha w’imyaka 50 na Jean Claude Uwingabiye w’imyaka 40, kuri ubu bafungiye kuri station ya polisi ya Gisenyi mu gihe iperereza rikomeje gukorwa n’Urwego rw’igihugu rw’Ubugenzacyaha (RIB).

CIP Gasasira ati: “Abakekwa bafatanywe ibiro 350 bya coltan, ntibagaragaje inyandiko zemeza niba amabuye yafashwe ari aya nyayo kandi ikindi amafaranga bacuruzaga yari amahimbano.”

Polisi y’u Rwanda ikaba iburira Abanyarwanda ibasaba kujya bakorana ubucuruzi n’abacuruzi bemewe ndetse no kuvunjisha amafaranga yabo kuri ku biro by’ivunja byemewe kandi bakabanza kumenya ko ibyo baguze ari umwimerere.

Ni mu gihe ingingo ya 269 yo mu gitabo cy’amategeko ahana y’u Rwanda ivuga ko uhamwe n’icyaha cyo gukoresha amafaranga mpimbano ashobora guhanishwa igifungo kitari munsi y’imyaka 5 ndetse kitarenze imyaka 7. Mu gihe iki cyaha gikozwe ku rrwego mpuzamahanga, igika cya mbere cy’iyi ngingo kivuga ko igihano kirenga imyaka 7 ariko ntikirenze 10 n’amande Atari munsi ya miliyoni 7 z’amafaranga y’u Rwanda (7,000,000frw).

 

 

Izindi wakunda

Bwiza.com