bwiza.com
Amakuru Politiki

U Bubiligi butegereje icyo Abanyekongo n’akarere bagiye gukora

Mu kiganiro n’itangazamakuru ryo mu Bubiligi, minisitiri w’ububanyi n’amahanga w’iki gihugu, Didier Reynders aravuga ko kuri ubu igisigaye ari ukureba icyo Abanyekongo n’akarere bagiye gukora nyuma y’aho hemejwe bidasubirwaho ko Felix Tshisekedi ari we Perezida wa Repubulika iharanira Demokarasi ya Congo.

Ubu ni ukureba icyo Abanyekongo bazakora n’icyo akarere kazakora. Twabonye ko Afurika Yunze Ubumwe yakurikiranaga iyi dosiye bya hafi. Ubwo tugiye gukomeza gukorana na Afurika Yunze Ubumwe mu kureba kwizerwa kw’amatora ashobora kwemerwa cyangwa ntiyemerwe na Afurika Yunze Ubumwe”, uyu ni minisitiri Didier Reynders avugana na Radio na Televiziyo by’u Bubiligi, RTBF.

Umuryango wa Afurika Yunze Ubumwe wari wasabye urukiko rushinzwe kurinda itegeko nshinga muri Congo kuba ruretse gutangaza ibya nyuma byavuye mu matora nyuma yo kugaragaza kutizera uko amatora yagenze, wari wafashe icyemezo cyo kohereza intumwa ziyobowe na Perezida w’u Rwanda, Paul Kagame i Kinshasa kuganira kuri iki kibazo, ariko nyuma y’aho ibyavuye mu matora bya nyuma bitangarijwe uru rugendo rwasubitswe.

Martin Fayulu wari umukandida w’urundi ruhande rutavuga rumwe n’ubutegetsi muri aya matora yabaye kuwa 30 Ukuboza 2018, we yamaze gutangaza ko ari we Perezida wa Congo wemewe n’amategeko, ahamagarira abaturage kujya mu mihanda bagakora imyigaragambyo yo mu mahoro nk’uko biteganywa n’ingingo ya 64 y’itegeko nshinga, ariko ubusabe bwe kugeza ubu ntiburitabirwa. Ubwoba bw’uko hashobora kwaduka imvururu ariko bwo buracyahari.

Minisitiri Reynders ku rundi ruhande yatangaje ko akanama k’umutekano k’Umuryango w’Abibumbye kazaterana mu minsi iri imbere ku kibazo cya Congo.

 

Izindi wakunda

Bwiza.com