bwiza.com
Amakuru mu Rwanda

Umuntu wirundanyaho ubutunzi bw’amahugu ni nk’inkware ibundikira amagi itateye-Rwamukwaya

Rwamukwaya Olivier, wahoze ari Umunyamabanga wa Leta muri Minisiteri y’uburezi ushinzwe amashuri y’imyuga n’ubumenyingiro, yatanze ubutumwa bugereranya umuntu wirundanyaho ubutunzi bw’amahugu n’inkware ibundikira ayo itateye.

Ni ubutumwa yatambukije abucishije ku rukuta rwe rwa Twitter, kuri iki Cyumweru tariki ya 20 Mutarama 2019, ubutumwa bugaragara muri Yeremiya:17:11

Rwamukwaya yagize ati “Umuntu wirundanyaho ubutunzi bw’amahugu ni nk’inkware ibundikira amagi itateye. Ubwo butunzi buzamusiga agabanijemo kabiri iminsi yo kubaho kwe, hanyuma azaba umupfapfa”.

Kuri iki Cyumweru yanatambukije ubundi butumwa buboneka muri Daniyeli :6:17; bugira buti “Nuko umwami arategeka, bajya kuzana Daniyeli bamujugunya mu rwobo rw’intare. Ariko umwami yari yamubwiye ati “Imana yawe ukorera iteka iragukiza.” Uzi ko burya Daniel yamanukanye mu rwobo isezerano ryo gukizwa n’Imana yakoreraga? Wari uzi se uwari wabihanuye?

Si ubwa mbere Rwamukwaya agaragaje ubutumwa bwiza ndetse aniragiza Imana mu kazi ke ka buri munsi.

Mu butumwa yatanze nyuma yo kurahirira imirimo mishya yari yahawe yo kuba umunyamabanga wa Leta muri Minisiteri y’uburezi ushinzwe amashuri y’imyuga n’ubumenyingiro, Rwamukwaya   yagize ati: ” Ndashimira Nyakubahwa Perezida wa Repubulika Paul Kagame ku bw’icyizere yongeye kungirira!”

Nyuma yo gushimira umukuru w’igihugu, Olivier Rwamukwaya yerekanye ko ibyo azakora byose azabishobozwa n’Imana , kandi asabira umugisha Umukuru w’Igihugu.

Yagize ati ” Niringiye ko Uwiteka azarushaho kunshoboza mu nshingano nahawe! Imana ikomeze guha umugisha Perezida wacu, abe bose ndetse n’Igihugu cyacu. ”

 

 

 

Izindi wakunda

Bwiza.com