bwiza.com
Ahabanza » Afurika y’Epfo: Amakorosi aberamye mu rubanza rw’abashinjwa kwica Karegeya Patrick
Amakuru Featured Politiki

Afurika y’Epfo: Amakorosi aberamye mu rubanza rw’abashinjwa kwica Karegeya Patrick

Mu iburanisha ryo kuri uyu wa Mbere tariki ya 21 Mutarama 2019, ku iyicwa rya Patrick Karegeya wari koroneli mu gisirikare cy’u Rwanda ndetse wanakuriye ubutasi bw’u Rwanda, byagaragaye ko uru rubanza rukirimo imbogamizi nyinshi ngo abacyekwa babe bafatwa.

Nk’uko BBC ibitangaza, kuri uyu wa Mbere tariki ya 21 Mutarama 2019, mu rukiko hasomwe ibaruwa yasomwe n’umucamanza, ntabwo yari bwigere itangazwa ndetse ngo ntiyari yarigeze inakomozwaho n’ubushinjacyaha mu maburanisha yabanje, iyo baruwa ikaba igaruka ku mazina y’ababa barishe Karegeya.

Muri iyo baruwa, ububushinjacyaha butangaza ko bwafashe icyemezo cyo kutabakurikirana kubera ko bavuye muri Afurika y’Epfo mu mwaka wa 2014, hashize umunsi umwe Karegeya yishwe, ngo bakaba barahungiye mu Rwanda.

Iyo baruwa ngo ica amarenga ko abashinjacyaha baretse gukurikirana dosiye y’iyicwa rya Karegeya kubera ko nta masezerano yo guhererekanya abacyekwaho ibyaha ari hagati y’Afurika y’Epfo n’u Rwanda, mu gihe abacyekwaho kumwica baba ariho bahise bajya.

N’ubwo bimeze uko, umucamanza yafashe icyemezo ko iperereza ry’ubucamanza rikwiye gukorwa, yategetse polisi gukomeza no kurangiza amaperereza mbere yuko humvwa impaka mu buryo bw’amagambo.

Karegeya yishwe afite imyaka 54

Polisi yasabwe gusubiza bimwe mu bibazo by’ingenzi bijyanye n’iyicwa rya Karegeya, birimo icyakozwe mu guta muri yombi Abanyarwanda bacyekwaho ubwo bwicanyi.

Polisi yahawe igihe cy’ibyumweru bibiri mbere yo kongera kwitaba urukiko.

Mu nkuru yasohotse mu Kinyamakuru The Guardian mu cyumweru gishize, ivuga ko inzego z’ubucamanza za Afurika y’Epfo zishinjwa kugerageza guhishira iby’iyicwa rya Patrick Karegeya nk’uko umwe mu banyamategeko wo ku rwego rwo hejuru muri iki gihugu yabitangarije Urukiko rwa Johannesburg,  asaba ko abagize uruhare mu iyicwa rye bashinjwa aho kongera guperereza.

Mu busabe bwatanzwe nyuma yo gufungura iperereza ku rupfu rwa Karegeya mu Rukiko rwa Randburg, umunyamategeko Gerrie Nel yemeje mu rukiko ku wa 16 Mutarama 2019, ko uburyo bwakoreshejwe n’imyirondoro y’Abanyarwanda bane bashinjwa kwica Karegeya bizwi na buri wese kuva mu myaka itanu ishize, ariko kugeza ubu ngo abayobozi ba Afurika y’Epfo hakaba ntacyo bari bakora ngo abo bantu batabwe muri yombi.

Umunyamategeko Gerrie wunganira umuryango wa Karegeya yavuze ko gutinza gushinja abakekwaho iki cyaha mu rukiko ahubwo hagatangizwa iperereza nyuma y’imyaka itanu icyaha kibaye, bigaragaza gushaka guhishira.

Umunyamategeko Gerrie Nel uhagarariye umuryango AfriForum utegamiye kuri Leta uvuganira ba nyamucye muri Afurika y’Epfo, yasabye umucamanza Jeremiah Matopa guhagarika iryo perereza hakarangizwa iritararangiye.

Ubusabe bwa Nel bwanasomwe mu rukiko ndetse buninjizwa mu nyandiko zarwo nk’ibimenyetso, buvuga ko abo Banyarwanda bane bagize uruhare mu rupfu rwa Karegeya ari; Appollo Ismael Kirisisi, Alex Sugira, Samuel Niyoyita na Nshizirungu Vianney.

Nk’uko Ikinyamakuru The Guardian gikomeza kibitangaza, umunyamategeko yavuze ko mu buryo budasobanutse nta ntambwe n’imwe yatewe yo gushakisha aba bantu bakekwa, nta busabe bwo kuboherereza mu rukiko bwatanzwe, ndetse ko nta kuvugana na Interpol kwabaye cyangwa urundi rwego nyubahirizategeko mpuzamahanga.

Abajijwe niba haba hari inyungu za politiki zaba ziri kwivanga muri iki kibazo, Nel yasubije agira ati: “Njye ndi gufata umwanzuro ngendeye ku bimenyetso byose byakusanyijwe.”

Uwishe Karegeya turamuzi

Mwishywa wa Karegeya, ubu akaba ari n’umuvugizi w’umuryango we, Bwana David Batenga  mu kiganiro yagiranye na radiyo yo mu Bufaransa, nyuma ikiganiro bagiranye gishyirwa kuri Youtube, yavuze ko n’ubwo umuryango ugitegereje ibizava mu iperereza, uwamwishe bamuzi.

Yagize ati “Njyewe ndabizi, ni umuntu tuzi wabaga no mu rugo iwacu hirya no hino, ni we wabikoze nta wundi, kuko niwe wabaga muri icyo cyumba, ni we wakibagamo, n’undi niho yahotorewe, ni ugukeka, mba ntekereza, n’ izi nkiko kubanza kujya guca hirya no hino nta n’icyo binatanze kuko umuntu wamwishe arazwi, turabizi na njye ndamuzi ku giti cyanjye, yaramugambaniye rwose”.

Karegeya wari ufite imyaka 54 y’amavuko, yishwe mu ijoro ryo ku wa 31 Ukuboza, rishyira iryo ku wa 1 Mutarama 2014, muri Afurika y’Epfo, muri hotel ya Mischelangelo. Yasize umugore n’abana batatu.

Umuryango wa Karegeya Patrick, umugore n’abana batatu

Izindi wakunda

Bwiza.com