bwiza.com
Amakuru mu Rwanda

Muhanga: Abakoresha ikiraro cya Macyera bahangayikishijwe n’iyangirika ryacyo

Bamwe mu baturage batuye mu kagari ka Macyera n’aka Kagitarama bahangayikishijwe n’ikiraro gihuza utu tugari twombi  kiri mu gishanga gihingwamo ibigori kuko cyamaze kwangirika mu buryo bukabije kikaba kibangamiye abana n’abakuru kuko ibiti bigikoze byamaze gusaza, abantu bakaba hari ubwo bagwa mu mugezi bagerageza kucyambuka.

Twagirimana Eugène utuye mu mudugudu wa  Rwamugoroba, mu kagari ka Macyera avuga ko iyo imvura yaguye uru rutindo rwuzura umugezi ugatwara abantu ku bw’amahirwe ngo nta muntu urahasiga ubuzima ariko ngo babakuramo buri munsi .

Agira ati “Hanyura abana bavuye ku Kagitarama baje kwiga i Gatenzi natwe iyo tugiye mu mjyi ni ho tunyura ariko iyo imvura yaguye umugezi wa Macyera uruzura narwo rukarengerwa ,iki kibazo twakivuze buri munsi ngo Leta basi nitwihere ibiti turwikorere niba byarabananiye».

Urimubenshi Verena avuga ko mu gihe cy’imvura iyo abanyeshuri biga bahitamo gucumbika bakazataha umugezi utacyuzuye kuko ababyeyi b’aba bana babasabye kujya babacumbikira

Agira ati “Usanga ababyeyi bo ku Kagitarama baradusabye kuzajya ducumbikira abana babo bavuye ku ishuri ubwo ni ukuvuga ngo iyo umugezi wuzuye nta mwana wambuka turabagumana bakazataha waragabanutse ,uretse kandi abana abantu bakuru nabo urabatwara n’ubu hari umugabo uhereutse kugwamo”.

Umuyobozi w’akarere ka Muhanga, Uwamariya Béatrice avuga ko iki kiraro kizakorwa mu bikorwa by’ingengo y’imari izatangira mu kwezi kwa karindwi uyu mwaka.

Agira ati “Iki kiraro kimeze nabi turabizi gikwiye gukorwa kuko uretse n’abahanyura kinabangamiye abahinzi b’ibigori kuko Babura uko batwara umusaruro wabo bawujyana ku ruganda ,ruri mu bikorwa tuzakora ubwo ingengo y’imari izaba itangiye mu kwezi kwa karindwi».

Uru rutindo rubangamiye abaturage ruri hagati y’utugari tubiri twose turi mu mujyi wa Muhanga aho rukoreshwa n’abagenda n’amaguru ,biganjemo abanyeshuri bajya kwiga ku kigo cy’amashuri abanza cya Gatenzi ndetse n’abajya hirya no hino mu mujyi wa Muhango nk’inzira ya bugufi kuko ubundi bibasaba kuzenguruka ahitwa mu cya 2

Aba baturage kandi bavuga ko kiramutswe gikozwe cyajya kinorohereza abafite amagare na moto bari muri aka gace ubu Babura uko babihambukana ,ndetse ngo kikanorohereza abahinzi b’ibigori bagikoresha cyane mu gihe cyo gusarura ibigori dore ko kugeza umusaruro wabo kuri koperative yabo bisaba kucyambuka bakibaza uko bizabagendekere ubwo bizaba byeze mu gihe bigaragara ko ibiti byamaze gusaza bikaba byaranatangiye kubora.

Izindi wakunda

Bwiza.com