bwiza.com
Amakuru Politiki

RDC: Martin Fayulu yateguye imyigaragambo yitabirwa n’abantu mbarwa

Abashyigikiye Martin Fayulu utavuga rumwe na leta iriho muri Repubulika Iharanira Demokarasi ya Congo babarirwa mu macumi ni bo bitabiriye imyigaragambyo yo ku wa mbere yari yahamagaje yo kwamagana icyemezo cy’urukiko rw’itegeko Nshinga.

Urukiko rwanzuye ko Félix Tshisekedi ari we watsinze amatora ya Perezida yo ku itariki ya 30 Ukuboza 2018.

BBC itangaza ko hari abapolisi benshi mu mujyi i Kinsahasa, iyi ikaba ishobora kuba ari yo mpamvu iyo myigaragambyo yitabiriwe n’abantu mbarwa.

Fayulu, watangajwe n’akanama k’amatora ka Congo ko ari we wakurikiye mu majwi Tshisekedi, yavuze ko yibwe intsinzi, ariko urukiko rw’itegeko Nshinga rwatesheje agaciro ubujurire bwe.

Imibare y’ibyavuye mu matora yahishuriwe bimwe mu bitangazamakuru, igaragaza ko Fayulu yatsinze ayo matora.

Nyuma y’icyemezo cy’urukiko rw’itegeko Nshinga ku cyumweru, Bwana Fayulu yavuze ko yifata nka perezida wa Congo wemewe n’amategeko.

Yasabye amahanga kutemera ibyavuye mu matora byatangajwe n’akanama k’amatora ka Congo (CENI).

Yavuze kandi ko SADC, umuryango w’iterambere ugizwe n’ibihugu 16 byo mu Majyepfo ya Afurika na Congo ibereye umunyamuryango,  yifurije ishya n’ihirwe Bwana Tshisekedi mu mirimo mishya yatorewe, nta soni igira. Fayulu yongeyeho ko Demokarasi irimo kwicwa muri Congo.

Martin Fayulu, uvuga ko ariwe watsinze amatora

 

 

Izindi wakunda

Bwiza.com