bwiza.com
Ahabanza » Espagne: Cristiano Ronaldo yarokotse umunyururu ariko acibwa akayabo
Amakuru Imikino Politiki

Espagne: Cristiano Ronaldo yarokotse umunyururu ariko acibwa akayabo

Umukinnyi mpuzamahanga w’umupira w’amaguru, Cristiano Ronaldo, kuri uyu wa Kabiri, itariki 22 Mutarama, yabashije gucika uburoko ariko ategekwa n’urukiko rwo muri Espagne ndetse yemera kuzishyura akayabo ka miliyoni 18,8 z’Amayero azira kunyereza imisoro ubwo yari akiri umukinnyi wa Real Madrid.

Uru rukiko rukaba rwakatiye Ronaldo igifungo cy’imyaka ibiri cyahise kigabanywa kigera ku mande y’Amayero 365,000 yiyongera ku yandi mande ya miliyoni 3,2 z’amayero.

Mu 2017 nibwo umushinjacyaha wa leta yashinje Ronaldo ibyaha bine byo kunyereza imisoro kuva mu 2011 kugeza mu 2014 ingana na miliyoni 14,7 z’Amayero.

Cristiano Ronaldo werekeje mu ikipe ya Juventus yo mu Butaliyani mu mwaka ushize, yasubiye I Madrid agiye mu rukiko yamazemo iminota 40 aho yasohotse agatangariza itangazamakuru ko ameze neza cyane ndetse asinya na za autographs keya ku bakunzi be bari baje kumureba mbere yo kuhava.

Iyi nkuru ya AFP ikaba ivuga ko umucamanza yari yanze kumva Ronaldo atari mu rukiko hakoreshejwe video cyangwa kwinjira mu rukiko mu modoka ye mu rwego rwo kwirinda akavuyo. Aha akaba yarahazanywe muri van yirabura aba ari nayo ihamukura.

Uyu rutahizamu wamamaye ku isi yose w’imyaka 33 kandi yageze ku rukiko yambaye ikoti ry’umukara n’amataratara y’izuba aherekejwe n’umukunzi we, Georgia Rodriguez.

Izindi wakunda

Bwiza.com