bwiza.com
Amakuru mu Rwanda

Rusizi/Nyenji: Barara mu kizima kandi baturiye urugomero rutanga amashanyarazi

?

Abaturage bo mu Kagari ka Nyenji, mu Murenge wa Nzahaha, mu Karere ka Rusizi, bavuga ko bababazwa no kurara mu kizima nyamara urugomero rutanga amashanyarazi mu bihugu by’u Rwanda, Burundi na Congo/ Kinshasa rwa Rusizi ya Kabiri ruri mu kagari ka Rwinzuki baturanye.

Bavuga ko iyi mibereho ari yo ibaheza mu bukene kandi ari abahinziborozi  bashishikajwe no gukora bakiteza imbere, ariko kuba bakora ibilometero byinshi bajya  gushesha imyumbati, kwiyogoshesha  cyangwa gushyirisha umuriro muri za telefoni  bakabibonamo akarengane.

Ngarisi Silas utuye mu mudugudu wa Ruhinga muri aka kagari yagize ati ’’Ni he handi mu gihugu wambwira baturiye urugomero rw’amashanyarazi nk’uru ariko bakaba batazi uko asa mu ngo zabo?  Tekereza kuba abana bacu badashobora gusubira mu masomo bavuye ku mashuri na yo atagira amashanyarazi, kuba nta kintu cy’iterambere na kimwe kiyaturukaho dushobora kubona, tukibaza niba Nyakubahwa Perezida wacu ibi bintu abizi bikatuyobera.’’

Mugenzi we yagize ati “Twashatse no kuyizanira twishyira hamwe dushakisha amapoto n’insinga z’amashanyarazi ariko ubuyobozi bwa REG buraduhagarika ngo ntibyemewe nyamara ntibwanagikemura. Turifuza amashanyarazi kuko kutubwira kubungabunga urugomero rutagira icyo rutumariye twumva tutabyumva neza.’’

Umuyobozi w’akarere ka Rusizi Kayumba Ephrem avuga ko badashobora kuyabaha kuko batuye mu manegeka, akabasaba ahubwo kwimuka bakajya ku midugudu aho bashobora kuyahabwa kuko ngo badashobora kuyabaha bari mu buryo batuye mo ubu.

Ati “Hariya urugomero rwubatse ni mu manegeka nubwo urugomero rwo nta kibazo ruhateye. Icyo dushishikariza abo baturage ahubwo ni ukuzamuka bakajya mu midugudu aho dushobora kubaha ibikorwa remezo n’ayo mashanyarazi ari mo mu buryo bworoshye kuko tudashobora kuyabaha bari muri biriya bihanamanga bari mo.’’

Mu gihe abaturage bo bavuga ko nta wigeze abashishikariza kuhava  ababwira ko ari yo mpamvu badahabwa ayo mashanyarazi, Meya Kayumba Ephrem avuga kugeza ubu atazi  ijanisha ry’abamaze kuva mu manegeka bagana iy’imidugudu ariko ko hari abagituye muri ayo manegeka mu mirenge myinshi y’aka karere, kuhava  ku bushake bagatura aho bashobora kubona ibikorwaremezo mu buryo bworoshye ngo bikaba ari byo byakemura ibyo bibazo byose.

Izindi wakunda

Bwiza.com
error: Alert: Ntabwo byemewe!!