bwiza.com
Ahabanza » Nakiranye akababaro kenshi kuva mu ikipe ya AS Monaco- Thierry Henri
Amakuru Imikino

Nakiranye akababaro kenshi kuva mu ikipe ya AS Monaco- Thierry Henri

Thierry Henri w’imyaka 41 y’amavuko wabiciye bigacika muri ruhago ku mugabane w’u Burayi, nyuma yo kwirukanwa ku kazi k’ubutoza mu ikipe ya AS Monaco, atangaza ko yabyakiranye akababaro kenshi.

Henri yirukanwe ku wa kane tariki ya 24 Mutarama 2019, kuri aka kazi kari ko ka mbere akoze nk’umutoza mu gihe iyi kipe ubu iri ku mwanya ubanziriza uwa nyuma ku rutonde rw’agateganyo rwa shampiyona y’umupira w’amaguru y’icyiciro cya mbere izwi nka Ligue 1.

Mu itangazo Henri yasohoye amaze kwirukanwa, yagize ati “Nakiranye akababaro kenshi kuva mu ikipe ya AS Monaco. Nubwo bwose twahuye n’ibibazo muri uru rugendo rugufi, naryohewe n’igihe namaze muri iyi kipe ikomeye”.

Arakomeza ati “Intego yanjye n’imikorere yanjye kuva ku munsi nayigezemo izakomeza kuba ko ikipe iza imbere y’ibindi byose. Mfitiye icyizere gikomeye aba bakinnyi, kandi hamwe n’abaherutse kugurwa, bari mu gihe cyiza cyo guhangana n’igice cya kabiri cya shampiyona babona intsinzi,…”

Jardim wamaze imyaka ine atoza Monaco akaza no kuyihesha igikombe cya shampiyona mu mwaka w’imikino wa 2016-2017, wari umaze igihe gito ayirukanwemo, niwe wasimbuye Henri, ahabwa kontaro y’imyaka ibiri n’igice.

Mu itangazo ikipe ya Monaco yasohoye isobanura impamvu yongeye guha akazi umutoza Jardim w’imyaka 44 y’amavuko, yavuze ko iyirukanwa rye ryabaye mu kwezi kwa cumi k’umwaka ushize wa 2018 ryari “rihutiyeho”.

Vadim Vasilyev, visi-perezida w’iyi kipe, yagize ati: “Leonardo yagakwiye kuba yarahawe amahirwe yo gukomeza gutoza.Tugomba kwemera ko mu gihe cy’igura n’igurisha ry’abakinnyi ku mpeshyi, twagurishije abakinnyi benshi cyane b’ingenzi kandi, nubwo twashoye amafaranga menshi, habaye amakosa mu gushaka abo kubasimbura”.

“Ibi byatumye tudashobora guhanga ikipe nshya ishoboye guhatana. Icyemezo cyo kwirukana Leonardo Jardim nacyo cyahutiyeho”.

“Thierry Henri ni icyatwa mu mupira w’amaguru, ariko uruhurirane rw’ibintu bitamuturutseho, birimo, ku isonga, imvune nyinshi z’abakinnyi, byamukomye mu nkokora bituma adashobora guhita ayobora neza ikipe ngo ayikure mu bihe bikomeye”.

Vasilyev yanavuze ko muri uku kwezi kwa mbere hashobora kugurwa n’abandi bakinnyi mu rwego rwo kunganira umutoza Jardim.

Henri yahoze abica bigacika muri ruhago, aha yakiniraga ikipe ya Arsenal

 

Izindi wakunda

Bwiza.com