bwiza.com
Amakuru mu Rwanda

Rwamagana: Abaturage babangamiwe n’umwanda uva muri gereza

Abaturage bo  mu mudugududu wa Kingondo, mu kagari ka Karitutu, Umurenge wa Muhazi, mu Karere ka Rwamagana, baratakamba  basaba gutabarwa hagakemurwa ikibazo  cy’umwanda uva muri gereza ya Rwamagana ubangamiye ubuzima bwabo.

Uyu mwanda umanukana n’amazi akoreshwa n’abagororwa muri gereza ya Rwamagana unyujijwe mu miferenge mito. ndetse amazi agakomeza ajya mu gishanga kiri nko muri metero 400 uvuye kuri iyi gereza. Abayituriye bavuga bakavuga ko bibasirwa n’indwara bakeka ko ariho baba bazikura.

Bavuga ko hatagize igikorwa ubuzima bwabo bwakomeza kugana ahabi, ko amasazi akwirakwiza  umwanda akura mu mufurege akomeza kwiyongera, ugasanga atumuka mu bikoresho byabo byo mu ruko bakoresha.

Umuturage utuye muri metero 10 hafi y’umuferege muto wayobowemo ayo mazi, yemeza ko barwara indwara ziterwa n’umwanda bakeka ko baziterwa n’uva muri iyi gereza.

Yagize ati “Dukunze kurwara indwara zirimo inzoka, hari amasazi ava muri uriya mwanda akaza mu bikoni no mu nzu bigatuma twandura indwara, urebye bafata mwanda wo mu musarani bakawushyiramo amazi bikamanukana bikagera hano binuka kandi hari igihe babirekura ari byinshi ku buryo no kurya biba bidashoboka. Gereza idufashije yakora ibishoboka igakemura ikibazo cy’umwanda ndetse n’amazi biva muri iriya gereza”.

Undi witwa Mukeshimana Florien, yagize ati “Iki kibazo cy’umwanda uva muri gereza kiratubangamiye kuko na we urumva umunuko uhari kandi uriya mwanda ufite ingaruka ku buzima bw’abaturage batuye hano,  badufashije bashaka ahandi bazajya bayobora umwanda kuko gereza ifite isambu nini ku buryo bashobora kubyohereza ahandi batabyohereje hafi y’aho abaturage batuye”,

Umunyamabanga Nshingwabikorwa w’umurenge wa Muhazi, Muhamya Amani, avuga ko bagiye kubakorera ubuvugizi.

Yagize ati “Ntabwo icyo kibazo abaturage bigeze bakitugezaho, icyo tugiye gukora ubwo tukimenye tugiye kuganira n’ubuyobozi bwa Gereza, niba abaturage babangamiwe bazagikemura kuko gereza ifite ubushobozi ku buryo hari ikibazo bagikemura”.

Bamwe mu baturage bo mu murenge wa Ruramira bakoresha ayo mazi amanukana n’umwanda uva muri gereza ya Rwamagana

 

 

Izindi wakunda

Bwiza.com