bwiza.com
Amakuru Politiki

Rwamagana:Umuvunyi Mukuru yasigiye akarere ihurizo ryo gukemura uruhuri rw’ibibazo by’akarengane

Abaturage batuye mu mirenge ya Kigabiro ,Munyaga na Muhazi kuwa kabiri tariki ya 29 Mutarama bazindukiye ku kibuga cya Polisi bazanywe no kugeza ku Muvunyi Mukuru, Anastase Murekezi ibibazo bijyanye n’akarengane ariko abenshi muri abo baturage ntibabashije kugaragaza akarengane kabo bamwe muribo bataha batishimiye ko batabonye umwanya nkuko bagenzi babo bahawe umwanya .

Umuvunyi Mukuru, Anastase Murekezi, mbere yo kwakira ibibazo bishingiye ku karengane k’abaturage yabwiye abayobozi n’abaturage  ko Urwego rw’Umuvunyi rudasimbura izindi nzego zaba iz’ibanze cyangwa inzego nkuru za Leta ariko anavuga ko aho inzego zagize uburangare urwego rw’umuvunyi rukebura izo nzego byaba ngombwa abateshutse ku nshingano zabo bagiriwe inama ntibikosore bashobora no gusabirwa ibihano mu gihe bananiranye .

Abayobozi bo mu nzego z’ibanze banibukijwe ko bafite inshingano zo gukemura ibibazo by’abaturage  kandi bakabikemura mu mucyo batabogama bakirinda ruswa ahubwo bakita ku nyungu z’abaturage .

Mu bibazo Umuvunyi Mukuru yakiriye ahanini birimo ibishingiye ku masambu ndetse bamwe mu baturage bagiye bashinja abayobozi gukemura ibibazo bagendeye ku marangamutima gusa bikaviramo bamwe mu baturage kurengana .

Bamwe mu baturage bagiye barengana kubera kudasobanukirwa n’amategeko harimo n’abarangirijwe imanza nabi n’abahesha b’inkiko b’umwuga, barangizaga urubanza banyuranyije n’umwanzuro w’urukiko ariko ntibarege umuhesha w’inkiko w’umwuga mu gihe giteganywa n’itegeko cy’iminsi 60 urubanza rurangijwe .

Abagejeje akarengane kabo ku muvunyi mukuru ni bake ugeraranyije n’ubwinshi bw’abaturage bari ku murongo babyigana bashaka kurenganurwa n’umuvunyi mukuru.

Abatarakemuriwe ibibazo batashye batishimye basaba ko umuvunyi mukuru yazagaruka nabo bakamugezaho akarengane kabo.

Rukundo John umwe mu batashye bababajwe no kutavuga ikibazo cy’akarengane ke, yavuze ko kuba badahawe umwanya byatewe n’ibibazo byinshi ariko agasaba umuvunyi kuzagaruka nabo akabarenganura.

Yagize ati: “Birambabaje kuba nta mwanya ubonetse kugirango twese tuvuge akarengane kacu bibaye byiza umuvunyi yagaruka kuko twabonye ko ariwe wadufasha akarengane kacu kagakemuka kuko uburyo yakemuye ibibazo yabikoraga mu mucyo ku buryo ababashije kumugezaho akarengane yabafashije kuburyo batashye ibibazo byabo bihawe inzira yo kubikemura kandi aramutse yiyizira kenshi byatuma ibibazo by’akarengane bitaba byinshi.”

Hari bamwe mu baturage bavuga ko impamvu ibibazo byabo bitakemutse byatewe n’uko abayobozi bo mu tugari n’imirenge badakemura ibibazo uko bikwiye ahubwo bagakemura ibibazo bishakira inyungu zabo aho kwita ku nyungu z’abaturage .

Kuba hari inteko z’abaturage ndetse hari inzego z’ibanze nyamara hakaba hari abaturage bafite ibibazo hari abaturage babwiye Bwiza.com iyo haje abayobozi b’akarere nabwo abayobozi b’utugari n’imirenge bashyira kuri gahunda ibiganiro byinshi aho guhabwa umwanya abaturage bakagaragaza akarengane kabo ahubwo hagahabwa umwanya abashima bagataha batavuze ibibazo bibabangamiye .

Abaturage basanga umunsi wo kuwa 2 mu nteko z’abaturage hagomba gushyirwaho gahunda ituma abaturage bagaragaza akarengane kabo kandi guhishirana hagati y’abayobozi bo mu nzego z’ibanze bigacika abarangarana abaturage cyangwa babogama nabo bagahanwa.

Ubuyobozi bw’akarere burizeza abaturage ko ibibazo byabo babuze umwanya wo kubigeza ku muvunyi bazabikemura.

Umuyobozi w’Akarere wungirije ushinzwe Imibereho Myiza aragira: “Birumvikana ko abaturage bose baje ari benshi ntabwo byari gushoboka ko bose babaza ibibazo natwe nk’akarere  abagiye batabajije icyo nabizeza nuko tuzabikemura kuko hari inteko y’abaturage  ari abaje ndetse n’abataje bose ibyo bibazo byose ari ubuyobozi bw’akagari ,ubw’umurenge ndetse n’akarere tuzafatanya kubikemura kuko twe nk’ubuyobozi ntitwakishima mu gihe dufite abaturage bafite ibibazo.”

Umuvunyi mukuru Anastase Murekezi arasanga hari ibibazo biterwa n’uburangare bw’abayobozi.  Aragira ati: “Hari ibibazo biterwa n’uburangare bw’abayobozi niyo mpamvu tubasaba guhindura imikorere bagomba gukora neza kuko mu tugari niho abaturage batuye ,twabwiye abayobozi ba Rwamagana ko ibibazo tutakemuye bagomba kubikemura ,ibibazo byinshi bigaragara ko bishobora gukemuka hari ibyo mu nzego z’ibanze bashobora kubonera ibisubizo ibyo twabasabye kubikemura ,natwe urwego rw’umuvunyi tuzajya tumanuka mu mirenge dufatanye gushakira ibisubizo ibibazo bihari.”

Urwego rw’umuvunyi kuva tariki 29 kugeza kuri 31 Mutarama rwagombaga gukemura ibibazo by’akarengane mu turere twa Rwamagana mu Ntara y’Iburasirazuba na Gakenke mu Ntara y’Amajyaruguru .

 

Izindi wakunda

Bwiza.com