bwiza.com
Amakuru Mu mashuli

Nyamasheke: Abakobwa biga muri GSFAK babangamiwe n’uburyo bararamo

Hashize ibyumweru bibiri mu rwunge rw’amashuri rwa Frank Adamson rwa Kibogora( GSFAK) mu murenge wa Kanjongo mu karere ka Nyamasheke inkongi y’umuriro yibasiye inyubako  abakobwa  bagera kuri 280 bararagamo, irashya irakongoka ntibagira na kimwe barokora mu byarimo byose mu gice cyahiye, aba bakobwa bakaba bavuga ko uburyo baryamamo buteye inkeke kuko  barara ari batatu.

Nk’uko umuyobozi w’iri shuri w’agateganyo Uwihoreye Boaz yabisobanuriye Bwiza.com ubwo  muri iri shuri haberaga inama yaguye yahuje ubuyobozi bw’akarere,ubw’itorero Méthodiste Libre mu Rwanda ari bwo nyir’ishuri n’izindi nzego zose zirebwa n’uburezi muri aka karere hashakishwa icyakorwa ngo  iyi nyubako yahiye isanwe cyangwa habe hakubakwa inshya n’abana bashumbushwe ibikoresho byabo byahangirikiye, ngo uburyo iyi nyubako yagiye ishya mo bwabaye amayobera.

Uyu muyobozi avuga ko, habanje gushya igice kimwe ku wa 20 Mutarama uyu mwaka mu ma saa yine z’amanywa abana bitegura kujya gusenga barakizimya bibwira ko birangiye, ku wa 23 Mutarama mu masaha nk’ayo nanone abana bavuye gukina bagiye gusubira mu mashuri babona n’ubundi umwotsi mwinshi muri iyo nyubako,bagiye kubera basanga yose iri gushya, barazimya ku bufatanye n’izindi nzego biba iby’ubusa irinda ikongoka igice cyayo cyo haruguru n’ibyari mo byose.

Yagize ati’’ kugeza ubu kumenya icyayitwitse biracyatubereye amayobera ariko iperereza riracyakomeza,natwe abana twabaye tubacumbikiye mu nzu nto zari zihari zirimo iyari ububiko bw’ibikoresho by’ishuri n’icyari icyumba cy’amasengesho,ku buryo natwe tubona ko batarara neza,ariko nta kundi twari kubigenza  ngo  amasomo adahagarara.’’

Niyobyose Anita wiga mu mwaka wa 5 ashima ubuyobozi bw’itorero Méthodiste Libre mu Rwanda uburyo bwahise bubatabara  bukabaha ibikoresho by’ibanze kuko  bari basigaranye imyenda bari bambaye bari mu ishuri gusa, ubu bakaba bagenda babona bimwe mu by’ibanze bakenera ngo babashe kwiga neza, agasaba ko ibyabo byose byangirikiye mo babyishyurwa,dore ko bivugwa n’ubuyobozi bw’ishuri ko bamaze kubarura ibikoresho by’abana by’agaciro k’arenga 11.000.000 z’amanyarwanda byahangirikiye.’’

Ati’’ uburyo turara mo ni kibazo rwose kuko turara tubyigana,aho ku tumatora duto baduhaye  dusasa hasi mu twumba duto cyane tutabigenewe usanga abana 3 bararanye ku kamatora kamwe kwinyagambura ari ikibazo ntidusinzire neza, tukifuza ko batwubakira vuba bakanadusubiza ibyo twatakarije muri iriya nyubako.’’

Ibi babyemeranywa ho na nyiri ishuri,Nyiricyubahiro Musenyeri Samuel Kayinamura, umwepisikopi w’iri torero mu Rwanda aho avuga ko bikimara kuba itorero ryahise ritanga agera kuri miliyoni 4 zo kubagurira ibikoresho by’ibanze, buri mwana akazasubizwa ibyo yahatakarije kuko byamaze kubarurwa, bakaba banakomeje gufatanya n’izindi nzego zirimo ubuyobozi bw’akarere n’abakristo b’iri torero n’inzego z’imirimo zose zirikorera mo ngo harebwe icyakorwa abana babonerwe inyubako nziza barara mo bitumen barusha ho kwiga neza,n’abana akaba yarabahumurije anahumuriza ababyeyi babo ko imyigire ikomeje nta kibazo.

Mbere y’uko iyi nyubako ishya iri shuri ryavuzwe mo ibindi bikorwa  nko kwiba ibendera ry’igihugu muri 2015 abaryibye bakaba barayoberanye, kuba haragaragaye inyandiko z’ingengabitekerezo ya Jenoside inshuro 2 mu bwiherero bw’abakobwa muri 2017 na 2018 abazanditse ntibamenyekane, hari ababihuza n’uku gushya  bakavuga ko hari ababa babyihishe inyuma nubwo hari habanje kuvugwa insinga z’amashanyarazi, ubuyobozi bw’akarere n’ubw’iri torero bukavuga ko hategerezwa icyo iperereza rizatanga,bakareka kubivuga ho byinshi.

Ibikoresho by’abana b’abakobwa byose byarahiye birakongoka
Abayobozi batandukanye bahumuriza abanyeshuri banabasaba gukomeza amasomo nta mpungenge
Iyi nyubako niyo abakobwa 280 bararagamo

Izindi wakunda

Bwiza.com
error: Alert: Ntabwo byemewe!!