bwiza.com
Amakuru Ubukungu

Gicumbi: MTN na banki y’abaturage byafungiwe imiryango

Ibiro by’Ikigo cy’itumanaho cya MTN, ishami rya Gicumbi hamwe na Banki y’abaturage, ni bimwe mu byafungiwe imiryango bisabwa gukorera mu nyubako zijyanye n’icyerekezo cy’umujyi wa Gicumbi.

Ibi bigo kimwe n’abandi bacururizaga mu mujyi wa Byumba bari barahawe iminsi 30 yo kuba bashatse ahandi bakorera ibikorwa byabo, basabwa kubaka cyangwa bagashaka ahandi bakodesha ariko ari mu magoroba.

Itangazo rimanitse ku muryango wa Banki y’abaturage mu Mujyi wa Gicumbi, rigira riti “Nk’uko ubuyobozi bw’akarere ka Gicumbi bwabikumenyesheje, iyi nzu nyiyemerewe gukorerwamo kuva ku wa 01/01/2019 kuko ariyo tariki yo gutangira kubaka inyubako zijyanye n’icyerekezo cy’Umujyi wa Gicumbi”.

Iri tangazo ryashyizweho umukono ku wa 31 Ukuboza 2018, n’Umuyobozi w’akarere ka Gicumbi, Ndayambaje Felix.

Ubuyobozi bw’akarere ka Gicumbi ngo bwari bwafashe umwanzuro wo gufunga izi nzu mu ntangiriro z’ukwezi gushize ariko kubera ko abazikoreramo bari basabye guhabwa ukwezi kumwe bakaba bimukiye mu nzu zuzuye zijyanye n’igihe (amagorofa) gufungirwa biba bahagaze, nyuma yaho igihe bahawe kirangiriye bakaba bafungiwe.

Umuyobozi w’akarere ka Gicumbi, Ndayambaje Felix yabwiye itangazamakuru ko nka banki bagakwiye gushaka uburyo abakiriya babo babonamo serivisi kuko ibyo basabwe batabishyize mu bikorwa ukwezi kukaba gushize nta n’imbogamizi iyi banki yagaragarije ubuyobozi.

Meya Ndayambaje akomeza avuga ko nabo bari bugire icyo bakora kuko abaturage bagomba kubona serivisi ariko na none hatabayeho kwica amabwiriza yashyizweho.

Si abakeneye sirivisi muri banki y’abaturage gusa babangamiwe n’iri fungwa rya zimwe mu nzu z’ubucuruzi, kuko abafungiwe ni benshi kandi bataka ibihombo bazagira mu gihe bazaba batarabona aho bakorera cyangwa ngo babone ubushobozi bwo kubaka amagorofa. Bamwe basabwa kujya gukorera mu igorofa ryuzuye ry’Abapoloso.

Izindi wakunda

Bwiza.com