bwiza.com
Ahabanza » Nyamasheke: Yapfuye urw’amayobera nyuma y’ibyumweru bitatu umugabo we yishwe
Amakuru mu Rwanda

Nyamasheke: Yapfuye urw’amayobera nyuma y’ibyumweru bitatu umugabo we yishwe

Abana babiri bakuru, mu muhango wa gushyingura nyina

Mu mudugudu wa Rusambu, akagari ka Kanazi, umurenge wa Ruharambuga mu karere ka Nyamasheke haravugwa inkuru y’urupfu rw’amayobera rwa Nyiransabimana Betty  wari ufite imyaka 31 y’amavuko, rubaye hashize ibyumweru bitatu umugabo we, Munyaneza Onesphore w’imyaka 32 y’amavuko yishwe atewe icyuma n’abagizi ba nabi.

Nk’uko Bwiza.com yabitangarijwe n’umunyamabanga nshingwabikorwa w’akagari ka Kanazi, muri uyu murenge, ngo kuri uyu wa kabiri ushize nyakwigendera yari ari mu rugo mu ma saa tanu n’igice  z’amanywa amaze akanya avuye kugemurira umuturanyi we wari urwariye ku kigo nderabuzima  cya Kamonyi  begeranye, arimo aganira n’abaturanyi be mu rugo iwe harimo n’abarimo bamwubakira urugo,ababwira ko yumva atangiye kumererwa nabi, ko yumva bamujyana kwa muganga.

Ngo bahise bamujyana ku kigo nderabuzima cya Kamonyi aho yahise agwa, uru rupfu ngo rukaba rwabereye abaturanyi n’ubuyobozi amayobera,cyane cyane ko bavuga ko nta ndwara yindi bazi yaba yari afite,gusa ngo nyuma yo kubura umugabo we yishwe ku maherere na bariya bagizi ba nabi yatangiye guhindura imico gahoro gahoro,bakabona asa n’uwigunze,bakibaza niba ari ho yaba yakuye uru rupfu rutunguranye,niba hari indwara itazwi yari afite cyangwa niba hari ikindi cyaba kibyihishe inyuma.

Yagize ati “Uru rupfu twese rwatubereye amayobera kuko nta ndwara yindi tuzi yari afite, uretse kuba wabonaga  asa n’aho kwakira urupfu rw’umugabo we byamugoye,ariko natwe dutegereje ibiva mu bisubizo by’abaganga bo mu bitaro bya Bushenge umurambo we wahise ujyanwa,ndumva nta kindi twabivugaho.’’

Ikibazo  gisigaye gikomereye abaturage n’ubuyobozi ni icy’abana  batatu b’uyu muryango, dore ko umukuru  afite imyaka 10 gusa yiga mu wa 5 w’amashuri abanza,umukurikiye w’imyaka 8 yiga mu wa 2 n’aho umuto afite imyaka imyaka ibiri n’igice.

Babiri babanza ni abahungu uwa 3 ni umukobwa, kandi abo mu muryango wa nyakwigendera hafi ya bose bakaba barishwe muri Jenoside yakorewe abatutsi,  umugabo we, nawe umuryango we ukaba ngo utishoboye  ku buryo kurera aba bana basigaye na byo ngo ari ikibazo,kandi na ba nyakwigendera bombi barabaga ho mu mibereho iciriritse cyane.

Umwe mu bo mu muryango w’umugabo yabwiye Bwiza.com ati’’ Tuhangayikishijwe cyane n’imibereho ya bariya bana kuko turatekereza ko bajyanwa kwa sekuru ubyara se kuko  abenshi mu muryango w’umugore bahitanywe na Jenoside yakorewe abatutsi kandi uwo sekuru w’abo bana na we ubwe nta bushobozi bwo kubatunga afite,tukifuza ko ubuyobozi bwagira icyo budufasha izo mfubyi ntiziteragirane.’’

Umunyamabanga Nshingwabikorwa w’umurenge wa Ruharambuga, Dukuzumuremyi Anne-Marie, avuga ko ubuyobozi bugiye gukurikiranira hafi imibereho y’aba bana, umuryango wakwemeza ko basanga sekuru kandi bigaragara ko atishoboye akaba yafashwa kubarera  mu buryo n’abandi batishoboye bose bafashwa mo, akaba yahabwa inka muri gahunda ya girinka n’ubundi buryo bwose bwashoboka ariko abana  ntibabe ho nk’abatagira kivurira.

Umurambo wa nyakwigendera washyinguwe mu marira menshi cyane mu ma saa tanu n’igice zo kuri uyu wa Gatatu, tariki ya 6 Gashyantare 2019, abaturage b’aka kagari baganiriye na Bwiza.com bakaba bagaragaje guhangayikishwa bikomeye n’imibereho y’izi mfubyi aba babyeyi bombi  bapfuye urutunguranye basize.

Abana babiri bakuru, mu muhango wa gushyingura nyina
Babiri mu bana batatu uyu muryango usize 

Urupfu rwa Nyiransabimana Betty rwabaye amayobera

Nyiransabimana Betty yapfuye urupfu rw’amayobera nyuma y’ibyumweru 3 umugabo we yishwe n’abagizi ba nabi

Izindi wakunda

Bwiza.com