bwiza.com
Ahabanza » Rusizi: Ababyarira ku Kigo Nderabuzima cya Gikundamvura baratabaza
Amakuru mu Rwanda Ubuzima

Rusizi: Ababyarira ku Kigo Nderabuzima cya Gikundamvura baratabaza

Ababyeyi babyarira ku kigo nderabuzima cya Gikundamvura mu murenge wa Gikundamvura mu karere ka Rusizi barifuza ko Minisitiri w’ubuzima yabasura akareba  ingorane zikomeye babyariramo kubera kutagira umuriro w’amashanyarazi.

Aba babyeyi bavuga ko bajya kubyara bitwaje udutadowa, utagafite  akajyana agatelefoni acanisha cyangwa agatoroshi, ibi bakabibonamo ibyago ku buzima bwabo ndetse n’abana babyara.

Ubwo Bwiza.com yageraga kuri iki kigo nderabuzima kimaze imyaka hafi 10 gikorera muri uyu murenge mu buryo abaturage bavuga ko bugoye cyane kubera kutagira amashanyarazi, bamwe mu bagore bari baje kuhabyarira n’abamaze iminsi babyaye, bavuze ko kuhabyarira  nijoro ari zo ngorane za mbere zisumba izindi bahuza na zo muri uyu murenge.

Nyiraminani Xavérine wo mu kagari ka Kizura, wari wagiye kuhabyarira, yagize ati ’’Mfite impungenge zo kuzabyarira hano hantu kuko ntegereje kubyara kandi nta gatadowa nazanye. Ni inda ya kabiri, nje kuhabyarira, iya mbere nayo nayibyaye mpangayitse cyane kuko nk’iyo mufashwe n’inda icyarimwe muri babiri nijoro muba mufite ibyago byinshi byo kuhasiga ubuzima cyangwa kubyara umwana ufite ibibazo, kubera ko muganga aba afite itara rimwe, arivana kuri umwe arijyana ku wundi undi asigara mu kizima, ku buryo n’umwana uvutse ashobora kuvukana ibibazo.’’

Mugenzi we  wari umaze icyumweru ahabyariye na we yagize ati’’ Turifuza ko Minisitiri w’ubuzima yamanuka akaza kureba uburyo tubyaramo hano kuko buteye agahinda. N’iyo umaze kumubyara kugira ngo uzamwonse hatabona biragorana, koga nijoro hano ni nk’ikizira kuko haba hatabona, kujya mu bwiherero nijoro ni ukugenda umurikisha agatara wizaniye kandi buri kure, kuko ikigo nderabuzima kitanazitiye ugendana ubwoba nta n’imbaraga ufite, ngasanga bakwiye kuduha amashanyarazi rwose.’’

Umucungamutungo w’iki kigo nderabuzima Musabyimana Festus, avuga ko  bavuga ukuri, ko haniyongeraho ko  na moteri (Generator) bari bahawe na Global fund inywa kurenza ubushobozi bwabo bakaba barahisemo kuyihorera.

Ati ’’ Kutagira amashanyarazi hano bifite ingaruka nyinshi kuri serivisi dutanga nk’uko babivuga, kuko  nk’iyo izuba ryabuze kiba ikibazo ku matara y’imirasire y’izuba kandi na yo ntanahagije, bikaba ngombwa ko bizanira udutadowa cyangwa udutoroshi bakoresha kandi umubyeyi kukabyariraho namwe murumva ingorane zirimo”.

Umuyobozi w’aka karere wungirije ushinzwe imibereho myiza y’abaturage, Nsigaye Emmanuel, avuga ko umushinga wagombaga kugeza amashanyarazi muri uyu murenge, kimwe n’indi bihana imbibe usa n’uwabanje kudindira ariko ko ibikoresho ngo byabonetse ku buryo bigenze neza uyu mwaka warangira ahari kigakemuka.

Aba babyeyi bavuga ko kubyarira kuri iki kigo nderabuzima nijoro ari ugukubitika
Izi mashini zishyushya abana bavutse bananiwe zinabongerera umwuka, ntacyo zimara iyo zidakoreshejwe amashanyarazi
Kugera kuri ubu bwiherero ngo biba bigoye cyane kubera ko haba hatabona ari na kure 
Bavuga ko kujya kubyarira kuri iki kigo nderabuzima bisaba kwizanira agatadowa

Izindi wakunda

1 Igitekerezo

Alias Nduwanyu 06/02/2019 7:45 pm at 7:45 pm

Kuvugako birihafi gukemuka ni imvugo imaze kumenyerwa no kurambirana. Gusa ugukanira ngo nawe umenya urugukwiye!

Subiza

Tanga Igitekerezo

Bwiza.com
error: Alert: Ntabwo byemewe!!