bwiza.com
Ahabanza » U Rwanda ntabwo ruhagaze neza ku rwego rw’akarere – Depite Frank Habineza
Amakuru mashya Featured INKURU TWABAHITIYEMO

U Rwanda ntabwo ruhagaze neza ku rwego rw’akarere – Depite Frank Habineza

Umudepite akaba n’Umuyobozi w’Ishyaka Riharanira Demokarasi n’Ibidukikije (Green Party), Frank Habineza atangaza ko u Rwanda rudahagaze neza mu rwego rw’akarere ka Afurika y’Iburasirazuba ruherereyemo ugereranyije n’uko bimeze ku rwego mpuzamahanga.

Mu kiganiro cyihariye yagiranye  na Bwiza.com kuwa Mbere tariki 4 Gashyantare 2019 kuri hoteli Meridiye (Merdien), Frank Habineza yavuze ko u Rwanda muri rusange ruhagaze neza ku ruhando mpuzamahanga ugendeye ku itorwa rya Louise Mushikiwabo nk’Umunyamabanga Mukuru w’Ibihugu bikoresha Igifaransa (OIF), Ubuyobozi bwa Perezida Kagame mu Muryango wa Afurika Yunze Ubumwe (AU) ariko ko hakiri ikibazo mu mibanire n’ibindi bihugu byo mu karere.

Yagize ati “  U Rwanda ku rwego mpuzamahanga ruhagaze neza kubera ko nko mu mwaka ushize waje kurangira Louise Mushikiwabo ayoboye Francophonie, Perezida Kagame ayoboye Umuryango w’Ubumwe bwa Afurika, abaperezida benshi basuye u Rwanda. Ariko ku rwego rw’akarere ntabwo bimeze neza.  Turacyafitanye ibibazo n’Ubugande n’Uburundi bitaracyemuka. Navuga ko hari intambwe nziza ku rwego mpuzamahanga ariko ku rwego rw’akarere haracyari intambwe igomba guterwa kugira ngo ibibazo bikemuke.”

Iyi ntumwa ya rubanda itavuga rumwe n’ubutegetsi ivuga ko kuba u Rwanda rugifitanye ibibazo na Uganda ndetse n’Uburundi byagize ingaruka ku baturage barwo bidasize n’abaturanyi.

Ati “ Abaturage barahomba cyane. Nk’ubu nk’iki kibazo cyibura ry’isoko  ry’amata kiri mu turere dutandukanye mu Rwanda,kuko urabona uruganda dufite rw’Inyange ntirwakira amata ku wa Gatandatu no ku Cyumweru ntirwakira amata. Yabaye menshi cyane, abaturage barimo barayamena [kuyabogora]. Ariko kera tugikorana neza na Uganda ntibyabagaho. Bayoherezaga za Kabale, Mbarara, ngira ngo na Kampala yageragayo.”

Habineza Frank avuga ko uretse guhomba ku ruhande rw’ubuhahirane na Uganda, hari n’igihombo gituruka ku kudahahirana n’u Burundi.

Ati “ Abaturage bari hafi y’umupaka barabizi kuturusha. Twabonaga ibintu byinshi bivuye mu Burundi, nk’amafuruwi [fruit], indagara, ubu zarabuze. Nabo [Abarundi] bafite ibyo babonaga bivuye mu Rwanda babuze. Kudahahirana bitewe n’ibibazo biba bihari, bituma Abanyarwanda, Abagande ndetse n’Abarundi bahomba.”

Reba ikiganiro yagiranye na Bwiza TV

Mu kugira icyo asaba Leta z’ibi bihugu yagize ati “ Twifuza ko abayobozi b’izi Leta bakwicara bagacoca ibibazo bihari bakabirangiza.

Umubano mubi hagati y’u Rwanda na Uganda watangiye mu mpera z’Umwaka wa 2017. Uganda yashinjaga u Rwanda kwinjiririra inzego z’umutekano zayo no gushimuta impunzi z’Abanyarwanda zahahungiye.

Ibi birego u Rwanda rwabihakanye rwivuye inyuma gusa ibi ntibyakuyeho ko inzego z’umutekano zakomeje guta muri yombi no gukorera iyicarubozo bamwe mu Banyarwanda zibashinja kuba intasi.

U Rwanda narwo rwashinje Uganda kwifatanya n’abashaka kuruhungabanyiriza umutekano barimo Kayumba Nyamwasa ariko Uganda irinumira.

Umubano w’u Rwanda n’Uburundi watangiye kuzamba mu 2015. Ibihugu byombi bishinjanya gucumbikira abagambiriye guhungabanya umutekano wa buri ruhande.

Gusa buri ruhande rubitera utwatsi ahubwo buri gihe hakabaho kwitana bamwana ari nako buri gihugu gihagarika ibicuruzwa byinjiraga bivuye kuri buri ruhande, ingingo ituma abaturage babonaga amaramuko babikesheje kwambuka umupaka babihomberamo.

 

 

 

 

 

Izindi wakunda

Bwiza.com