bwiza.com
Amakuru mashya

Abandi Banyarwanda biganjemo abagore birukanwe ku butaka bwa Uganda

Polisi ya Uganda yasubije iwabo abagore batandatu b’Abanyarwanda n’abana babo babiri ndetse n’umugabo umwe bari bamaze iminsi iri hagati y’umwe n’itandatu bafungiwe  ku mupaka wa Cyanika mu Karere ka Kisoro.

Aba banyarwanda birukanwe ku butaka bwa Uganda kuwa Gatatu tariki ya 6 Gashyantare 2019. Muri aba harimo uwitwa Namahoro Assuma w’imyaka 37 ukomoka mu Karere ka Musanze.

Uyu nk’uko Virunga Post ibitangaza, yari amaze imyaka 22 atuye mu Karere ka Masaka aho yashakiye, akaba yarafunzwe umunsi umwe. Yahise yoherezwa mu Rwanda nyuma yo gufungurwa.

Undi ni Muhirwa Jean Paul w’imyaka 33 wo mu Karere ka Burera. Asanzwe akora ubucuruzi bwambukiranya umupaka wa Gisoro, akaba yarafunzwe iminsi itandatu.

Abanyarwanda birukanwe ku butaka bwa Uganda/ Ifoto: Virunga Post

Yankurije Florentine w’imyaka 33 ukomoka mu Karere ka Gakenke. Asanzwe atuye ahitwa  Bunyoro aho yashakiye. Yafunganwe n’umwana we, Jackson Kabalisa w’imyaka itanu ubwo yari aje gusura umuryango we.

Abandi ni Tuyisenge Beatrice ukomoka i Rubavu wafunganwe n’umwana we w’umwaka umwe witwa, Isaac Irampumuriza. Annonciata Nyiramahirwa nawe yafunzwe ubwo yashakaga gusura musaza we utuye mu Karere ka Kyankwanzi muri Uganda.

Aba banyarwanda barekuwe na polisi basubizwa mu gihugu cyabo kuko ngo bari abere.

Bamwe mu Banyarwanda bakomeje gutabwa muri yombi bagasubizwa iwabo. Mu mpera z’icyumweru gishize, Uganda yirukanye ku butaka bwayo,  Umunyarwandakazi Annie Tabura Bilenge imushinja kuba intasi y’u Rwanda mu gihe cy’imyaka isaga itandatu.

 

 

 

 

 

Izindi wakunda

Bwiza.com