bwiza.com
Ahabanza » Nyamasheke: Abagore n’urubyiruko barasabwa kurangwa n’umuco wo kwigira
Amakuru Ubukungu

Nyamasheke: Abagore n’urubyiruko barasabwa kurangwa n’umuco wo kwigira

Urubyiruko rwiga ubudozi rwagaragarije aba bafatanyabikorwa ikibazo cy'aho kwigira hato n'ibikoresho bikiri bike ugereranije n'umubare wabo ngo bikorerwe ubuvugizi

Guverineri w’Intara y’Uburengerazuba, Munyantwali Alphonse arakangurira  urubyiruko rwiga imyuga itandukanye mu kigo cy’urubyiruko cya Nyamasheke n’abagore badoda imyenda bakanaboha ibikapu bibumbiye muri Koperative  ‘Duharanire Ubuzima Twiteza Imbere’ baterwa inkunga n’umuryango World Vision, guharanira kwigira no kubyaza umusaruro bike bafite,aho guhora bumva ko bazahora bafashwa, bagaharanira  kugera ku rwego rwo gufasha abandi.

Yabibabwiye ubwo, ku bufatanye n’ubuyobozi bwa World vision mu Rwanda n’abafatanyabikorwa bawo  b’abanyamerika hasurwaga ibikorwa  by’abagore n’urubyruko uyu muryango utera inkunga muri aka karere,aho bareberaga hamwe intambwe abagenerwabikorwa bamaze gutera mu iterambere,imbogamizi  bagihura na zo n’icyakorwa ngo barusheho gutera imbere hakurikijwe icyerekezo cy’igihugu cyo kugeza abaturage bose ku iterambere rirambye.

Nk’uko Bwiza.com yabitangarijwe n’umuyobozi w’ibikorwa by’uyu muryango mu Rwanda, Sentozi Ananias, ngo aba bafatanyabikorwa bafatanya gusura ibikorwa by’urubyiruko n’abagore batera inkunga muri aka karere bayobowe n’icyamamare mu gukina amafilimi muri Leta zunze ubumwe za Amerika Patricia Heaton na mugenzi we We MC Donald,umuririmbyi na we w’icyamamare muri kiriya gihugu,  urugendo rwabo rukaba ngo rwaraturutse ku rwo madamu Jeannette Kagame yagiriye yo mu mpera z’umwaka ushize akabakundisha uRwanda.

Ngo byari mu nama mpuzamahanga y’uyu muryango yabereye i New York muri Leta Zunze Ubumwe za Amerika yari yanatumiwemo Madamu Jeannette Kagame,aho yatanze ikiganiro ku kwiyubaka k’u Rwanda nyuma ya Jenoside yakorewe abatutsi,aboneraho guhura n’ibi byamamare abikundisha u Rwanda byari bisanzwe bitera inkunga binyuze muri uyu muryango byiyemeza kurusura ngo birebe n’aho ibikorwa bitera inkunga bigeza abaturage.

Ati “Turabafatanya na bo gusura ibikorwa bitandukanye uyu muryango utera inkunga mu Rwanda, muri Nyamasheke tukaba twasuye itsinda ry’urubyiruko ryiga imyuga itandukanye,tureba aho bageze biga, ibibazo bafite n’uburyo bikemurwa, twishimira ko abarangiza bihangira imirimo bagateza imbere imiryango yabo, tunasura abagore bafashijwe bari mu bukene bukabije cyane, bahabwa ibikoresho bihangira imirimo itari iy’ubuhinzi,ubu bageze ku iterambere rishimishije.’’

Icyakora aba bagore n’urubyiruko bagaragaraza imbogamizi bagihura na zo nko kuba uru rubyiruko rwigira  mu murenge wa Kagano rudafite amazu ahagije rwigira mo kuko ruza ari rwinshi kandi aho rwigira ari hato cyane, kuba ikigo nk’iki muri aka karere ari kimwe gusa,abakigana baturutse  mu mirenge ya kure bakabura aho bacumbika bakifuza ko babonerwa amacumbi cyangwa ibigo nk’iki bikiyongera,kuba ibikoresho bigira ho bikiri bike cyane bimwe bakabibyiganira ho,abigisha bake kubera uburyo bwo kubahemba bukiri hasi n’ibindi.

Abagore na bo ngo baracyakorera mu nyubako bakodesha kandi ibatwara menshi bataragira ubushobozi buhagije no kuba batarabona isoko rishimishije ry’ibyo bakora, ibi byoseuyu muyobozi Sentozi Ananias akavuga ko ku bufatanye n’akarere ibishoboka bizakorwa ariko na bo bakabyaza umusaruro ibihari,aho guhora basaba ubushobozi kandi hari ubwo bahawe bakwiye kubyaza umusaruro.

Guverineri w’Intara y’uburengerazuba, Munyantwali Alphonse, nyuma yo gushimira madamu Jeannette Kagame imikoranire myiza n’aba bafatanyabikorwa, yasabye abagenerwabikorwa  kugira umuco wo kwishaka mo ibisubizo.

Ati “Ibintu byose ntimwabihabwa ngo bishoboke,mugire umuco wo kwishaka mo ibisubizo,ibyo mubonye mubibyaze umusaruro ufatika bibahe ibindi,ibyo mudashoboye natwe nk’intara n’akarere tuzajya tubunganira ariko intambwe ya mbere ari mwe mwayiteye.’’

Aka karere kagikennye cyane mu gihugu,umuyobozi wako Kamari Aimé Fabien avuga ko imwe mu ngamba zo kukazahura ari uguteza imbere ibikorwa by’abagore n’urubyiruko bidashingiye ku buhinzi,akabasaba kubigaragara mo ari benshi,ahari intege nke bakunganirwa.

Abafatanyabiikorwa Patricie Heaton( iburyo) na We Mc Donald( ibumoso) bifaatanya n’abagore bo mu kagari ka Shara mu murenge wa Kagano mu kuboha ibikapu
Urubyiruko rwiga ubudozi rwagaragarije aba bafatanyabikorwa ikibazo cy’aho kwigira hato n’ibikoresho bikiri bike ugereranije n’umubare wabo ngo bikorerwe ubuvugizi
Urubyiruko rwiga kuboha imisatsi ruvuga ko ubuto bw’aho bwigira budatuma rwiga neza rwisanzuye
Nyuma yo kwakirwa n’umuyobozi w’akarere ka Nyamasheke, Kamari Aimé Fabien barakomeza no mu bindi bice by’igihugu bareba aho imishinga batera inkunga igeze iteza imbere abaturage

Izindi wakunda

Bwiza.com