bwiza.com
Amakuru Politiki

Venezuela: Amerika ngo ntacyo igifite cyo kuganira na Perezida Maduro kitari ukuva ku butegetsi

Intumwa ya Leta Zunze Ubumwe za Amerika muri Venezuela, Eliot Abrams, avuga ko umwanya wo kuganira na Nicolas Maduro warangiye kera hasigaye kumvikana ko ava ku butegetsi.

Ibi bwana Abrams yabitangarije abanyamakuru kuri uyu wa Kane, avuga ko Perezida Maduro afite ibihugu by’inshuti nk’u Burusiya na Cuba ndetse n’ibindi atavuze byemeye kumuha ubuhungiro.

Hagati aho, minisiteri y’ububanyi n’amahanga ya Leta Zunze Ubumwe za Amerika iravuga ko iki gihugu cyohereje imfashanyo z’ibyo kurya n’imiti ndetse n’ibindi muri Venezuela kuko byasabwe na Juan Guaido watangaje ko ari we mukuru w’igihugu.

Iyi nkuru dukesha Ijwi rya Amerika ikaba ivuga ko Maduro yohereje ingabo zo guhagarika izo mfashanyo ku kiraro gihuza Colombia na Venezuela.

Abadiplomate b’abanyabulayi n’ibihugu byo muri Amerika y’Epfo kuri uyu wa kane bakaba barateraniye muri Uruguay bavuga ko ibibazo biri muri Venezuela bikwiriye gushakirwa umuti hatamenetse amaraso kandi nta banyamahanga babigiyemo bigakorwa n’Abanya-Venezuela ubwabo.

Ibibazo bya politiki bijyanye n’ukwiye kuba Perezida wa Venezuela byatangiye kuwa 10 Mutarama 2019, ubwo  uruhande rutavuga rumwe n’ubutegetsi rwiganje mu nteko ishinga amategeko rwemezaga ko itorwa rya perezida Nicolas Maduro ryo mu 2018 ritemewe ahubwo rukemeza Juan Guaido nka perezida w’agateganyo w’iki gihugu.

Ibyavuye mu matora y’umukuru w’igihugu muri Venezuela yo muri Gicurasi 2018 byamaganiwe kure bikomeye, Inteko Ishinga Amategeko itesha agaciro itorwa rya Maduro ku munsi yagombaga kurahiriraho. Kuva ubwo hahise hatangira imyigaragambyo y’abaturage batakifuza ko Maduro aguma ku butegetsi.

 

Izindi wakunda

Bwiza.com
error: Alert: Ntabwo byemewe!!