bwiza.com
Ahabanza » MissRwanda 2019, yaba imboni ku gipimo cy’ubumwe n’ubwiyunge?
Featured IBITEKEREZO

MissRwanda 2019, yaba imboni ku gipimo cy’ubumwe n’ubwiyunge?

Niba hari ikintu kitajya cyoroha mu Rwanda ni ukuvuga ku kibazo cy’amoko kubera uburemere bwacyo n’umwanya gifite mu mateka y’igihugu bishobora gutuma ubivuzeho aregwa ingengabitekerezo ya Jenocide ari nabyo bitera benshi kudahangara kubivugaho. Aha umuntu akaba yakwibaza ko niba ubumwe n’ubwiyunge bwarageze ku ikigero cya 95% nkuko byavugwaga ko kizahagera mu 2017, ese ingengabitekerezo yagaragaye muri MissRwanda ntikwiye kubera igipimo abashakashatsi n’abafite mu inshingano Ndi umunyarwanda na gahunda y’ubumwe n’ubwiyunge ndetse na Komisiyo y’Igihugu yo kurwanya Jenoside ?

Natangira mvuga nti , mu Rwanda ntibyoroshye kuvuga amoko, kuko nyuma ya Jenoside yakorewe Abatutsi muri Mata 1994, hagiyeho gahunda zo kwigisha gahunda z’ubumwe n’ubwiyunge bityo ntamuntu watekerezaga ko nyuma y’imyaka 25 wakumva hari abakibigenderaho duhereye k’ubushakashatsi bwagiye bukorwa. kuvuga umuhutu, umututsi cyangwa umutwa, ukavuga abavuye mu karere aka n’aka cyangwa igihugu iki n’iki bishobora kutaguhira bikakubera bibi ukaba wanarya uburoko kuko bitemewe kuvugwaho mu gihugu. Abantu bagatinya kubivugaho mu ruhame ariko bakwiherera bakabivugaho cyangwa batanabivugaho bakabitekerezaho.

Umuyobozi ashyirwaho yaba uw’inzego za leta cyangwa umushumba w’itorero ntibibuze abantu kwibaza ibyo bibazo. Mu Rwanda kirazira kubivuga ariko kubitekereza mu mitima sinzi ko kubirwanya mu Rwanda ari ikintu cyoroshye. Ubu buryo u Rwanda rwahisemo rushingiye ku mateka ya Jenocide yarubayemo muri 1994, mu rwego rwo gukangurira abanyarwanda kutibonamo amoko ahubwo bakibonamo ubunyarwanda mbere ya byose.

Umuntu akaba yakwibaza niba uko guhitamo kwaratanze uwuhe musaruro, uko waba ungana, n’ibipimo bibyemeza! Nta bisubizo umusomyi w’iyi nkuru agomba kwitega kuri ibyo bibazo nibajije kuko burya ibintu bibera imbere mu mitima bishingira kumarangamutima utapfa kubisubiza utabikoreye ubushakashatsi nubwo nabwo utapfa kwizera ibyabuvuyemo bitewe nawe icyo uricyo kuko ibibazo ( questionnaire) bishobora gutegurwa n’ufite nawe amarangamutima ashingiye kuri ayo mateka mabi, bikaba byamutera kubona ibisubizo bitizewe ( biased results)!

Ibyamarangamutima kandi ntiwabikoraho ubushakashatsi bwizewe kubera iyo mpamvu mvuze, no kuba amarangamutima adafatika nko kuba wabara inka zatanzwe muri gahunda ya girinka munyarwanda, one laptop per child, abana bagwingiye n’abarwaye bwaki, abarwaye amavunja, kumenya umubare w’abanduye agakoko gatera sida n’ibindi byinshi nk’ibyo.

Gupima amarangamutima bisaba kwitonda, kwirinda guhubuka no kwirinda kwijandika mu bushakashatsi nk’ubwo, uhenganye cyangwa ubogambye ugakora icyo Karl Marx yise kurebera kure igikorerwaho ubushakashatsi ( distanciation de l objet d’ étude), nko kukizibukira kugira ngo ucyigeho neza.

Umuyobozi wa komisiyo y’igihugu yo kurwanya Jenoside Dr Jean Damascene Bizimana, twavuga ko nawe yabonye ko hari umukoro ugihari mu kurandura ingengabitekerezo ya Jenoside

Birumvikana ko ari ibintu bitorishye! Nari mvuze ko u Rwanda aribwo buryo rwahisemo kureba ibibazo by’amoko nayo acyibazwaho byinshi ntibivugweho rumwe nubwo abantu babiceceka kubera gutinya za ngaruka navuze hejuru. Ese umuntu yiyumvamo koko kuba umugesera, umunyiginya, umusindi, umuturagara, umukatsa, umuhumuro, umusango, umweneyuhi, umukono, umuha cyangwa se andi moko nk ayo? ese koko abanyarwanda bamaze kumva ko ubwoko bwabo ari ubunyarwanda? nanjye ndimo kubaza nka mwalimu kuko umunsi umwe ndi kumwe n’ubuyobozi wanjye icyo gihe umuzungu yadutunguye mu biro bye tumaze kumwibwira abo turibo maze ikibazo yakurikijeho ngo ” muri abahutu cyangwa muri abatutsi? ” Twembi twasubije ko turi abanyarwanda! umuzungu azunguza umutwe biramucanga.

U Burundi bwo bwahisemo indi nzira bw’uko bufata ikibazo cy’amoko. Ntibigora umurundi kukubwira ko ari Umuhutu cyangwa Umututsi cyangwa umutwa. Ari uburyo bw’u Rwanda ari n’ubw’u Burundi n’ubuhe bukwiriye mu gusubiza iby’abantu bibaza ku moko cyangwa byatumye habaho ubumwe n’ubwiyunge mu buryo bufatika?

 

Ngarutse ku mutwe w’inkuru aho nsa n’uwibaza niba ibyabaye muri miss Rwanda 2019, nkibaza niba umuntu atabikuramo isomo nk’igipimo gikomeye cy’aho tugeze muri gahunda y’ubumwe n’ubwiyunge. Ayo matora yavuzweho byinshi cyane na nubu bikivugwa. Sinabikurikiranye cyane ariko hari ibyagiye binkangura nk’itangazo rya komisiyo y’igihugu ishinzwe kurwanya Jenocide, ibyavuzwe na komisiyo y’igihugu y’ubumwe n’ubwiyunge, n’ibindi byinshi byagiye byandikwa ku mbuga nkoranyambaga birebana n’ayo matora.

 

Byarankanze nsanga kubera ibyo nisomeye, tugikeneye ubuhwituzi kandi inzira iganisha ku bumwe n’ubwiyunge ikiri ndende. Si ugukabya ariko ni uko muri ayo matora habayemo kurengera no kugaragaza cyane ya marangamutima nerekanye hejuru. Hari igihe nanjye nari hafi gutwarwa nayo kubera umwana w’aho nkomoka! hari abantu batwawe nayo nkanjye kubera kuba baturuka ahantu hamwe n’umu miss uyu cyangwa uriya. Nubwo ibyo atari bibi ahandi byazambye bitewe n’abantu bagaragaza gushyigikira bifashishije amoko nkuko byagendaga bigaragara ku mbuga nkoranyambaga.

Iyi myumvire rero niyo nsanga igaragaza ishusho y’uko hari abantu batari bake iby’ubumwe n’ubwiyunge bitarabacengeramo ngo bahinduke. Njye ngera kure mu mitekerereze yanjye kuko mbibonamo ko hari abakibura ” maturité politique” cyangwa icyo nakwita ” culture politique”! Byombi birakenewe mu buzima bw’igihugu, ubuzima bw’abaturage kugira ngo babashe kwihitiramo (gutora) badashingiye ku marangamutima. Gutora umuntu bigakorwa kubera ibitekerezo byiza utorwa yabagejejeho ( political programme, ideology) aho kumutora cyangwa kumufana kubera emotions, sentiments! Nshingiye kuri ibyo nisomeye byabaye muri miss Rwanda ese ntibigaragaza neza ko hari byinshi bigikenewe gukorwa muri urwo rwego?

 

Mu gihe nta mahame asobanutse agaragaza neza ibyashingirwaho byatuma amatora akorwa mu buryo budateje impagarara, hakwiriye gukumirwa ibyatuma hari ibyafasha abatora bishingikirije amarangamutima kuko budashobora gutanga ibisubizo byizewe. Niba kandi bigaragara ko amatora yateye ikibazo kubera ibyo by’amoko, nshingiye ku buremere bifite ( sensibility) kuko bibangamira inzira y’ubumwe n’ubwiyunge ibya MissRwanda byavaho burundu kuko hari n’ahandi henshi mu bindi bihugu bidakorwa. Niba kandi binakozwe nihanozwe uko byakirwa neza, n’abatora bashyire mu gaciro birinde gukururwa n’ubuhutu, ubututsi cyangwa ubutwa dore ko hari n’abavanze ( Hutsi na Tsihu) bo batavugwa kandi nabo ari bene kanyarwanda.

Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Fidèle Ndayisaba,

Nshingiye ku kiganiro cyakozwe n’Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge (NURC), Fidèle Ndayisaba, mu mwaka 2016 ubwo yaganiriza inzego za Leta n’abikorera yavuze ko igipimo cy’Ubumwe n’Ubwiyunge kizagera kuri 95% mu mwaka wa 2017. Aba bari mu kiganiro ni zimwe mu nzego za Leta, abikorera, abanyamadini n’imitwe ya Politiki, cyabaye tariki 11 Gicurasi 2016, aho bari bagamije kureba intambwe ubumwe n’ubwiyunge bugezeho, imbogamizi n’icyakorwa ngo bukomeze bujya imbere.

 

Ndayisaba yavuze ko ubushakashatsi bwerekana ko igipimo cy’Ubumwe n’Ubwiyunge kizamuka ku buryo bushimishije. Agira ati “Igipimo cy’Ubumwe n’Ubwiyunge cyo muri 2015 nubwo kitarajya ahagaragara, cyerekanye ko bugeze kuri 92,5% tukaba kandi dufite intego y’uko kizaba ari 95% muri 2017.”

Ibi Ndayisaba abivuga ahereye ku mibare yo muri 2010, aho igipimo cyari kuri 80%, akishimira intambwe igenda iterwa mu mibanire myiza y’Abanyarwanda. Cyakora ngo haracyari inzitizi zikigaragara zibangamira iyi ntambwe, ari yo mpamvu kwigisha bigomba guhoraho.

Ati “Haracyari bamwe mu banyarwanda bakirebera mu ndorerwamo y’amoko bo ubwabo na bagenzi babo, hari abagifite ingengabitekerezo y’amacakubiri n’iya Jenoside. Imbogamizi ziracyahari, ari yo mpamvu hasabwa ubushake bwa buri Munyarwanda kugira ngo ibi bibazo bikemuke.” Aha rero umuntu ashobora kwibaza byinshi , niba igikorwa cyo gutora Miss bizamo ivangura n’ingengabitekerezo twavuga ko iki gipimo cyageze 95% koko? Uyu muyobozi yavugaga ko kizageraho 2017. Kuki bigaragaye mu 2019 ? Nibyo kwibaza.

Umutahira mukuru Bamporiki Eduard nawe narebe ko hakenewe gutoza mu bundi buryo bwatuma ndi umunyarwanda ishinga imizi

Nasoza nifuza kandi nisabira ko hakorwa irushanwa ry’ababi ( abadafite) uburanga, ariko bafite ubumenyi buhanitse, kimwe na miss disability, hagakorwa na ba miss banini nkuko nabibonye bikorwa muri Israel. Bisaba ingengo y’imari birumvikana ariko yashakwa niba koko bikenewe. Ikindi nsoza nibaza ministeri ibifite mu nshingano yaba yaragaragarije abanyarwanda inyungu aya matora yabamariye? Hakenewe ko amafaranga agendera muri miss Rwanda yamenyeshwa abanyarwanda ingano yayo n’inyungu bakuyemo nizo igihugu ndetse n’abanyarwanda muri rusange bafitemo zibe zizwi aho kuba buri wese asobanura ibyo yishakiye . Nihakorwe kandi assessment, isuzuma ryerekana ibyo bari bateze kuri ba miss batambutse, mu myifatire no mu mico, niba barashyize mu bikorwa ibyatumye babatora maze hafatwe ubyemezo n’ingamba maze Bamporiki akabona aho ahera.

Umunyamakuru wa bwiza.com, akaba n’umusesenguzi akaba n’umwarimu muri kaminuza, Samuel Munyakayanza

 

Munyakayanza Samuel

Izindi wakunda

6 Ibitekerezo

Kaliganwa Elie 09/02/2019 7:24 pm at 7:24 pm

Isi izarinda irangira amabara akitwa amazina yayo. Ahubwo mureke tuyakoreshe atari ukubiba inzangano. Ibyo tubeshya ngo amoko twayarazwe nabakoroni sibyo kuko baba barayaduhaye mundimi ziwabo umuhutu umututsi umutwa ibi nikinyarwanda nkuko tuvuga Umunyiginya Umwega umugesera umusindi numuziigaba nayandi…..

Subiza
twubakane 09/02/2019 8:14 pm at 8:14 pm

Amoko ku bantu= inyungu mbi. Amoko ku Mana = Umunezero w’ ibyaremwe. Niba abantu bava inda imwe bavuka badasa, ni kuki twatekereza ko ari byiza ko abantu bose bagakwiye gusa? Ibyo Imana yaremye byose ni byiza kdi Imana yashyizeho uko ibintu bizagenda bishira cyangwa birushaho kuba byiza step by step (buhoro buhoro, mu gihe runaka). Twe rero usanga dushaka kubyihutisha cyangwa kubitinza. Iyo uzanye ikibazo cy’amoko hari byinshi uba udindije muri gahunda y’Imana( ubusabane bw’abantu, kudindiza itsinda runaka), ndetse hari na byinshi uba wihutishije mu buryo budakwiriye ( ex. kumaraho abantu, itsinda).

Kuva cyera kugeza ku Ngoma ya Rutarindwa amateka y’u Rwanda yanditse neza. Ariko kuva ku Ngoma ya Musinga amateka y’u Rwanda yagiye abikwa cyangwa yandikwa mu buryo bubogamye. Hari Ubwiru buriho cyga bwabayeho bw’ abakurambere bacu b’abacurabwenge budashobora kumenwa cyga kumenywa bwabaye inkingi yo kubaka ishyanga nyarwanda ariko Ubucurabwenge ubu bukaba butitaweho cyane bityo bigatuma ishyanga ryacu rihungabana. Gusa Umuyobozi w’Igihugu niwe ugerageza ariko abandi aho gushyigikira ubwo bucurabwenge ahubwo usanga babusenya bibwira ko barimo gukora neza.

Urugero rwatuma hari icyo wakwivumburira : Ese habaye igihe Ubwoko bumwe bwari butuye ahabwo butavanze n’abandi bantu? Ese higeze habaho kunena ibikoresho bikoze mu ibumba? Ese higeze hanenwa ibiribwa bihinze? bikomoka ku matungo? Ese mbere y’uko U rwanda rwa gasabo rugera mu Nduga nta nka zabaga mu Nduga? Habaga ubwoko bumwe? Inkuku? inyambo? Ibihogo, urwirungu ? Ese mu kwagura Urwanda Abagore beza n’inka byanyagwaga byashyirwaga he? mu buhe bwoko? Ese ingabo zabaga zigizwe n’ubwoko bumwe? Ese Umwami yahabwaga amakoro n’ubwoko bumwe?

Kuki Umwami yagombaga gushaka mu Bega cg andi moko?

Ese ABAMERE bo mu Bugesera ni ubuhe bwoko? Ni abatutsi (?).

Abanyiginya bose bari abatutsi? Umusozi wa Munyiginya? ex; Akarere ka Ankole = Abanyankore.

Tureke ubujiji. Harakabaho ABATUTSI BACU, HARAKABAHO ABAHUTU BACU, HARAKABAHO ABATWA BACU. KWANGA ABANYARWANDA ni ugutuka abakurambere bacu bitanze batizigamye.

Ubwo tumaze kubumbatira ishyanga ryacu, tumenye ko turi ubwoko bumwe ( ABANYARWANDA). Bitabaye bityo mwareka buri muryango ugasubira mu gihugu cyawo. ( Abo kwa Mashira, kwa Kimenyi,……….., ABAZIGABA, …………).

Wowe se wajya mu kihe? Mu gitutsi? ( nticyabayeho), Mu Gihutu? (nticyabayeho). Mu Gitwa? (nticyabayeho).

Ikibazo dufite ni uko hari abashenywe bihagije na Jenocide kdi bagomba kugira aho bagezwa byanze bikunze ( mu mibereho n’Ubutabera). Ibyo nibirangira abanyarwanda bazafatwe kimwe.( FARG izavaho). AERG yo ikwiye kuvanwaho byihuse kuko biramutse bitinze yaba umuzi w’ingengabitekerezo ( aBAYOBOZI BAZABIREBE NEZA KANDI BYIHUSE kuko umubare w’abanyeshuri barokotse Jenoside nkeka ko ari mucye cg ubu ari ntawo. Keretse abataragize amahirwe yo kwiga none ubu bakaba barimo nabo kwibukwa nubwo bakuze bwose, ariko nta kibazo).

Ngayo nguko. Nawe nyunganira twubake ishyanga ryacu.

Subiza
Karamutsa Gerard 09/02/2019 10:17 pm at 10:17 pm

Tubanze dusobanurire urubyiruko n’abandi bavutse nyuma ya 59 ko génocide yakorewe abatutsi muri 1994 ariyo inzego mpuzamahanga zirimo ONU zemeye. Ariko abanyarwanda tuzi neza ko guhera muri 1959 abantu biswe abatutsi benshi tutanazi impamvu turi abatutsi baratotejwe, baricwa, amazu baratwika, bahungira mu bihugu duhana imbibe. Abageragezaga kugaruka kubera ubuzima bubi barishwe.Byari genocide itamenyekanye my nzego mpuzamahanga kuko abari bafite ubushobozi bwo kuyimenyekanisha aribo bari bayidhyigikiye. About in nabo bateye urujijo mu bisobanuro by’amagambo umuhutu umututsi n’umutwa. Ago magambo bari icyo asobanuye Ku banyarwanda. Tuyasobanuye neza twasanga nta gaciro twayaha, tugasanga ubunyarwanda aribwo bwoko duhuriyeho, twakubakiraho mu guhanagura ibyadutandukanyije bidafite ishingiro my mateka yacu. Ibi nibyo abashinzwe ubumwe n’ubwiyunge, itorero, bakwiye gusobanura.

Subiza
rukaku 09/02/2019 10:23 pm at 10:23 pm

wowe @twubakane, bitewe nimirimo urimo gukora ubu, waba ufite posistion nziza ushaka kugumana kugiciro byagusaba cyose, bisa nabo byatumye wiyibagiza amateka yu rwanda, cg se ukaba wifuza kuyavuga uko wowe ushaka kuyumva. ahubwo wowe banza usesengure inyandiko yuyu munyamakuru, cg se urebe neza amagambo abantu bacitse kwicumu bandikaka batuka mwiseneza.

Subiza
Emmanuel 10/02/2019 9:31 am at 9:31 am

Munyakayanza Samuel, Nibyo warize pee, Kandi imyaka ufite nayo ikwemerera kumenya amateka y’u Rwanda n’abanyarwanda. Ariko Analyse zawe ntizihamanya n’umutimanama wawe wowe ubwawe. Urabogama cyane iyo ugiye guhitisha ibitekerezo byawe, usubiza abantu inyuma cyane. Uravuga ku marangamutima, ayawe ukayahisha. Ibyagaragaye muri Miss Rwanda 2019 Bifite ‘intangiro kandi nyine byatanze akandi kazi k’ubumwe n’ubwiyunge mu Rwanda. Jya ukoma urusyo ukome n’ingasire. Ntabwo Ingengabitekerezo igomba kureberwa mu ndorerwamwo imwe (Monoculaire), Oya. Igombwa kureberwa muri Binoculaire kuko uwiyumva mo Ubuhutu akumvako yabukoresha abangamira uwo abonamo ubututsi agomba gufatwa muri societe Nyarwanda n’imbere y’amategeko kimwe n’uwiyumvamo ubututsi ubukoresha abangamira uwo abonamo ubuhutu. Kubera ibitekerezo byawe uhitisha ushaka gusubiza amazi mu iriba, Sinzongera gusoma inkuru yawe.

Uribuka iy’ubushize aho wagereranije Intara ya Kivu (DRC) n’iya Crimea? Uzabaze ababyeyi bahekuwe n’intambara zo muri Kivu nibwo uzabona agacyiro k’ibitekerezo byawe.

Subiza
twubakane 11/02/2019 9:30 pm at 9:30 pm

Kuri Rukaku, ibyo Munyakayanza avuga ndabyumva kdi ni Ukuri. Ariko Jenoside yashobotse ku rwego yagezeho cyane cyane bitewe n’ingengabitekerezo yari mu Bantu. Iyo ngengabitekerezo rero hari ihuriro rishoboka kuba rihari bitewe n’Urupfu rwa RUTARINDWA, ikubitwa rya Mbonyumutwa, ariko noneho hakaba n’uruhare ntashidikanywaho rw’abakoloni mu kurema ingengabitekerezo aho itari iri, Uruhare ntashidikanywaho rw’Abafaransa hanyuma n’Uruhare rwa Leta ya Habyarimana na Bagosora.

Urupfu rwa Rutarindwa: Kubera urupfu Rwa Rutarindwa, abaturage benshi bazinutswe ndetse bamwe bigomeka ku butware bwa Musinga kdi bitarigeze bibaho ku bandi bami benshi. Aha niho Umugabekazi KANJOGERA hamwe n’ubutegetsi bwa cyami bahimbiwe ibyaha byinshi kdi bibi bizinura abantu. Urugero: Kuvuga ngo iyo KANJOGERA yahagurukaga ngo yahagurukiraga ku nkota ishinze mu muntu, n’ibindi n’ibindi. Ibi byatumye abantu amoko yose banga Ubwo buyobozi urunuka ndetse n’ubushyigikiye wese. Bakomeje rero guhimba ibintu bibi byose bishoboka kuri uwo mwamikazi ndetse n’ubutegetsi bw’ubwami. Nyuma nibwo byaje kwitirirwa ubututsi, abatutsi ( twagereranya n’ishyaka rya politiki ry’ Ubwami bwa kera).

Ikubitwa rya Mbonyumutwa: Mbonyumutwa yari Umutware mu nduga ( iyo za Nyabikenke) kandi yari akunzwe n’abo ayobora ndetse n’ubutegetsi bwamushyizeho; kuko yari yarize bityo akabayobora nk’umuntu waciye mu ishuri. Aho akubitiwe rero habayeho ibihuha ko akubitswe n’abatutsi by’agasuzuguro kdi ari umutware. Ibyo rero kera byagombaga gutuma uwabikoze yicwa. ariko kubera inkundura yari iriho, ntihabayeho guhanwa ahubwo abaturage bahisemo kwihanira, nibwo biraye mu bandi batware maze barica, barasahura, baratwika n’ibindi. Ubwo rero hri byinshi byagiye mu mitwe y’abantu icyo gihe.

Uruhare rw’Abakoloni: Igihe baje babonye ko mu Butegetsi hari abantu bafite ukuntu bateye cyane cyane ku bw’amasano bari bafitanye. kdi basanze n’ibya Musinga bigishyushye.Ubwo rero bakurikije science nibwo batangiye gupima abantu ngo barebe ibice cyangwa ingeri z’abantu batuye u Rwanda. Bagiye bapima uburebure ndetse n’amazuru maze bakandika mu ndangamuntu ( ibuku=Book) cga mu gitabo (ID niko bayitaga) itsinda bagushyizemo bakurikije ibikuranga by’ibipimo byabo. Amatsinda rero yari Abahutu, Abatutsi, Abatwa. Aha ariko ntacyo byari bitwaye kuko cyera byasaga n’ishema kwitwa umuhutu w’Umwami cg umututsi w’imfura cga umutwa w’i Bwami ndetse nta vangura ryabagaho ku buryo hari igice cyaremererwa kurusha ikindi kuko Umwami aticaga ahubwo hicaga rubanda bashyiragaho agakeregeshwa kabo. Kdi abaturage bakundaga umwami bikomeye kuko yabaga ari protection yabo bose. Abakoloni kdi bagize n’uruhare mu kwandikisha amateka bakagenda bongeramo umunyu bakagoreka ibyo bashatse mu kurwanya ubutegetsi bwa Musinga.

Uruhare rw’Abafaransa: Ntiriwe mvuga byinshi, ukurikije amashuri HABYARIMANA yize (Secondaire gusa) ndetse n’abandi bategetsi yayoboraga, ntabwo bari bazi Jenoside icyo ari cyo, uko ikorwa bikemera, tekiniki yo kuyihisha, kuyihutisha no kuzayihakana nyuma. Bafashije mu gutanga igitekerezo, tekiniki ndetse n’ibikoresho. N’ibindi…..

Leta ya HABYARIMANA yashyira imbere ubwoko mu nzego zose mu rwego rwo gukandamiza abatutsi ngo batazasubira ku butegetsi, ndetse no kwihimura kuko Ubutegetsi bwa Cyami bwategetse igihe kirekire. Yateguye genoside kdi iyobora ishyirwa mu bikorwa ryayo. Bandikishishe amateka bakurikije uko babishaka mu rwego rwo kwangisha abantu ingoma ya cyami(gitutsi).

Kuva cyera no kugeza ubu ndetse n’igihe kizaza, wasangaga Abakene babana hanyuma n’abakire bakabana. Kuvuga ngo uri umututsi ntabwo byaguhesha kubana n’abakire b’abatutsi cyangwa b’abahutu. Ariko umukire w’umuhutu abana n’abakire b’abatutsi. N’abakene rero ni uko barabanaga mu bukene bwabo.

Ubututsi rero cg Ubuhutu, Ubutwa muri make ni ingengabitekerezo iba mu batindi. Mu biyubashye nta bibayo kuko habana abareshya, habana abakize.

Abatindi rero bazagumana ubutindi bwabo kdi uzabwiyambura buzamuvaho naho uzabwishyiramo buzamwokama.

Mureka tube abasirimu bashobora kubana n’abantu bose. Kdi iyo irebye usanga squelette ari imwe ariko housing ziratandukanye. Ibyo Imana yabikoreye gushimisha abantu no kugirango babashe kuzuzanya. Kabeho Rwanda rw’Abanyarwanda. Nawe nyunganira ntifasha gusara.

Subiza

Tanga Igitekerezo

Bwiza.com
error: Alert: Ntabwo byemewe!!