bwiza.com
Ahabanza » Perezida Museveni  yemeza ko nta gihugu cyo mu karere cyatera ikindi
Amakuru

Perezida Museveni  yemeza ko nta gihugu cyo mu karere cyatera ikindi

Perezida wa Uganda, Yoweri Kaguta Museveni yemeza ko nta makimbirane ahari ku buryo habaho kurwana hagati y’ibihugu bigize Umuryango wa Afurika y’Iburasirazuba (EAC).

Ibi uyu mukuru w’Igihugu yabirangarije Addis Abeba mu biganiro yagiranye n’Ushinzwe Ububanyi n’Amahanga mu Muryango w’Ibihugu by’Iburayi (EU), Federica Mogherini kuri wa Gatandatu w’Icyumweru gishize.

Museveni yavuze ko nta ntambara yakwaduka  bitewe n’uko abayobozi bo muri EAC bose bashyize ingufu mu mikoranire hagati yabo bityo ko ibibazo bitajya irudubi kugeza hitabajwe urwamo rw’imbunda.

Ati “ Amahoro aragenda aboneka mu karere. Ahari ibibazo ni  Sudani y’Amajyepfo no mu Burundi bitewe n’uko tutari dushyize hamwe. Iryo ni ryo pfundo ry’ibibazo.”

Perezida Museveni nk’uko inkuru dukesha Chimpreports ibivuga, yijeje Mogherini ko ku kibazo cy’Uburundi nta mpungenge giteye.

Ati “  Nta mirwano iri mu Burundi, ubuyobozi buri gukorana bya hafi n’akarere. Ni njye uyoboye ibiganiro by’amahoro mu Burundi, nzi neza kirogoya ibirimo, tuzabikemura.”

Ku rundi ruhande Museveni atangaza ibi mu gihe hari ukutarebana neza hagati y’ibihugu bigize EAC by’umwihariko u Rwanda na Uganda ndetse n’Uburundi.

Perezida Nkurunziza ashinja u Rwanda guteza akaduruvayo mu gihugu cye. Ibi U Rwanda ntirubyemera , ahubwo rushinja u Burundi gufasha abashaka kuruhangabanyiriza umutekano baba muri Repubulika Iharanira Demokarasi ya Congo.

Ikindi kandi Uganda ntimeranye neza n’u Rwanda kuva mu Kwakira 2017. Ishinja u Rwanda kwinjirira inzego z’umutekano zayo, ubutasi no gushimuta impunzi zahahungiye.

Ibi birego u Rwanda rubihakana kenshi ahubwo rugatunga agatoki Uganda ko icumbikiye abashaka kuruhungabanyiriza umutekano, ibirego iki gihugu kidahakana cyangwa ngo cyemeze.

 

 

 

 

Izindi wakunda

Bwiza.com