bwiza.com
Ahabanza » Perezida wa Algeria utakibasha kwigenza yatangaje ko aziyamamaza
Amakuru Politiki

Perezida wa Algeria utakibasha kwigenza yatangaje ko aziyamamaza

Perezida wa Algeria, Abdelaziz Bouteflika w’imyaka 81 y’amavuko, yatangaje ko aziyamamaza muri manda ya gatanu mu matora ya perezida ateganyijwe kuba mu kwezi kwa kane muri uyu mwaka wa 2019.

Perezida Bouteflika amaze imyaka 20 ari ku butegetsi, ariko ni gacye cyane yagaragaye mu ruhame kuva yarwara indwara y’imitsi yo mu bwonko mu mwaka wa 2013.

Muri ubwo butumwa, yashimangiye ko “Ugushaka gukomeye” kwe ko gukorera Algeria kwatumye arenga “Ingorane z’ibibazo by’ubuzima”. Abamunenga bavuga ko ibyo bibazo by’ubuzima bituma bimugora kuzuza inshingano ze.

Agendera mu kagare k’abarwayi kandi yagiye aburizamo inama z’akazi zo mu bihe bishize bya vuba.

Inama ya nyuma Bwana Bouteflika aheruka kugirana n’umutegetsi wo mu mahanga wo ku rwego rwo hejuru, yari iyo mu kwezi kwa cyenda k’umwaka ushize wa 2018 ubwo umukuru w’Ubudage, Angela Merkel yasuraga iki gihugu. Inama byari biteganyijwe ko bagirana mbere yaho yari yaraburijwemo.

Nkuko BBC ibitangaza, Bwana Bouteflika ahanini byitezwe ko ari we uzatsinda aya matora ateganyijwe kuba mu kwezi kwa kane.

 

 

Izindi wakunda

Bwiza.com